Read lulogooli 1 Samweli 11 Bible Online

1 Samweli 11 - lulogooli bible

1 Samweli 11

¹Hene yaho Nahashu Muamon yanegira, na a singeridza amahema gege ku Jabesh-gileadi: navandu vosi va Jabesh va volera Nahashu, Lomba lilagana na kwinye, na kwinye ku la ku tumekira.

²Na Nahashu Muamon ya va volera, Mbeye nelisaavira lyange nda lomba lilagana na mwinye, mundu sa mulala imoni yeye yomukono mulungi i hudulwe; na nda vika inkuva yiyi ku Israeli vosi i duke kuva manyego kuvo.

³Navakulundu va Jabesh va mu volera, U ku he ubwiyangu madiku gatano na gaviri, ku duke kutuma avatumwa va tsie mu tsinzako tsyosi tsya Israeli; kunangwa, ni ha vula kuva nomundu u nyala kukuhonnya, ku la twula kudza ku ive.

⁴Kunangwa avatumwa va duka Gibea lya Saulo, na va vola amakuva yaga mu amatu gavandu y avo: navandu yavo vosi va ginga myoyo gyavo, ni va lira.

⁵Na, henza, Saulo yadza a londanga tsing'ombe kutwula mmulimi; na Saulo ya teva, Avandu yavo va veye na ki, kulira ndi? Navo va mu volera amakuva gavandu va Jabesh.

⁶Nonoho lwa ya hulira amakuva yaga Roho wa Nyasaye ya duka ku Saulo netsingulu, nobutima bwibwe bwaaka ligali.

⁷Na ya vugula tsing'ombe tsiviri tsyenira indala, na a tsi donyannya vidonye, na ya hila vidonye zana mu tsinzako tsyosi tsya Israeli mu makono ga vatumwa, na a vola, Ku vosi u vula kutwula nokulonda Saulo na Samweli, tsing'ombe tsitsye tsi la kolwa kuli yaga. Nobutihidzi bwa Yahova bwa gwa ku avandu, na va twula kuli mundu mulala.

⁸Na ya va validza mu Bezeki; navana va Israeli va duka tsielfu hali tsimia tsivaka, navandu va Yuda va duka tsielfu makumi gavaka.

⁹Na va volera vatumwa vadza, Mu la volera ava Jabesh-gileadi amakuva yaga Mugamba, inyinga yornbasu gu duka kuva mululu, mu la va nobuhonnywi. Navatumwa va tsia ni va volera ava Jabesh; navo va sangala.

¹⁰Kigira yaga ava Jabesh va vola, Mugamba ku la twula kuduka ku mwinye, na mu la ku kolera gosi aga mu lola kuva malahi ku mwinye.

¹¹Kunangwa mugamba, Saulo ya gavula avandu viduma vivaka; na vingira hagati hamahema mu bulindi bwomugamba, na va kuya Vaamon kuduka inyinga yombasu gwa lula: na ga duka, yavo va tigala va salanywa, ga luha ga duka vaviri si va tigala halala mba.

¹²Navandu va teva Samweli, Ni bwaha uyu wa vola, Saulo si a lameha ku kwinye? Ieta avandu zana ku duke kuviita.

¹³Na Saulo ya vola, Si ha veye nomundu u nyala kwiitwa lero; kigira lero Yahova u koli ubuhonnyi mu Israeli.

¹⁴Hene yaho Samweli ya volera avandu, Ku tsie Gilgali, na kusingeridze yo ubwami ubuhya.

¹⁵Navandu vosi va tsia Gilgali; na vamehidza Saulo a ve mwami imbiri wa Yahova mu Gilgali; na viita tsisadaka tsyemirembe imbiri wa Yahova; na Saulo navandu vosi va Israeli va sanngala ligali.