Read lulogooli Likunula 20 Bible Online

Likunula 20 - lulogooli bible

Likunula 20

¹Kandi nda lola ingelosi yika kutwula migulu, a veye nolufunguo lwobogo kandi munyororo munene mu mukono gwigwe.

²Kandi ya gumira guyoka, inzoka ya kale, ogu veye Ibilisi, Setani, na a mu boha mihiga elfu,

³nokumuvika mu bogo, na a bu kunika, na a vika kuye muhuri, a vule kugada tsihiri kandi kuduka mihiga elfu gyi fweye: inyima wagyo ga mu dukira a bohololwe inyinga inkekeke.

⁴Kandi nda lola tsintebe, navo avikala kutsyo, va hebwa likalaga; kandi nda lola myoyo gya yavo ava kalagwa mitwe kigira lilolekidza lya Yesu, kandi kigira likuva lya Nyasaye, kandi gya yavo ava vula kusigamira inyama, kinga kifwananyi kikye, kandi va vula kuvugula kyokumanyirwa mu bweni bwavo, kinga mu makono gavo; navo va veye mwoyo, nokwameha halala na Kristo mihiga elfu.

⁵Avandi avakudzu va vula kuva mwoyo kuduka mihiga elfu gyi fweye. Yili nilyo lisimugukidzwa lyokutanga.

⁶A veye nobugasu nobutakatifu uyu u veye nelisanga mu lisimugukidzwa lyokutanga: ku yavo likudza lyakaviri si li veye netsingulu; navutswa va la va avasalisi va Nyasaye nava Kristo, kandi va lameha halala naye mihiga elfu.

⁷Kandi inyinga mihiga elfu gyi fweye, Setani a la bohololwa a twule mu buhambe bwibwe,

⁸nokutsia kyova kugada avetsihiri tsi veye mu tsikorna tsine tsyelirova, Goga na Magoga, a va vungidze ku lihe yilyo; livalidzwa lyavo li veye kuli muyeke gwenyanza.

⁹Kandi vanegira mu bubambalalu bwelirova, ni va kumbiridza amasa gavatakatifu nelidala lya yanzwa: kandi muliru gwika kutwula migulu gwa va lia.

¹⁰Kandi Ibilisi wa va gada ya tebwa mu inyanza yomuliru neyekibiridi, ha inyama nomuprofeti wobubehi va veye; navo va la saliridzwa mbasu nobudiku kuduka mihiga nemihiga.

¹¹Kandi nda lola intebe inene indavu, noyu wikala ku, welirova neligulu viruka mumoni mwimwe; kandi si ha nyoleka hokumenya havyo.

¹²Kandi nda lola avakudzu, avanene navakekeke, va singiye imbiri wentebe; kandi vitabu vya kunulwa: kandi kitabu kindi kya kunulwa, ki veye kyelivamwoyo: kandi avakudzu va kalagirwa kuli vindu vya ng'odwa mu vitabu yivi, kuli miyinzi gyavo.

¹³Kandi inyanza ya twulidza avakudzu ava li muyo; kandi likudza na Kihadisi vya twulidza avakudzu ava li muvyo: kandi va kalagirwa sa mulala kuli miyinzi gyavo.

¹⁴Kandi likudza na Kihadisi vya tebwa mu inyanza yomuliru. Yili nilyo likudza lya kaviri; li Deye inyanza yomuliru.

¹⁵Kandi ku vowa vula kung'odwa mu kitabu kyelivamwoyo, ya tebwa mu inyanza yomuliru.