Read lulogooli 1 Samweli 10 Bible Online

1 Samweli 10 - lulogooli bible

1 Samweli 10

¹Hene yaho Samweli ya vugula kachupa kamaguta, na ya ga tsuka ku mutwe gwigwe, na ya mu busa, na a mu volera, Si ga veye kigira Yahova u ku vaki maguta u duke kuva munene ku miyandu gyigye?

²Lwa u twula ku inze lero, hene yaho u la lola avasatsa vaviri himbi nekilindwa kya Rakeli, mu lwako lwa Benjamini ha Zeliza; navo va la ku volera amakuva yaga, Tsisukiri tsya wa tsia kwenya tsi nyoleki; na, kalunu, dada wowo u leki liganagana tsisukiri, na a ganagananga amakuva genyu, a volanga, Nkola ki ku mwana wange?

³Kunangwa ive u la tsia hambiri kutwula yaho, u la duka ku musala munene ha Taboru, na u la vugana yo navandu vavaka ava tsitsanga Beth-eli kutsia ku Nyasaye, mulala u gingi vimeme vivaka, nowundi u gingi tsimango tsivaka tsyobukima, nowundi u gingi imuya yewaini:

⁴navo va la ku chelidza, na va la kuha tsimango tsiviri tsyobukima, na u la tsi vugula ku makono gavo.

⁵Inyima wa yaga u la duka ku kigulu kya Nyasaye, ha lugaga lwa Vafilisiti lu veye: na ga la va, lwa u duka ku lidala, avaprofeti valala va la vugana nive va sulungutanga kutwula hadiguluku ava veye nelidienyi, nekindu kyolugano lwesuguti, nelilele, nobukana, imbiri wavo; navo va la profeta:

⁶na Roho wa Yahova a ladza ku ive netsingulu, na ive u la profeta halala navo, na u la girunkanywa kuva umundu wundi.

⁷Na ga la va, vilolekidzu yivi lwa vi duka ku ive, u kole kuli u lola bulahi kukola; kigira Nyasaye a veye halala nive.

⁸Na u la sulunguta imbiri wange kutsia Gilgali; na, henza, nda sulunguta yo ku ive, nduke kuhaana kihaanwa kyokusambwa, nokwiita tsisadaka tsyemirembe: u la nindirira madiku gatano na gaviri, kuduka lwa ndidza ku ive, nokukumannya aga u li kola.

⁹Na ga duka, lwa ya girunkana mugongo gwigwe kutwula ku Samweli, Nyasaye ya mu ha mwoyo gundi; nevilolekidza yivi vyosi vya duka lidiku yilyo.

¹⁰Na lwa va duka ha kigulu, henza, avaprofeti va vugana naye; na Roho wa Nyasaye ya duka kuye netsingulu, na ya profeta hagati havo.

¹¹Na ga duka, lwa vosi ava mu manya ku matsyambiri va lola, henza, a proletanga halala navaprofeti; hene yaho avandu va volerana avene navene Ni inkuva i ki yiyi, i duki ku mwana wa Kishi? Saulo a veye mu vaprofeti?

¹²Nomulala wa ha zana ya tivula na a vola, Dada wavo ni bwaha? Kigira yaga ga duka kuva lugano, Saulo a veye mu vaprofeti?

¹³Naye lwa ya mala kuprofeta, ya duka hadiguluku.

¹⁴Na dada wewe muke ya teva uyu nomutugwa wewe, Mwa tsia haliha? Naye ya vola, Kwa tsia kwenya tsisukiri; na lwa kwa lola tsi vuli kunyoleka, kwa tsia ku Samweli.

¹⁵Dada wewe muke ya vola, Mwadza, u mbolere kindu kya Samweli ya ku volera.

¹⁶Na Saulo ya volera dada wewe muke, Ya ku volera habulavu, Tsisukiri tsi mali kunyoleka. Navutswa ku makuva gobwami, aga Samweli ya mu volera, si ya ga vola mba.

¹⁷Na Samweli ya langa avandu va vugane halala imbiri wa Yahova ha Mizipa;

¹⁸na ya volera avana va Israeli, Yahova Nyasaye wa Israeli a vola ndi, Inze ndanegiridza Israeli kutwula Egepeti, na nda honnya mwinye ku makono ga Vaegepeti, noku makono getsihiri tsyosi tsya mu dambidza:

¹⁹navutswa mwinye lero mu suye Nyasaye wenyu, wa honnya mwinye mwene kumutwulidza mu kivi kyenyu kyosi nombuvereri bwenyu; na mu mu voleye, Auwa, navutswa wamehidze mwami ku kwinye. Kunangwa kalunu, mwevungidze avene imbiri wa Yahova kuli tsihiri tsyenyu, ne tsielfu tsyenyu.

²⁰Ma Samweli ya leta tsihiri tsyosi tsya Israeli ahimbi, nehiri ya Benjamini ya vugulwa.

²¹Na ya leta ihiri ya Benjamini himbi kuli ubwiko bwavo; nobwiko bwa Vamatiri bwa vugulwa: na Saulo mwana wa Kishi ya vugulwa: navutswa lwa va mwenya, si ya nyoleka mba.

²²Kigira yaga va desa kuteva Yahova, A veyo mundu wundi u kikiri kuduka hano? Yahova ya tivula, Henza, yivisi mu viju.

²³Na va nyagula kumuleta kutwula ha zana; naye lwa ya singira hagati ha avandu, ya li mutambi kuvita avandi vosi kutwula ku mavega gege kutsia igulu.

²⁴Na Samweli ya volera avandu vosi, Mu lolanga uyu wa Yahova a tovoye, si ha veye nowundi u leng'ana naye mu avandu vosi? Navandu vosi va hanzuka, ni va vola, Nyasaye a linde uyu mwami.

²⁵Hene yaho Samweli ya volera avandu kuli ga la va agobwami, naye ya ga ng'oda mu kitabu, na ya ki vika imbiri wa Yahova. Na Samweli ya sendukidza avandu vosi, sa mulala a tsie mu inyumba yeye.

²⁶Na Saulo kandi ya tsia mu inyumba yeye ha Gibea; navo va tsia halala naye kiduma kyavandu, ava Nyasaye ya dira ku myoyo gyavo.

²⁷Navutswa avandu vandi avekihenyehenye va vola, Mundu uyu a la kuhonnya ndi? Navo va mu lega, na si va mu letera kihaanwa. Navutswa ya kiring'ana.