Read lulogooli Likunula 13 Bible Online

Likunula 13 - lulogooli bible

Likunula 13

¹Yesu: nagwo gwa singira mu muyeke gwenyanza. Kandi nda lola inyama ya senuka kutwula mu inyanza, i veye netsinziga likumi nemitwe gyitano na gyiviri kandi ku tsinziga tsyayo ya li netsisuywa likumi, kandi ku mitwe gyayo ameta gobunyegi.

²Kandi inyama zana ya nda lola ya fwanana ne ingo, nevirenge vyayo vya li kuli vyeduba, kandi munwa gwayo gwa li kuli munwa gweking'ang'a: kandi guyoka gwa gi ha tsingulu tsyayo, nentebe yayo, nelihaana munwa linene.

³Kandi nda lola mutwe gwayo mulala gu duyeywi kuduka likudza; neliduywa lyayo zana kuduka likudza lya honnywa; kandi avomulirova vosi va genyera inyima wenyama zana;

⁴ni va sigamira guyoka, kigira gwa ha inyama lihaana munwa lyayo; kandi va sigamira inyama, ni va vola, Ibwaha u leng'ana noyu inyama? Kandi ibwaha u nyala kulwana naye?

⁵Kandi ya hebwa munwa gu volanga vindu vinene namanyego; kandi ya hebwa munwa kumenya imyeli makumi gane na gyiviri.

⁶Kandi ya kunula munwa gwigwe a nyege Nyasaye, nokunyega lieta lilye, na ha a menyi, navo ava menya migulu.

⁷Kandi ya hebwa kulwana navatakatifu, nokuvaguuta: kandi ya hebwa mu nwa ku tsimpya tsyosi, noku vandu vosi, noku tsinimi tsyosi, noku tsihiri tsyosi.

⁸Navo vosi ava menya mu lirova va la gi sigamira vosi avameta gavo ga vula kung'odwa mu kitabu kyelivamwoyo kyo Mwana Weligondi wiitwa, kutwula lwelirova lya lombwa muse.

⁹Ku vosi mundu na a veye nogutu, a hulire.

¹⁰Ku vosi mundu na a va na a veye mu lilanya, a la lanywa, ku vosi mundu na a va ni yiita nekivavi, a liitwa nekivavi. Yaho niho ha veye ubwikudziri nelisuuvira lyavatakatifu.

¹¹Kandi nda lola inyama yindi yanegira kutwula mu lirova; kandi ya li netsinziga tsiviri kuli mwana weligondi, kandi ya vola nomunwa gwoguyoka.

¹²Kandi a tumekira munwa gwosi gwenyama yokutanga imbiri wa ya zana. Kandi ya kola lirova nava menya mu va sigamire inyama yokutanga, yeliduywa lyelikudza lya honywa.

¹³Kandi a kola vilolekidzu vinene, a duke kwikidza muliru kutwula migulu gu duke ku lirova imbiri wavandu.

¹⁴Kandi a gada ava menya mu lirova kigira vilolekidzu vya ya hebwa tsingulu kukola imbiri wenyama; na a volera ava menya mu lirova, va kole kifwananyi kyenyama ya li neliduywa lyekivavi, ma ni i hona.

¹⁵Kandi ya hebwa tsingulu kugiha mwika, kali kifwananyi kye nyama, kifwananyi kyenyama ki molome, nokukola vosi ava vula kusigamira kifwananyi zana v iitwe.

¹⁶Nayo i kola vosi, avakekeke navanene, avatugi navadaka, avaluhya navatugwa, va hebwe kyokumanyirwa mu mukono mulungi, kinga mu bweni bwavo;

¹⁷kandi si ha li nomundu kali mulala u nyala kugula kindu kinga kugulidza wundi kindu, na a ta li uyu u veye nekyokumanyirwa nakyo ni lieta lyenyama yiyi kinga hesabu yelieta lilye.

¹⁸Mbubwo ubugeeri. U veye nobugeeri a validze hesabu yenyama yiyi; kigira i veye hesabu yomundu: kandi hesabu yeye i veye Tsimia tsitano na indala na makumi gatano na lilala netsisuvi tsitano na indala. (666).