Read lulogooli Likunula 14 Bible Online

Likunula 14 - lulogooli bible

Likunula 14

¹Kandi nda lola, henza, Mwana Weligondi na a singiye ku kigulu kya Zioni, kandi halala naye avandu tsielfu mia na makumi gane na tsine, ava li nelieta lilye kandi lieta lya Dada wewe li ng'odeywi mu bweni bwavo.

²Kandi nda hulira mwoyo gu twula migulu kuli mwoyo gwamadzi manene, kandi kuli mwoyo gwenkupa inene: kandi mwoyo gwa nda hulira gwa li mwoyo gwa va kupa ubukana, va kupa ubukana bwavo:

³kandi vimba kuli lwa li lwimbo luhya imbiri wentebe, kandi imbiri wevilombe vine vi veye mwoyo kandi imbiri wavakulundu: kandi si ha li nomundu wa nyala kwega lwimbo zana na a ta li ku yava tsielfu mia na makumi gane na tsine, yavo ava gulwa mu lirova.

⁴Yava nivo ava vula kukolwa avadamano na avakali; kigira va veye avagyima. Yava nivo ava londanga Mwana Weligondi hosi ha a tsitsanga. Yava va gulwa mu vandu, va ve ubuhya ku Nyasaye kandi ku Mwana Weligondi.

⁵Kandi ububehi si bwa nyoleka mu minwa gyavo; kigira si va veye nekindu kuvo.

⁶Kandi nda lola ingelosi wundi na a buluka hagati hobwerefu, u veye nevangeli yemihiga nemihiga kwilwadzira ava menya mu lirova, tsihiri netsimpya netsinimi navandu;

⁷kandi ya vola nomwoyo munene, Mu tie Nyasaye, kandi mu mwidzominye; kigira inyinga yelikalaga lilye i duke: kandi mu sigamire uyu wa lomba ligulu nelirova nenyanza nevisenukiru vyamadzi.

⁸Kandi wundi ingelosi wa kaviri ya londerera, na a vola, Li gwiye, li gwiye Babuloni lidala linene, lya nwehidza avetsihiri tsyosi iwaini yobutima bwobuheyi bwalyo.

⁹Kandi ingelosi wundi wa kavaka ya va londerera, na a vola nomwoyo munene, Mundu ku vosi na a sigamira inyama yiyi nekifwananyi kyayo, nokubugirira kyokumanyirwa mu bweni bwibwe, kinga mu mukono gwigwe,

¹⁰uyu kandi a la nwa iwaini yobutima bwa Nyasaye, obwetegeki bugira kutsukanywa mu kikombe kyobutima bwibwe; kandi a la saliridzwa nomuliru nekibiridi imbiri wetsingelosi avatakatifu, kandi imbiri wo Mwana Weligondi:

¹¹kandi mwoki gwekivi kyavo gu vuya kuduka mihiga nemihiga; kandi si va veye nelisosa mbasu nobudiku, ava sigamira inyama nekifwananyi kyayo, kandi ku vosi u bugirira kyokumanyirwa kyelieta lyayo.

¹²Yibu nibwo ubwikudziri bwavatakatifu, ava gumira malago ga Nyasaye, nelisuuvira lya Yesu.

¹³Kandi nda hulira mwoyo gwa twula migulu, gu vola, U ng'ode, Va veye nobugasu avakudzu ava kudziranga mu Mwami kutwula kalunu: yee, Roho a volanga, va duke kusosa kutwula mu miyinzi gyavo; kigira miyinzi gyavo gyi londekana navo.

¹⁴Kandi nda lola, henza, lilesi lilavu; kandi ku lilesi zana mulala yikala ku u fwana mwana wa Adamu, a veye netaji yethahabu ku mutwe gwigwe, nenkonono inzogi mu mukono gwigwe.

¹⁵Kandi ingelosi wundi ya twula mu litempeli, na a mu kupira uyu wikala ku lilesi lwanga, na a vola, Leta inkonono yoyo, u gese, kigira kalunu isaa yeligesa i mali kuduka, kigira ligesa lyelirova Iyumi.

¹⁶Kandi uyu wikala ku lilesi yagulula inkonono yeye ku lirova; kandi lirova lya geswa.

¹⁷Kandi ingelosi wundi ya twula mu litempeli lyomigulu, naye kandi ya li nenkonono inzogi.

¹⁸Kandi ingelosi wundi ya twula mu bwali, uyu a veye netsingulu ku muliru kandi ya kupira uyu wa li nenkonono inzogi lwanga, na a mu volera, Leta inkonono yoyo inzogi u halule visaganyi vyomuzabibu gwelirova; kigira mazabibu gagwo gengi ligali.

¹⁹Kandi ingelosi zana yagulula inkonono yeye ku lirova, na a halula muzabibu gwelirova, na a gwagulula mu kinu, kinu kinene kyobutima kya Nyasaye.

²⁰Kandi kinu kya duvulirwa ikyova welidala, kandi amasahi ga twula mu kinu kuduka ku majamu getsiparasi, kuduka tsimaili tsimia tsiviri.