Read lulogooli 1 Samweli 13 Bible Online

1 Samweli 13 - lulogooli bible

1 Samweli 13

¹Saulo ya li na a duki mundu wemihiga (makumi gane) lwa y a tanga kwameha; naye yamela mihiga giviri ku Israeli,

²na Saulo yetovolera avandu avasatsa tsielfu tsivaka va Israeli; kuvo tsielfu tsiviri va li halala na Saulo ha Mikimashi no mu kigulu kya Beth-eli, na elfu indala va li halala na Jonathan mu Gibea ya Benjamini: navandu va tigala ya va hila sa mulala mu lihema lilye

³Na Jonathan ya duya lihe lya VafiIisiti lya li mu Geba; na Vafilisiti va hulira. Na Saulo ya kupa kisiliva mu kivala kyosi, na a vola, Vahebraina va hulire.

⁴Na Israeli vosi va hulira, Saulo u duyi lihe lyo lugaga lya Vafilisiti, na Israeli va li ni va veye livihiriridza ku Vafilisiti. Navandu va li ni va vugani halala kulonda Saulo kutsia Gilgali.

⁵Na Vafilisiti va vugana halala kulwana na Israeli, magari tsielfu makumi gavaka, na va nina tsiparasi tsielfu tsitano na indala, halala navandu kuli muyeke gu veye ku luginga lwenyanza, kigira va li vanyingi ligali; navo vanegira, ni va singeridza mahema gavo ha Mikimashi, ku luvega lwevugwi wa Beth-aven.

⁶Lwa avandu va Israeli va lola va veye mu kivi (kigira avandu va hendidzwa mwoyo), hene yaho avandu vivisa mu tsimbangaywa, nommulitu, nommagina, nombogo, nommalina.

⁷Navandi kuvo Vahebraina vambuka Yordani nokwingira mkivala kya Gadi na Gileadi; navutswa ku amakuva ga Saulo, lwa kikiri Gilgali, navandu yavo vosi va mu londa yo ni va degera.

⁸Na ya linda madiku gatano na gaviri, kuli inyinga ya Samweli ya mu laga: navutswa Samweli si yadza Gilgali; navandu va li ni va salani kutwula ku Saulo.

⁹Na Saulo ya vola, Ndeteri hano kihaanwa kyokusambwa, nevihaanwa vyemirembe Naye ya haana kihaanwa kyokusamb va.

¹⁰Na ga duka, lwa ya mala kuhaana kihaanwa kyokusambwa, henza, Samweli ya loleka; Saulo va twula kutsia kumwaganira, a duke kumukyelidza.

¹¹Na Samweli ya mu teva, Ive u koli ki? Saulo ya mu volera, Kigira nda li kulola avandu ni va salani kutwula ku inze, kandi ive si wadza mu madiliu ga lagwa, kandi Vafilisiti va vugana halala ha Mikimashi,

¹²kigira yaga nda vola, Kalunu Vafilisiti va liika ku inze, kuduka Gilgali, na nkikiri kusaala tsimbabasi ku Yahova: kunangwa ndeniga, kigira yaga, nokuhaana kihaanwa kyoku sambwa.

¹³Na Samweli ya volera Saulo, Wa kola ubusiru; kigira wa vula kugumira lilaga lya Yahova Nyasaye wowo, lya ya ku laga; kigira kalunu Yahova ngano u dinyiridzi ubwami bubwo ku Israeli mihiga nemihiga.

¹⁴Navutswa kalunu ubwami bubwo si bu la menya mba: Yahova yenyanga mundu wolugano lwamwoyo gwigwe mwene, na Yahova u lagi uyu a ve munene ku avandu veve, kigira ive wa vula kugumira kya Yahova ya ku laga.

¹⁵Na Samweli ya singira, na a twula ha Gilgali na a tsia Gibea ya Benjamini. Na Saulo ya validza avandu va veye halala naye, va duka kuli avandu tsimia tsitano ne indala.

¹⁶Saulo, na Jonathan mwana wewe, halala navandu va li ho, va menya mu Geba ya Benjamini; navutswa Vafilisiti va singeridza mahema gavo ha Mikimashi.

¹⁷Na avalanyi va twula mu mahema ga Vafilisiti mu viduma vivaka: kiduma kilala kya girunkana kulonda inzira i tsitsanga Ofira, mu kivala kya Shuali,

¹⁸nekiduma kindi kya girunkana kugumira inzira ya tsitsanga Beth-horon; nekiduma kindi kya girunkana kugumira inzira yolwako ku luvega lwe livona lya Zeboim ku luvega lweligendanyama.

¹⁹Inyinga yeyo si ha li nomutuuli mu kivala kyosi kya Israeli; kigira Vafilisiti va vola, Gase Vahebraina va la lomba vivavi namatimu:

²⁰navutswa Vaisraeli vosi va sulunguta ku Vafilisiti, va duke kuhyagala sa malala imbago yeye, nomuhidzu gwigwe, nembadzi yeye namatoko (imbako yetsimbega tsiviri);

²¹navutswa va veye netupa kuhyagalira matoko nemihidzu, na uma, netsimbadzi noluiwa.

²²Na ga duka mu lidiku lyobulwani, si ha loleka kivavi, kinga litimu mmukono gwomundu kali mulala mu avandu va li halala na Saulo na Jonathan: navutswa Saulo mwene na Jonathan mwana wewe va li navyo.

²³Nelihe lya Vafilisiti lya twula kuduka mulumbatania lwa Mikimashi.