Read lulogooli Vakalagi 9 Bible Online

Vakalagi 9 - lulogooli bible

Vakalagi 9

¹Kandi Abimeleku mwana wa Jerubaal ya tsia ha Shekem ku vakodza veve, na a volerana navo, na halala na viko vosi avenyumba yaguga wewe, na a vola,

²Mu vole, mwadza, mmatu gavasatsa vosi va Shekem, mu teve Amalahi ku na galiha ku mwinye, ni i va avana va Jerubaal vosi, ava veye makumi gatano na gaviri, vamehe ku mwinye, naho mulala yamehe ku mwinye? Kandi mwidzulire inze mbeye kigumba kyenyu nenyama yenyu.

³Avakodza veve va vola kuye mmatu gavasatsa vosi ava Shekem makuva yago gosi: nemyoyo gyavo gya yeka ku Abimeleku; kigira va vola, Uyu a veye amitu.

⁴Na va mu ha vidonye vyefetha makumi gatano na gaviri vya twula mu inyumba ya Baal-berithu, nakyo Abimeleku ya tunga avandu avoluyai navatamanyi, va mu londe.

⁵Na ya tsia mu inyumba ya dada wewe ha Ofira, na yiita avamwavo veve avana va Jerubaal, ava li makumi gatano na gaviri, ya viitira ku ligina lilala: navutswa Jotham umukogoti wa Jerubaal ya tigala; kigira yivisa.

⁶Na vasatsa vosi va Shekem vevungidza avene halala, nenyumba yosi ya Milo, na va tsia kwamehidza Abimeleku a ve mwami, himbi nomusala gwomunara gu veye mu Shekem.

⁷Na lwa va volera Jotham makuva yaga, ya tsia kusingira ku kigulu kya Gerizim, na ya ginga mwoyo gwigwe, na a langa, na a va volera, Mu hulira inze, mwinye avandu va Shekem, Nyasaye a duke kuhulira mwinye.

⁸Misala gya tsia ku inyinga indala kuvaka mulala amaguta a ve mwami kuvo; na gya volera muzaituni, Wamehe ive ku kwinye.

⁹Navutswa muzaituni gwa gyi volera, Inze ndeke maguta gange, aga vidzominyiranga Nyasaye navandu ku inze, nokutsia kwameha ku misala?

¹⁰Kandi misala gya volera mukuyu, Hamba, wamehe ku kwinye.

¹¹Navutswa mukuyu gwa gyi volera, Ndeke ubunolu bwange, namakuyu gange amalahi, ntsie kwameha ku misala?

¹²Kandi misala gya volera muzabibu, Hamba, wamehe ku kwinye.

¹³Namuzabibu gwa gyi volera, Ndeke iwaini yange indoto, i yanzidzanga Nyasaye navandu, ntsie kwameha ku misala?

¹⁴Hene yaho misala gyosi gya volera lutavati, Hamba, wamehe ku kwinye.

¹⁵Nolutavati lwa volera misala zana, Ni mu va ni mu mbaka maguta mbe mwami ku mwinye ligali, hambi mu suuviri kiriri kyange; ni ga va ni ga ta veye ndiyo, umuliru gu twule mu lutavati, na gu sambe mitaragwa gya Lebanon.

¹⁶Kunangwa kalunu, ni mu va ni mu kola nobusuuvirifu nobulungi, mwamehidzi uyu Abimeleku a ve mwami, kandi ni mu va ni mu kolera Jerubaal bulahi navenyumba yeye, nokumukolera kuli ga dukiranga makono gege

¹⁷(kigira dada wange ya lwanira mwinye, na ya haana livamwoyo lilye, nokuhonya mwinye ku makono ga Midiani:

¹⁸na mwinye mu vukira inyumba ya dada wange lero, ni mwiita avana veve, avandu makumi gatano na gaviri, ku ligina lilala, na mwamehidzi Abimeleku, mwana womukana mutugwa wewe, a ve mwami ku avandu va Shekem, kigira a veye amwavo wenyu);

¹⁹kunangwa ni mu va ni mwa kolera Jerubaal nobusuuvirifu nobulungi uyu navenyumba yeye lero, mu sangale mu Abimeleku, naye kandi a sangale mu mwinye:

²⁰navutswa ni ga ta veye ndiyo, kandi ndiyo muliru gu twule mu Abimeleku nokusamba avasatsa va Shekem, nenyumba ya Milo; nomuliru gu twule mu va Shekem, nomunyumba ya Milo, nokusamba Abimeleku.

