Read lulogooli 2 Yohana 1 Bible Online

2 Yohana 1 - lulogooli bible

2 Yohana 1

¹Mukulundu, ibaruwa yeye yiyi i dukire mukali mutovole navana veve, ava nyanza mu ageligali; kandi si a li inze tsyeng'ine, navutswa kandi vosi ava manya ageligali;

²kigira ageligali aga menya mu kwinye, kandi ga la va nekwinye kuduka mihiga nemihiga:

³Tsimbabasi neliverererwa, nemirembe gyi twulanga ku Nyasaye Dada noku Yesu Kristo Mwana wa Dada, gyi la va nekwinye mu ageligali nomu buyanzi.

⁴Nyanza ligali kigira nyoye avalala ku vana vovo ava gendanga mu ageligali, kuli kwa nyola lilaga lya twula ku Dada.

⁵Kalunu mukali, nku saala, si ga li kigira nku ng'odeye lilaga lihya, navutswa lya kwa li nalyo kutwula mu litanga, ku yanzane avene navene.

⁶Kandi yibu bu veye ubuyanzi, ku gende kuii lilaga lilye. Yili nelilaga, kuli lya mwa hulira kutwula mu litanga, mu gende mu yilyo.

⁷Kigira avagadi avanyingi va loleki mu lirova, ava vula kweyama Yesu Kristo u dukive mu mubiri. Uyu niye mugadi nohing'ana Kristo.

⁸Mwehenze mwinye avene, mu vule kugotidza vindu yivyo vya kwa kola, navutswa mu duke kunyola madanyi madukiru.

⁹Ku vosi wimiriranga nokuvula kumenya mu megidzo ga Kristo, si a veye na Nyasaye: uyu u menya mu megidzo, a veye na Dada no Mwana.

¹⁰Ku vosi mulala na a duka ku mwinye na a vula kuleta megidzo yaga, mu ta mwingiridza mu inyumba yenyu, kandi mu ta mu chelidza:

¹¹kigira uyu u mu chelidza a veye musangi mu miyinzi gyigye midamano.

¹²Kigira mbeye nevindu vinyingi vya nyenya kumung'odera, si nyenya kuving'oda ku karatasi nobwino: navutswa nsuuvira kuduka ku mwinye, nokuvolerana nemwinye moni na moni, ubuyanzi bwenyu bu duke kudukidzwa.

¹³Avana vamwavo vovo mutovole va ku chelidza.