Read lulogooli Likunula 1 Bible Online

Likunula 1 - lulogooli bible

Likunula 1

¹Likunula lya Yesu Kristo, lya Nyasaye ya mu ha, a mannye avatugwa veve, vindu vya ga dukiranga kukolwa bwangu: kandi ya tuma ingelosi a mannye Yohana mutugwa wewe;

²wa lolekidza likuva lya Nyasaye, nelilolekidza lya Yesu Kristo, vindu vyosi vya ya lola.

³A veye nobugasu u somanga, kandi yava ava huliranga amakuva gobuprofeti yibu, nokulinda vindu vi ng'odeywi mu: kigira inyinga i veye himbi.

⁴Mang'oda ga Yohana ga duka ku mavugano gatano na gaviri aga veye mu Asia: Tsimbabasi tsi ve ku mwinye nemirembe, gyi twulanga ku uyu u veye ho nowa li ho nu udzanga; kandi gyi twulanga ku Roho vatano na vaviri ava veye imbiri wentebe yeye yobukumi;

⁵kandi gyi twulanga ku Yesu Kristo, u veye muloli musuuvirifu, nowa tanga kwivulwa wavakudzu, nomunene wavami velirova. Kuye u ku yanzanga, kandi ya ku boholola namasahi gege kutwula mu bwoni bwetu,

⁶na a ku kola ubwami navasalisi va Nyasaye wewe, Dada wewe; ubukumi bu ve kuye na lyameha kuduka imihiga nemihiga. Amini.

⁷Henza, yadza mu malesi; kandi tsimoni tsyosi tsi la mu lola, kandi ava mu tumita; kandi tsihiri tsyosi tsyelirova tsi la lira kuye. Yee, Amini.

⁸Inze mbeye Alfa na Omega Mwami Nyasaye a vola, u veye ho, nowa li ho, nu udzanga, Wanyala Vyosi.

⁹Inze Yohana, amwavo wenyu nomusangi halala nemwinye, mu busaliri, nomu bwami, nomu bwikudziri mu Kristo, nda li mu kisulu ki langwa Patimo kigira likuva lya Nyasaye nelilolekidza lya Yesu.

¹⁰Nda li mu Roho ku lidiku lyo Mwami, ni mbulira mwoyo munene inyima wange kuli kisiliva,

¹¹gu vola, Vya u lolanga, u ng'ode mu kitabu u hilire mavugano gatano na gaviri: Efeso, na Simurina, na Perigamo, na Tuatera, na Saride, na Filadelfia, na Laodikia.

¹²Na inze nda girunkana nduke kulola mwoyo gu volerana na inze. Na inze, lwa nda mala kugirunkana, nda lola vinara vyetsitaya vitano na viviri vyethahabu;

¹³na hagati hevinara vyetsitaya, nda lola mulala u fwana mwana wa Adamu, yiviki ingubo ya duka ku induvatiru, nokweboha ulukova lwethahabu mu kiritu.

¹⁴Kandi mutwe gwigwe nelisu lilye lya li lilavu kuli pamba indavu, lilavu kuli likonza; netsimoni tsitsye tsya li kuli lumemo lwomuliru;

¹⁵netsinduvatiru tsitsye tsya li kuli mugasa gu siyeywi, gwa li kuli gu siyeywi mu mahiga; nomwoyo gwigwe gwa li kuli mwoyo gwamadzi manene.

¹⁶Kandi ya li netsing'ereng'ani tsitano na tsiviri mu mukono mulungi zwigwe: nekivavi kyogi tsimbega tsyombi kya twula mu munwa gwigwe: nommoni mwimwe mwa li kuli liuva li ng'ereng'ana mu tsingulu tsyalyo.

¹⁷Inyinga nda mu lola, nda gwa ha virenge vivye kuli u kudzi. Naye ya vika mukono gwigwe mulungi ku inze, na a vola, U ta tia mba; Mbeye wokutanga nowekiheri,

¹⁸na Uveye Mwoyo; kandi na li mukudzu, kandi henza, mbeye mwoyo mihiga nemihiga, kandi mbeye netsifunguo tsyelikudza netsye Kihadisi.

¹⁹Kunangwa u ng'oda vindu vya u lola, kandi vindu vi veye ho, kandi vindu vi la va ho inyima;

²⁰agaviswa getsing'ereng'ani tsitano na tsiviri tsya wa lola mu mukono gwange mulungi, nagavisuwa agevinara vitano na viviri. Tsing'ereng'ani tsitano na tsiviri tsi veye tsingelosi vamavugano gatano na gaviri: nevinara vitano na vaviri vi veye mavugano gatano na gaviri.