Read lulogooli 1 Samweli 12 Bible Online

1 Samweli 12 - lulogooli bible

1 Samweli 12

¹Na Samweli ya volera avandu vosi va Israeli, Henza, mbuliye myoyo gyenyu mu yaga gosi aga mwa mbolera, nzamehidzi mwami ku mwinye.

²Kunangwa kalunu, henzi, mwami a tsitsanga imbiri wenyu; na inze mbeye musakulu wetsimbudze; kandi, henzi, avana vange va veye halala nemwinye: na inze ntsitsanga imbiri wenyu kutwula bwana buke bwange kuduka lero.

³Mbe hano: mu lolekidze ku inze imbiri wa Yahova, na imbiri wombake wewe: neng'ombe ya bwaha ya nda vugula? Kinga nesukiri ya bwaha ya nda vugula? Kinga ni bwaha wa nda ganga? Nda dambidza bwaha? Nda vugula vikukula ku mukono gwa bwaha, kuduka ku vakulidza navyo tsimoni tsyange na nda virannye ku mwinye.

⁴Navo va vola, Si wa ku ganga mba, kinga si wa ku dambidza, kinga si wa vugula kindu ku vyosi ku mukono gwamundu kali mulala.

⁵Naye ya va volera, Uyu Yahova a veye muloli ku mwinye, na uyu mbake wewe a veye muloli lero, mwinye mwa vula kunyola kindu kali kilala mmukono gwange. Ni va vola, A veye muloli.

⁶Na Samweli ya volera avandu, A veye Yahova wa vika Musa na Haruni, niye wanegeridza vaguga venyu va twule mu kivala kya Egepeti.

⁷Kunangwa kalunu mu singire, nduke kwilwadzira mwinye imbiri wa Yahova ku ubulungi bwosi bwa Yahova, bwa ya kola ku mwinye noku vaguga venyu.

⁸Lwa Yakobo yingira Egepeti, navaguga venyu lwa vanira Yahova, hene yaho Yahova ya tuma Musa na Haruni, ava twulidza vaguga venyu va twule Egepeti, na ya va vika hano.

⁹Navutswa vivirira Yahova Nyasaye wavo; naye ya va gulidza na a va vika mmukono gwa Sisera, wa li munene welihe lya Hazoru, nommakono ga Vafilisiti, nommukono gwomwami wa Moabu; na va lwana navo.

¹⁰Na vanira ku Yahova, ni va vola, Kwinye ku koli ubwoni, kigira ku leki Yahova, na ku tumekiye yavo Vabaal na yavo Ashitarothu: navutswa u ku honnyi kalunu ku twule mmakono ga avasigu vetu, na ku la ku tumekira.

¹¹Na Yahova ya tuma Jerubaali, na Bedani, na Jefetha, na Samweli, na ya mu honnya kutwula mmakono gavasigu venyu tsimbega tsyosi; na mwa menya nemirembe.

¹²Na lwa mwa lola Nahashu mwami wavana va Amon a twulira mwinye, mwa mbolera, Auwa, navutswa mwami a lameha ku kwir ye; lwa Yahova Nyasaye wenyu ya li mwami wenyu.

¹³Kunangwa kalunu mu henze mwami wenyu wa mwa tovola, naye niye wa mwenya: na, henza, Yahova u mali kwamehidza mwami ku mwinye.

¹⁴Ni mu va ni mu tia Yahova, nokumutumekira, nokuhulira mwoyo gwigwe, ni mu yula kutinguha ku lilaga lya Yahova, kandi ni mwinye halala nomwami wamehanga ku mwinye ni mu va avalondi va Yahova Nyasaye wenyu, nobulahi:

¹⁵navutswa ni mu va ni mu vula kuhulira mwoyo gwa Yahova, navutswa mu tinguha lilaga lya Yahova, hene yaho mukono gwa Yahova gu la va ku mwinye, kuli gwa li ku vaguga venyu.

¹⁶Kunangwa kalunu mu singire mu lole inkuva yiyi inene, ya Yahova a la kola imbiri wetsimoni tsyenyu.

¹⁷Si i veye ligesa lyengano lero? Inze ndanira Yahova, a duke kuleta inkupa nembula; na mwinye mu la manya nokulola ubudamano bwenyu bu veye bunene, bwa mwa kola imbiri wetsimoni tsya Yahova, mu lyenya umwami.

¹⁸Ma Samweii yanira Yahova; na Yahova ya leta tsinkupa nembula lidiku yilyo: navandu vosi va tia Yahova ligali, na Samweli.

¹⁹Navandu vosi va volera Samweli, U saalire kwinye avatumekiri vovo ku Yahova Nyasaye wowo, ku vule kukudza; kigira ku medi ku bwoni bwetu bwosi, ubudamano yibu, bwokweyenyera kwinye avane, umwami.

²⁰Na Samweli ya va volera, Mu ta tia mba: ligali mu koli ubudamano yibu bwosi; navutswa mu ta leka Yahova, nokugirunkana kuvula kumulonda, navutswa mu tumekire Yahova nomwoyo gwenyu gwosi:

²¹mu ta girunkana ha luvega; kigira inyinga yeyo mu la londa vindu vya vutswa, vi ta nyala kumukonya, kinga kumuhonnya, kigira ni vya vutswa.

²²Kigira Yahova si a la leka avandu veye kigira lieta lilye linene, kigira ya yanzidza Yahova kukola mwinye mu ve avandu veve mwene.

²³Halala na yaga, ga ta va ku inze kukolera Yahova ubwoni ku lileka kusaalira mwinye: navutswa nda mwegidza mu inzira indahi nenungi.

²⁴Mu tie Yahova, yaga geng'ine nokumutumekira ligali nomwoyo gwenyu gwosi; kigira mwidzulitse vindu vinene ndi vya ya mu kolera.

²⁵Navutswa ni mu va ni mu hongera kukola vidamano, mu la dividzwa, mwinye nomwami wenyu halala.