Read lulogooli Likunula 10 Bible Online

Likunula 10 - lulogooli bible

Likunula 10

¹Kandi nda lola ingelosi wundi wetsingulu yika kutwula migulu, ya fumwa nelilesi; kandi kisahi kya li ku mutwe gwigwe, mumoni mwimwe mwa li kuli liuva, nevirenge vivye vya li kuli tsitiru tsyomuliru;

²kandi ya li nakatabu mu mukono gwigwe ka kunuywi: kandi ya vika kirenge kikye kilungi ku inyanza, nekimosi ku lirova;

³kandi ya hanzuka nomwoyo munene, kuli king'ang'a ki fwumanga: lwa ya hanzuka tsinkupa tsitano na tsiviri tsya vola myoyo gyatsyo.

⁴Kandi lwetsinkupa tsitano na tsiviri tsya vola, ndenya kung'oda: na nda hulira mwoyo gwa twula migulu, ni gu vola, U vike muhuri ku makuva yaga getsinkupa tsitano na tsiviri tsi voye, u ta ga ng'oda mba.

⁵Kandi ingelosi wa nda lola na a singiye ku inyanza noku lirova ya ginga mukono gwigwe mulungi na a gu henzidza migulu,

⁶ni yisuha ku uyu u veye mwoyo mihiga nemihiga, wa lomba ligulu nevindu vyosi vi veye mu, nelirova nevindu vyosi vi veye mu nenyanza nevindu vyosi vi veye mu lilindagira si li li va ho kandi:

⁷navutswa mu madiku gomwoyo gwengelosi wa katano na kaviri lwa yenya kukupa, vyaviswa vya Nyasaye vi la malilika, kuli lilwadza lilahi lilye lya yilwadzira avatugwa veve avaprofeti.

⁸Kandi mwoyo gwa nda hulira gu twula migulu, nda gu hulira kandi, gu mbolera, Tsia, u vugule katabu ka kunuywi mu mukono gwengelosi u singiye ku inyanza noku lirova.

⁹Kandi nda tsia ku ingelosi, ni mu volera ya mpe katabu. Naye ya mbolera, U ka vugule, u ka lie; kandi ka la kola munda mumwo ubululu, navutswa mu munwa gugwo ka la va kanolu kuli ubwuki.

¹⁰Na inze nda vugula katabu mu mukono gwengelosi ni nka lia; kandi ka li mu munwa gwange kanolu kuli ubwuki: navutswa lwa nda mala kulia, munda mwange mwa gwa ubululu.

¹¹Kandi va mbolera, Ga ku dukira kuprofeta kandi ku vandu vanyingi, noku tsihiri tsinyingi, noku tsinimi tsinyingi, noku avami vanyingi.