²¹Na Jotham yiruka, na a tsia Beeri, na a menya yo, kigira ya tia Abimeleku amwavo wewe.

²²Na Abimeleku ya li munene ku Israeli mihiga gyivaka.

²³Na Nyasaye ya leta roho mudamano hagati ha Abimeleku navandu va Shekem; avandu va Shekem va kolera Abimeleku nobugadi:

²⁴kuduka kirage kya kolerwa avana va Jerubaal makumi gatano na gaviri, ga duke amasahi gavo ga ng'odwe ku Abimeleku amwavo wavo, wa viita, noku vasatsa va Shekem, ava dinnya makono gege a duke kwiita amwavo veve.

²⁵Navandu va Shekem va vika avandu kumugoneka ku intongi yevigulu, navo va vanyaga vindu vyavandu vosi va vita ku inzira yeyo himbi navo: na Abimeleku ya volerwa.

²⁶Na Gaali mwana wa Ebedi ya tsia halala navamwavo veve, ni vambuka ni va duka Shekem; navandu va Shekem va suuvira uyu.

²⁷Na va samula kutsia mmilimi, na va gera milimi gyavo gya mizabibu, na va mina muzabibu, ni va lomba lidiku linene, kandi vingira munyumba ya munyasaye wavo, ni va lia ni va nwa, nokulaama Abimeleku.

²⁸Na Gaali mwana wa Ebedi ya vola, Abimeleku uyu a veye ibwaha, na Shekem ni bwaha, ku duke kumutumekira? Uyu si a veye mwana wa Jerubaal? Na Zebuli a veye munyampara wewe? Mu tumekire avasatsa va Hamoru dada wa Shekem: navutswa kigira ki kwinye ku tumekire uyu?

²⁹Nkano avandu yava va veye ise womukono gwange kunangwa nkano; nda ka twulidza Abimeleku. Naye ya volera Abimeleku, Meda avaskari vovo, u twule.

³⁰Na lwa Zebuli munene welidala ya hulira makuva ya Gaali mwana wa Ebedi, ubutima bwibwe bwaaka.

³¹Na ya tuma vatumwa va tsia ku Abimeleku makiriri, na a vola Henza, Gaali mwana wa Ebedi navamwavo veve va duki Shekem; na, henza, va gemanga lidala yili li duke kuvukira ive.

³²Kunangwa kalunu, ive singira mbudiku, ive navandu va veye halala nive, mu goneke mmilimi:

³³na ga la va mugamba, nonoho, lwa liuva li tonga, ive u la vuka mabwebwe, nokutwulira lidala yilyo; na, henza, lwa uyu navandu va veye halala naye va twula kulwana nive hene yaho u la nyala kuvakolera kuli u la nyola ubwiyangu.

³⁴Na Abimeleku ya vuka ubudiku, halala navandu vosi va li halala naye, na va goneka ava Shekem neviduma vine.

³⁵Na Gaali mwana wa Ebedi ya tsia kyova, na a singira ha bwingiriru bwekiribwa kyelidala: na Abimeleku navandu va li halala naye, va vuka, kutwula ha zana ha va goneka.

³⁶Na lwa Gaali ya lola avandu yavo, ya volera Zebuli, Henza, avandu viikanga kutwula mu tsintongi tsyevigulu. Na Zebuli ya mbolera, Ive u lolanga kiriri kyevigulu kuli ki veye avandu.

³⁷Na Gaali ya vola hali kaviri na a vola, Henza, avandu viikanga hagati hekivala, nekiduma kilala kidziranga ha inzira yomusala gwa Meonenim.

