Read lulogooli Likunula 21 Bible Online

Likunula 21 - lulogooli bible

Likunula 21

¹Kandi nda lola ligulu lihya nelirova lihya: kigira ligulu lyokutanga nelirova lyokutanga li mali kuvita; kandi inyanza si i veye ho kandi.

²Kandi nda lola lidala litakatifu, Yerusalemi lihya, liikanga kutwula migulu wa Nyasaye li tegekeywi kuli mwiha wesiahiye musatsa wewe.

³Kandi nda hulira mwoyo munene gu twula mu intebe, ni gu vola, Henza, ubumenyo bwa Nyasaye bu veye halala navandu, kandi a la menya navo, navo va la va avandu veve, kandi Nyasaye mwene a la va halala navo, Nyasaye wavo:

⁴kandi a leya vosi sa mulala amaliga mu tsimoni tsyavo; nelikudza si li la va ho kandi; kandi lisyoma, nelilira, nobusaliri, si vi la va ho kandi: vindu vyokutanga vi mali kuvita.

⁵Kandi uyu wikaye ku intebe ya vola, Henza, inze nkola vindu vyosi vi ve vihya. Kandi ya mbolera, Ng'oda: kigira amakuva yaga ga veye agobusuuvirifu nageligali.

⁶Kandi ya mbolera, Ga koleywi. Inze mbeye Alfa na Omega, litanga nekiheri. Inze nda ha wobuluhu kisenukiru kyamadzi gelivamwoyo, a nwe ku vutswa.

⁷Uyu u guuta a la lia vindu yivi; kandi nda va Nyasaye wewe, naye a la va mwana wange.

⁸Navutswa ava veye nobutii, nava ta suuvira, nava vihiriridzi, naviiti, navaheyi, navakumu, nava sigamira misambwa, navobubehi vosi, lisanga lyavo li la va mu inyanza i sambanga muliru nekibiridi; i veye likudza lyakaviri.

⁹Yadza mulala ku tsingelosi vatano na vaviri ava li nevituva vitano na viviri, vizula maduywa gatano na gaviri gekiheri; kandi ya volerana na inze, na a vola, Hamba yino, nda ku mannya mwiha, mukali wo Mwana Weligondi.

¹⁰Kandi ya ngingira mu Roho kumbila mu kigulu kinene kandi kitambi, kandi ya mmannya lidala yilyo litakatifu Yerusalemi, liika kutwula migulu wa Nyasaye:

¹¹lya li nobukumi bwa Nyasaye: ubung'ereng'anu bwalyo bwa li kuli ligina lilahi ligali kuli bweligina lyejasipi li siye ku kuli ubulengeru:

¹²lya li nelidigi linene kandi litambi; kandi lya li neviribwa likumi na viviri, kandi ha viribwa ha li netsingelosi likumi na vaviri; kandi ameta ga ng'odwa ku, aga li ameta getsihiri likumi na tsiviri tsyavana va Israeli:

¹³ha luvega lwevugwe ha li neviribwa vivaka; kandi ha luvega; lwa ka sikasini viribwa vivaka; kandi ha luvega lwa kusini viribwa vivaka; kandi ha luvega lwemadioli viribwa vivaka.

¹⁴Kandi lidigi lyelidala zana lya li nemise likumi na gyiviri, kandi ku mise ga li ku ameta likumi na gaviri gavatumwa likumi na gaviri vo Mwana Weligondi.

¹⁵Kandi uyu wa volerana na inze ya li nekyo kugera kidundu kyethahabu kyokugera lidala, neviribwa vyalyo, nelidigi lyalyo.

¹⁶Kandi lidala li veye netsimbega tsine, kandi ubutambi bwalyo bu leng'ana nobubambalalu bwalyo: kandi ya gera lidala neki dundu, tsimaili tsya duka elfu indala na tsimia tsitano: ubutambi bwalyo nobubambalalu bwalyo nobudiguluku bwalyo bwa leng'ana.

¹⁷Kandi ya gera lidigi lyalyo, lya duka mikono mia indala namakumi gane na gyine, kigero kyomundu, ki veye kyengelosi uyu.

¹⁸Kandi lyombakwa lyelidigi lyalyo lya li lyejasipi: kandi lidala zana lya li lyethahabu inzere, kuli ubulengeru bwere.

¹⁹Imise gyelidigi gyelidala gya siafwa namagina tsing'ano tsyosi tsindahi. Muse gwokutanga gwa li ijasipi; gwa kaviri isafiro; gwa kavaka ikalkedoni; gwa kane zumaradi;

²⁰gwa katano sardaniki; gwa katano na mulala isadio; gwa katano na gyiviri ikerusoliso; gwa katano na gyivaka iberulo; gwa katano na gyine itopazi; gwelikumi ikerusopraso; gwelikumi na mulala kuakinso; gwelikumi na gyiviri amesusito.

²¹Kandi viribwa likumi na viviri vya li tsilulu likumi na tsiviri; kiribwa sa kilala kya li ilulu indala; kandi inzira yelidala ya li yethahabu inzere, kuli ya li yobulengeru.

²²Kandi si nda lola mu litempeli: kigira uyu Mwami Nyasaye Wanyala Vyosi, kandi uyu Mwana Weligondi, va veye litempeli lyalyo.

²³Kandi lidala zana si li veye nelyenya liuva, kinga mweli, okwaaka kulyo: kigira ubukumi bwa Nyasaye bwa li lavidza, kandi itaya yalyo i veye Mwana Weligondi.

²⁴Kandi tsihiri tsi la genda mu bulavu bwalyo: navami velirova va leta ubukwni bwavo mulyo.

²⁵Kandi viribwa vyalyo si vi li hanwa mba mbasu (kigira si ha la va ho nobudiku):

²⁶kandi va la leta ubukumi nelidzominya lyetsihiri mulyo:

²⁷kandi ku vyosi ki veye kinyaviru, kandi uyu u kolanga livihiriridza nobubehi si va lingira mba: navutswa yava ava ng'odua mu kitabu kyelivamwoyo.