Read lulogooli Likunula 22 Bible Online

Likunula 22 - lulogooli bible

Likunula 22

¹Kyo Mwana Weligondi. Kandi ya mmannya mugera gwamadzi gelivamwoyo, mang'ereng'anu kuli ubulengeru, gu senukanga mu intebe ya Nyasaye neyo Mwana Weligondi,

²hagati henzira yalyo. Kandi ku luvega yili lwomugera zana noku luvega yilwo gwa li ho musala gwelivamwoyo, gwamanga makuyu ting'ano likumi na tsiviri, gwamanga makuyu gagwo ku mweli nomweli: kandi amatu gomusala zana ga veye gokuhonnya tsihiri.

³Kandi si ha la va nelilaama kandi: kandi intebe ya Nyasaye neyo Mwana Weligondi i la va mu: kandi avatugwa veve va la mu tumekira;

⁴kandi va la lola mumoni mwimwe; kandi lieta lilye li la va mu bweni bwavo.

⁵Kandi ubudiku si bu la va ho kandi mba; kandi si va veye nelyenya ubulavu bwetaya, kinga ubulavu bweliuva; kigira Mwami Nyasaye a la va laviranga: kandi va lameha mihiga nemihiga.

⁶Kandi ya mbolera, Amakuva yaga ga veye masuuvirifu nageligali: kandi Mwami, Nyasaye wemyoyo gyavaprofeti, ya tuma ingelosi wewe kumannya avatugwa veve vindu vya ga dukira kuva ho bwangu.

⁷Kandi henza, Nzidza bwangu. A veye nobugasu u gumiranga amakuva gobuprofeti bwekitabu yiki.

⁸Kandi inze Yohana mbeye uyu wa hulira nokulola vindu yivi. Kandi inyinga nda hulira nokulola, nda gwa hasi kusigamira ha virenge vyengelosi wa mannya inze vindu yivi.

⁹Kandi ya mbolera, Henza u ta kola ndi mba: Inze mbeye wakyo kandi wavamwavo vovo avaprofeti, nowa yavo ava gumiranga amakuva gekitabu yiki: sigamira Nyasaye.

¹⁰Kandi ya mbolera, U ta vika muhuri ku makuva gobuprofeti bwekitabu yiki; kigira inyinga i veye himbi.

¹¹U veye mukyamu a kole ubukyamu bundi: u veye wekifwabwi a kole kifwabwi kindi: u veye mulungi a kole ubulungi bundi: uyu u veye mutakatifu a kolwe mutakatifu kandi.

¹²Henza, nzidza bwangu; mbeye kandi namadanyi gange halala, kutunga mundu sa mulala kuli miyinzi gyigye gyi veye.

¹³Inze mbeye Alfa na Omega, wokutanga nowekiheri litanga nekiheri.

¹⁴Va veye nobugasu avogidzanga tsingubo tsyavo, va duke kuva netsingulu kuduka ku musala gwelivamwoyo, nokwingira mu viribwa kuduka mu lidala.

¹⁵Ikyova tsi veye ho tsimbwa, navakumu, navaheyi, naviiti, nava sigamira misambwa, na vosi ava yanzanga nokukola ububehi.

¹⁶Inze Yesu ntumi ingelosi wange a lolekidzire mwinye vindu yivi mu mavugano. Inze mbeye kitinya nekisukululwi kya Daudi, ing'ereng'ani yobung'ereng'anu yomugamba

¹⁷Kandi Roho nomwiha va vola, Hamba. Kandi uyu u huliranga a vole, Hamba. Kandi uyu u veye nobuluhu yadze: kandi uyu wenyanga a vugule vutswa amadzi gelivamwoyo.

¹⁸Ndolekidziranga mundu sa mulala u huliranga amakuva gobuprofeti bwekitabu yiki, Ku vosi mundu na a va na a ga meda, Nyasaye a la meda kuye maduywa aga ng'odwa mu kitabu yiki:

¹⁹kandi ku vosi mundu na a va na a twulidza ku makuva gekitabu kyobuprofeti yibu, Nyasaye a la twulidza lisanga lilye ku musala gwelivamwoyo, nomu lidala litakatifu, vi ng'odeywi mu kitabu yiki.

²⁰U lolekidzanga vindu yivi a vola, Yee: nzidza bwangu. Amini: udze, Mwami Yesu.

²¹Tsimbabasi tsyo Mwami Yesu tsi ve halala navatakatifu. Amini.