Read lulogooli Likunula 9 Bible Online

Likunula 9 - lulogooli bible

Likunula 9

¹Kandi ingelosi wa katano ya kupa, na inze nda lola ing'ereng'ani yomigulu ni yaguluka ku lirova: naye ya hebwa lufunguo lwomwanka gwobogo.

²Kandi ya kunula mwanka gwobogo; nomwoki gwa senuka kutwula mu bogo kuli mwoki gwa mahiga manene; liuva nobwerefu vya kolwa kisundi kigira mwoki gwobogo zana.

³Kandi tsisigi tsya twula mu mwoki zana, ni tsi tsia ku lirova; kandi tsya hebwa tsingulu kuli tsing'e tsyelirova tsi veye netsingulu.

⁴Kandi tsya volerwa tsi tononnya ubulimu bwelirova, kinga ku vyosi ki veye kivisi, kinga musala kali mulala, navutswa avandu ava ta veye nomuhuri gwa Nyasaye ku bweni bwavo.

⁵Kandi tsya hebwa munwa tsi ta viita mba, navutswa va saliridzwe imyeli gyitano: nobusaliridzi bwatsyo bwa li kuli ubusaliridzi bweng'e, inyinga i lasanga mundu.

⁶Kandi mu madiku yago avandu va lenya likudza, navutswa si va la li nyola mba kali hakuzu; kandi va la kayirwa likudza navutswa likudza li liruka kuvo.

⁷Lifwana lyetsisigi zana lya li kuli lifwana lyetsiparasi tsi lombeywi kutsia mu bulwani; kandi ku mitwe gyatsyo tsitaji kuli ithahabu, kandi mumoni mwatsyo mwa li kuli mumoni mwavandu.

⁸Kandi tsya li nelisu kuli lisu lyavakali, namino gatsyo kuli amino geving'ang'a.

⁹Kandi tsya li netsisalamba tsyomkiritu kuli tsisalamba tsyekivya; nolwanga lwamavaha gatsyo lwa li kuli lwanga lwamagari, kandi kuli tsiparasi tsinyingi tsi nyagulanga tsimbiru mu bulwani.

¹⁰Kandi tsi veye nemikira kuli tsing'e nemibano gyobusungu; kandi tsingulu tsyatsyo tsyokusaliridza avandu imyeli gyitano tsi veye mu mikira.

¹¹Tsi veye nomwami kutsyo ingelosi wombogo: lieta lilye mu Luhebraina a langwa Abadoni, noku Lugreki Apolion.

¹²Ubudamano bwokutanga bu viti: henza, Ubudamano buviri bu udzanga kandi.

¹³Kandi ingelosi wa katano na mulala ya kupa, na inze nda hulira mwoyo mulala mu tsinziga tsyobwali bwethahabu obu veye imbiri wa Nyasaye,

¹⁴mulala a volera ingelosi wa katano na mulala wa li nekisiliva zana, U boholole tsingelosi vane ava bofwa ha mugera munene Farati.

¹⁵Kandi tsingelosi vane va bohololwa, yava ava lombwa kigira isaa yiyi, nelidiku yili, nomweli yigu, nomuhiga yigu, va duke kwiita kidieli kilala ku vivaka vyavandu.

¹⁶Na hesabu yavandu va nina ku tsiparasi ya li tsielfu likumi hali tsielfu likumi kandi hali kaviri: nda hulira hesabu yavo.

¹⁷Nda lola ndiyo mu malola tsiparasi, kandi avikala kutsyo, va li netsisalamba tsyomkiritu tsyekivya kuli muliru, netsyesamawi netsyekibiridi: mitwe gyetsiparasi gyi veye kuli mitwe gyeving'ang'a; muliru nomwoki nekibiridi vya twula mu minwa gyatsyo.

¹⁸Kidieli kilala ku vivaka vyavandu kiitwa namaduywa yaga gavaka, nago ga veye muliru nomwoki nekibiridi, vya twula mu minwa gyatsyo.

¹⁹Kigira tsingulu tsyetsiparasi zana tsi veye mu minwa gyatsyo, nomu mikira gyatsyo: kigira mikira gyatsyo gyi veye kuli tsinzoka, kandi gyi veye nemitwe; tsisaliridzanga natsyo.

²⁰Kandi avandu ava tigaye, ava vula kwiitwa namaduywa zana, si veganira ku miyinzi gyamakono gavo va vule kusigamira amademone nemisambwa gyethahabu, negyefetha, negyomugasa, negyeligina, negyemisala; gya vula kunyala kulola, nokuhulira, nokugenda:

²¹kandi si veganira ku ubwiiti bwavo, noku bukumu bwavo noku buheyi bwavo, noku bwivi bwavo.