³⁸Hene yaho Zebuli ya mbolera, Munwa gugwo kalunu gu ve haliha, kigira wa vola, Abimeleku ni bwaha, ku luhe kumutumekire? Yava si va veye avandu ava ive wa lega? Kalunu, tsia kyova, mwadza, u lwane navo.

³⁹Na Gaali ya tsia kyova imbiri wavandu va Shekem, na a lwana noa Abimeleku.

⁴⁰Na Abimeleku ya mu kunga, naye yiruka imbiri wewe, navanyingi va gwa ava kuywa tsing'oma, kali kuduka hokwingira hekiribwa.

⁴¹Abimeleku ya menya ha Aruma: na Zebuli ya kunga Gaali na avamwavo veve, va vule kumenya Shekem.

⁴²Na va duka mugamba, avandu va tsia kyova ku milimi; na va volera Abimeleku.

⁴³Naye ya vugula avandu, na a va gavula viduma vivaka, ni va goneka mu milimi; naye ya lola, henza, avandu va twula mu lidala; naye ya vuka, na a lwana navo, na ya va kuya.

⁴⁴Na Abimeleku, neviduma vi veye halala naye, va tsia tsimbiru, ni va singira ho bwingeriru bwe kiribwa kyelidala: noeviduma viviri vya tsia tsimbiru kuvo vosi a va li mmilimi na va va kuya.

⁴⁵Na Abimeleku ya lwana ku lidala lidiku yilyo lyosi; na ya vugula lidala, na yiita avandu ava li mulyo: na ya tsoma hasi lidala, na a midza munyu kulyo.

⁴⁶Na lwa avasatsa vosi avomunara gwa Shekem va hulira makuva yago, vingira ho kwivisa he inyumba ya El-berithu.

⁴⁷Abimeleku ya volerwa avasatsa vosi avomunara gwa Shekem va vugani halala.

⁴⁸Ma Abimeleku yanegira kutsia mkigulu kya Zalimon, uyu na vosi ava li halala naye; na Abimeleku ya gumira imbadzi mmukono gwigwe, na ya tema ulusya lulala ku misala, na a lu vugula, na a lu gingira ku livega lilye: na ya volera ava li halala naye, Ga mwa lola inze ni nkolanga, na mwinye mu kole ndiyo, bwangu.

⁴⁹Navandu vosi va kola ndiyo, sa mulala ya tema ulusya lwilwe, na va londa Abimeleku, na va vika tsisya zana ku lugaga, nokusamba lugaga kuvo: na ndiyo avasatsa vosi avomunara gwa Shekem va kudza, kandi va duka kuli avandu elfu avasatsa navakali.

⁵⁰Kunangwa inyinga yeyo Abimeleku ya tsia Thebezu, na ya singeridza amahema gege kulyo, na a li vugula.

⁵¹Navutswa mu lidala yilyo ha li nomunara gwetsingulu, navasatsa vosi, navakali virukira yo, navandu vosi velidala, vehanira mu, na va nina ku kisegese kyomunara.

⁵²Na Abimeleku yadza ku munara, nokulwana nagwo, na yisunda himbi ha kiliango kyomunara a duke kugusamba nomuliru.

⁵³Nomukali mulala ya gulula isyu ku mutwe gwa Abimeleku, na ya tanya kihanga kikye.

⁵⁴Hene yaho ya langa bwangu musoleli wa ginga vyuma vivye, na a mbolera, Somola kivavi, u nziite, avandu va vule kuvola ku inze, Mukali ya mwiita. Ma musoleli wewe ya mu tumita, na a kudza.

⁵⁵Kunangwa avandu va Israeli lwa va lola Abimeleku u kudzi, va twula ni va tsia sa mulala hango hehe.

⁵⁶Na ndiyo Nyasaye ya vanza kisalya kyobudamano bwa Abimeleku bwa ya kolera dada wewe, mu liita avamwavo veve makumi gatano na gaviri;

⁵⁷na ubudamano bwosi bwa avasatsa va Shekem, Nyasaye ya vanza ku mitwe gyavo: nelilaama lya Jotham mwana wa Jerubaal lya duka kuvo.