Read lulogooli Ruth 3 Bible Online

Ruth 3 - lulogooli bible

Ruth 3

¹Na Naomi navizala wewe ya mbolera, Mwana wange, si ga a ndukira kukwenyera ho kwelemeridza, u duke kunyola ho bulahi?

²Kandi kalunu Boaz si a veye ho mwiko wetu, wa wa li halala navakana veve? Henza, yilulsnga shairi budiku bwa lero ku lodze.

³Kunangwa wesinge, na wevake maguta, wivike tsingubo tsitsyo, u sulungute ku lodze: navutswa u telang'aminya mwene mundu uyu a ku manye, kuduka lwa va mala kulia nokunwa.

⁴Na ga la va, lwa a gona hasi, u la henza ha a goni, na u lingira mu, nokuvimbula virenge vivye, nokugona ho; naye a la ku volera kya u kola.

⁵Ya volera navizala wewe, Yaga gosi aga u mboleye nda kola.

⁶Naye ya sulunguta ku lodze, na a kola kuli gosi ga navizala wewe ya mu volera.

⁷Na lwa Boaz ya mala kulia nokunwa, nomwoyo gwigwe gwa sangala, ya tsia kugona hanyima hekitumi kyobuswage: nomukali uyu ya tsia galaha, na a vimbula virenge Yi vivye, na a gona ha zana.

⁸Kunangwa ubudiku hagati, mundu uyu ya tia, na a girunkana mwene; henza, mukali a gonanga ha virenge vivye.

⁹Naye ya mu teva, U veye ibwaha? Naye ya tivula, Inze mbeye Ruth mukana mutugwa wowo; vambula ingubo yoyo kufwuma mukana mutugwa wowo, kigira u veye wenyumba ya himbi.

¹⁰Naye ya vi vola, Yahova a gasidze ive mwana wange: u lolekidza ubulahi bwenyima kuvita bwa matsyambiri; kigira si u londa avasoleli mba, ni va li avadaka naho avatugi.

¹¹Kalunu mwana wange, u ta tia mba: nda ku kolera gosi ga u vola: kigira avelidala lyosi lya avandu vange va manya ive u veye mukali welimenya lilahi.

¹²Na geligali mbeye wenyumba ya himbi, navutswa a ve ho mulala wa himbi kuvita inze.

¹³Linda budiku buno, na ga la va mugamba, na a va na a dukidza ku ive ga dukiranga wenyumba ya himbi, nobulahi; a la kola ga dukiranga wenyumba ya himbi: navutswa na a vula kukolera ive ga dukiranga wenyumba ya himbi, hene yaho inze nda ku kolera, kuli Yahova a veye mwoyo: u gone kuduka mugamba.

¹⁴Naye ya gona ha virenge vivye kuduka mugamba; naye ya vuka imbiri wobulavu bu kikiri kuva ho kuduka kulolana. Kigira ya vola, Va ta manya mukali uyu ya duka ku lodze.

¹⁵Naye ya mu volera, Leta ingubo yoyo inziyuhira, u gi gumire; naye ya gi gumira; na ya mu gerera vigero vitano na kilala vyeshairi, na a mu dwika. Na Boaz ya tsia mu lidala.

¹⁶Na lwa Ruth ya duka ku navizala wewe ya teva, U veye ibwaha, mwana wange? Naye ya mu volera gosi gomundu uyu ya mu kolera.

¹⁷Naye ya vola, Ya mbeye vigero yivi vitano na kilala vyeshairi, kigira ya vola, U ta tsia vutswa ku navizala wowo.

¹⁸Naye ya vola, Wikale vutswa, mwana wange, kuduka lwa u manya kuli inkuva yiyi i la loleka; kigira mundu uyu si a la sosa, kuduka lwa a dukidza inkuva yiyi yosi lero.