Read lulogooli Likunula 8 Bible Online

Likunula 8 - lulogooli bible

Likunula 8

¹Inyinga ya boholola muhuri gwegyitano na gyiviri, ha li nelikiring'ana migulu kuduka inyinga kuli inusu yesaa.

²Kandi nda lola tsingelosi vatano na vaviri ava singiranga imbiri wentebe ya Nyasaye; na va hebwa visiliva vitano na viviri.

³Kandi ingelosi wundi yadza na a singira imbiri wobwali, wekituva kyethahabu; kandi ya hebwa kimuli kinyingi a duke kumeda nakyo lisaala lyavatakatifu vosi ku bwali bwethahabu obwa li imbiri wentebe.

⁴Na mwoki gwekimuli, halala nelisaala lyavatakatifu, gwanegira imbiri wa Nyasaye kutwula mu mukono gwengelosi.

⁵Kandi ingelosi uyu ya vugula kituva; ni yizulitsa ku muliru gwobwali, kandi ya gu sundula ku lirova: kandi ha li netsinkupa, nemyoyo, netsimpeni, nelidegera lyelirova.

⁶Kandi tsingelosi vatano na vaviri ava li nevisiliva vitano na viviri vetegeka va kupe visiliva.

⁷Kandi ingelosi wokutanga ya kupa kisiliva, kandi ha li nembula yamagina nomuliru vya tsukanywa namasahi, ni vi tsukwa ku lirova: kidieli kilala ku vivaka kyelirova kya bya, kandi kidieli kilala ku vivaka kyemisala kya hya, kandi ubulimu bwosi ubuvisi bwa hya.

⁸Kandi ingelosi wa kaviri ya kupa, kya li ho kindu kuli kigulu kinene kyaaka muliru kya sikiswa mu inyanza: kidieli kilala ku vivaka vyenyanza kya gwa masahi;

⁹kandi kidieli kilala ku vivaka vyevilombe vi veye mu inyanza vi veye mwoyo, kya kudza; kandi kidieli kilala ku vivaka vyobwato kya dividzwa.

¹⁰Kandi ingelosi wa kavaka ya kupa, ing'ereng'ani inene yaguluka kutwula migulu, yaaka kuli lumuli, kandi ya gwa ku kidieli kilala ku vivaka vyemigera noku busenukiru bwamadzi;

¹¹lieta lyeng'ereng'ani zana li veye Kilulu; kandi kidieli kilala ku vivaka vyamadzi kya gwa kilulu; navandu avanyingi va kudza kigira amadzi yaga, kigira ga kolwa malulu.

¹²Kandi ingelosi wa kane ya kupa, kidieli kilala ku vivaka vyeliuva kya duywa, kandi kidieli kilala ku vivaka vyomweli, kandi kidieli kilala ku vivaka vyetsing'ereng'ani; kidieli kilala ku vivaka ki gwe kisundi, kandi mbasu gu vule kuva ubulavu ku kidieli kyabwo kilala ku vivaka, nobudiku kandi ndiyo.

¹³Kandi nda lola nokuhulira indidzu indala ni i buluka hagati homigulu ni i vola nomwoyo munene, O bayaye, bayaye, bayaye ku vamenyi ku lirova, kigira myoyo gyindi gyekisiliva kyetsingelosi vavaka avenya kukupa.