Read lulogooli Likunula 2 Bible Online

Likunula 2 - lulogooli bible

Likunula 2

¹U ng'odere ingelosi welivugana lya Efeso: Yivi nivyo vya uyu u veye netsing'ereng'ani tsitano na tsiviri mu mukono gwigwe mulungi, u gendanga hagati hevinara vyethahabu vitano na viviri vyetsitaya, a volanga:

²Mmanya miyinzi gyigyo nelididikana lilyo, nobwikudziri bubwo, kandi mmanya si u nyala kwikudzira ku vandu vadamano, kandi wa geridza avelanganga avene avatumwa, ava ta li ndiyo, nokuvalola kuva avobubehi;

³kandi wa li nobwikudziri nokwikudzira ku lieta lyange, kandi si wa luha.

⁴Navutswa mbeye nelikuva yili ku ive wa leka ubuyanzi bubwo bwokutanga.

⁵Kigira yaga widzulitse ha wa twula ni waguluka, nokweganira wirane kukola miyinzi gyembiri; kinga ndadza ku ive, nokutwulidza kinara kikyo kyetsitaya ha ki veye nu u vula kweganira

⁶Navutswa u veye nelikuva yili, ive u dunyiranga miyinzi gya Vanikolai ava inze mwene ndunyira.

⁷U veye nogutu, a hulire ga Roho a voleranga mavugano. Uyu u guutanga, nda mu ha a duke kulia agomusala gwelivamwoyo, gu veye mu Paradisio mwa Nyasaye.

⁸Kandi u ng'odere ingelosi welivugana li veye mu Simurina. Yivi nivyo vya uyu u veye litanga nekiheri, wa gwa mukudzu, na a va mwoyo kandi a volanga:

⁹Mmanya lidambidzwa lilyo, nobudaka bubwo (navutswa u veye mutugi), kandi mmanya linyega lya yavo avevolanga va veye Avayuda, navutswa si va li ndiyo, navutswa va veye avelivugana lya Setani.

¹⁰U ta tia vindu vvenya kukugwira: henza Ibilisi a veye himbi kuvika valala ku mwinye mu buhambe, mu duke kugeridzwa, kandi mu la va nelidambidzwa madiku likumi, U ve musuuvirifu kuduka likudza, na inze nda ku ha itaji yelivamwoyo.

¹¹Uyu u veye nogutu, a hulire aga Raho a voleranga mavugano. Uyu u guutanga si a la nyola kivi kyelikudza lya kaviri.

¹²Kandi u ng'odere ingelosi welivugana li veye mu Perigamo. Yivi nivyo vya uyu u veye nekivavi kyogi kyetsimbega tsyombi, a volanga:

¹³Mmanya ha u menya, ha veye ha intebe yobwami ya Setani i veye; na ive u gumira ligali lieta lyange, nokuvula kwambakana lisuuvira lyange, kali mu madiku ga Antipa mulolekidzi wange, musuuvirifu wange, wiitirwa hagati henyu ha Setani a menya.

¹⁴Navutswa mbeye namakuva makekeke ku ive, kigira u veye navo ava gumiranga megidzo ga Balaam wegidza Balaki a te lyekigitalidza imbiri wavana va Israeli, va lie vindu vi viitirangwa misambwa, nokutsia mbakana.

¹⁵Kandi ndiyo u veye navandi ava gumiranga megidzo aga Vanikolai ku lugano zana.

¹⁶Kunangwa weganire, kinga nu u va nu u teganira nda duka ku ive bwangu, nokukola lihe kuvo nekivavi kyomunwa gwange.

¹⁷Uyu u veye nogutu, a hulire likuva lya Roho a voleranga mavugano. Uyu u guutanga nda mu ha mana i viseywi, kandi nda mu ha ligina lilavu, li ng'odeywi ku lieta lihya, lya u vula ho mundu u manyi, na a ta li uyu u hebeywi.

¹⁸Kandi u ng'odere ingelosi welivugana li veye Tuatera. Yivi nivyo vyo Mwana wa Nyasaye uyu u veye netsimoni kuli lumemo lwomuliru, netsinduvatiru tsitsye kuli mugasa gu siyeywi igali, a volanga:

¹⁹Mmanya mirinzi gyigyo, nobuyanzi bubwo, neisuuvira lilyo, nobukonyi bubwo, nobwekudziri bubwo, kandi miyinzi ryigyo gyenyima gyi viti gyembiri.

²⁰Navutswa mbeye nelikuva yili ku ive, u bugirira ku mukali uyo Jezebeli, welanga mwene muprofeti kandi yegidzanga nokugotidza avatugwa vange kutsia mbakana, nokulia vindu viitirangwa misambwa.

²¹Kandi nda mu ha inyinga a duke kweganira; naye si yenya kweganira nokuleka litsia mbakana.

²²Henza, mmu tedzanga ku kitali, navo vosi ava kolanga ubuheyi naye mu kivi kinene ni va teganira nokuleka miyinzi gyigye.

²³Na inze ndiita avana veve nelikudza; kandi mavugano gosi ga la manya inze mbeye uyu u ligulanga mu vikenge nemyoyo: na inze nda ha mundu sa mulala ku mwinye kuli miyinzi gyenyu.

²⁴Navutswa mbolera mwinye ava tigaye mu Tuatera, kuduka vosi ava ta veye namegidzo yaga, na va vula kumanya vindu vya Setani vyomu luliva, kuli vya va volanga; si nda vika ku mwinye musigo gundi.

²⁵Navutswa kya mu veye nakyo mu ki gumire, kuduka lwa ndidza.

²⁶Uyu u guutanga, kandi uyu u lindanga miyinzi gyange kuduka kiheri, nda mu ha tsingulu ku tsihiri;

²⁷naye a la vameha nempimbo yekivya, kuli vindu vyomulongi vya tanyanngwa; kandi kuli inze nda vugula ku Dada wange:

²⁸kandi nda mu ha ing'ereng'ani ya mugamba.

²⁹Uyu u veye nogutu, a hulire aga Roho a voleranga mavugano.