Read lulogooli 1 Samweli 15 Bible Online

1 Samweli 15 - lulogooli bible

1 Samweli 15

¹Ma Samweli ya volera Saulo, Yahova ya ntuma kukuvaka maguta u ve mwami ku avandu veve, ku Israeli: kunangwa kaluny u hulire mwoyo gwa makuva ga Yahova.

²Yahova wamahe a vola ndi, Inze mbiki mu mwoyo gwange vya Vaamaleki ya kolera Israeli, kuli yesingeridza mwene kuye ku inzira, lwa yanegira kutwula mu kivala kya Egepeti.

³Kalunu u tsie ku kuya Vaamaleki, nokudividza ligali vyosi vya va veye navyo, mu ta va vererera mba; navutswa wiite musatsa nomukali, mwana na u nunanga, ing'ombe neligondi, ing'amia nesukiri.

⁴Na Saulo ya langa avanodu, na a va validza mu Telaim, avasikari ava genda nevirenge tsielfu tsimia tsiviri, navandu va Yuda tsielfu likumi.

⁵Na Saulo ya duka ku lidala lya Vaamaleki, na a goneka mwivona.

⁶Na Saulo ya volera Vakeni, Mu singire, mu tsie, mu sulungute kutwula hagati ha Vaamaleki, gase ndononnya mwinye halala navo; kigira mwinye mwa kolera avana va Israeli vosi bulahi, lwa vanegira kutwula mkivala kya Egepeti. Ma Vakeni va twula hagati ha Vaamaleki.

⁷Na Saulo ya kuya Vaamaleki, kutwula Havila hokutsia Shur, li veye mbiri wa Egepeti.

⁸Na ya gumira Agagi mwami wa Vaamaleki na a veye mwoyo, na ya dividza avandu vosi nobwogi bwekivavi.

⁹Navutswa Saulo navandu va leka Agagi mwoyo, namagondi aga li amalahi, netsindahi ku tsing'ombe, nevilahi ku vinetu, noku vana vamagondi, na vyosi vi veye vilahi, si va bugirira kuvidividza ligali: navutswa ikindu sa kilala ki ta duka, nevidamano, yivi va vyononnya ligali.

¹⁰Inyinga yeyo likuva lya Yahova lya duka ku Samweli, li volanga,

¹¹Inze nzeganiye kigira nda singeridza Saulo a ve mwami; kigira ya girunkana na a leka kunonda, na si ya dukidza malago gange. Na Samweli ya vererera; na yanira Yahova budiku bei.

¹²Na Samweli ya vuka mugamba mabwebwe a duke kulolana na Saulo; na Samweli ya volerwa, Saulo ya duka Karimeli, na, henza, wisingeridziye kyokwidzulitsa, na u girunkani, nokuvita, nokusulunguta Gilgali.

¹³Ma Samweli ya duka ku Saulo: na Saulo ya mu volera, Yahova u gasidze ive: inze mmali kudukidza amalago ga Yahova.

¹⁴Na Samweli ya mu teva, Liyana lyamagondi mmatu gange, li veye kigira ki, neliyana lyetsing'ombe lya mbuliranga?

¹⁵Na Saulo ya vola, Yavo va tsi leta kutwula ku Vaamaleki: kigira avandu yavo va tsi leka mwoyo magondi netsing'ombe tsya li tsindahi, va duke kwiitira Yahova Nyasaye wavo isadaka: netsindi kwa tsi dividza ligali.

¹⁶Hene yaho Samweli ya volera Saulo, Linda, nda ku volera likuva lya Yahova a mboleye budiku bwa lero. Naye ya mu volera, Vola.

¹⁷Na Samweli ya vola, Kali nu u veye mukekeke mu tsimoni tsitsyo ive mwene, si wa lyamehidzwa kuva mutwe ku tsihiri tsva Israeli? Na Yahova ya ku vaka maguta kuva mwami ku Israeli;

¹⁸na Yahova ya ku tuma kutsia ku lugendo, na ya ku volera, U tsie kudividza ligali avobwoni Vaamaleki, ulwane navo kuduka kuvaheridza ligali.

¹⁹Kunangwa kigira ki si wa hulira mwoyo gwa Yahova, navutswa wa tuuma ku vilanye, nokukola gobudamano imbiri wa Yahova?

²⁰Na Saulo ya volera Samweli, Yee, mbuliye mwoyo gwa Yahova, na nondi ku inzira ya Yahova ya ntuma ku, na mali kuleta Agagi mwami wa Vaamaleki, na ndividzi ligali Vaamaleki.

²¹Navutswa avandu va vugula ku vilanye, amagondi netsing'ombe, tsya li tsindahi mu vindu vya duka kwononywa, kuhaana ku Yahova Nyasaye a wowo kihaanwa ha Gilgali.

²²Na Samweli ya vola, Yahova a veye neliyanza vihaanwa vyokusambwa nevisyuviriru, kuli a yanza lihulira umwoyo gwa Yahova? Henza, lihulira li veye lilahi kuvita vihaanwa, nelihuliridza li veye lilahi kuvita itinya yamagondi makole.

²³Kigira ubutingu bu veye kuli ubwoni bwobulogi, nobudinyu bwomwoyo bu veye kuli kusigamira misambwa nevifwananyi. Kigira ive wa sula likuva lya Yahova, naye u suye ive u vule kuva mwami.

²⁴Na Saulo ya volera Samweli, Inze nkoli ubwoni; kigira ndononnya lilaga lya Yahova, namakuva gogo, kigira nda tia avandu, nokuhulira mwoyo gwavo.

²⁵Kunangwa kalunu, nku goonya, mwadza, u samehe bwoni bwange, wirane halala ninze, nduke kusigamira Yahova.

²⁶Na Samweli ya volera Saulo, Inze si ndirana halala nive; kigira u suye likuva lya Yahova, na Yahova u suye ive u vule kuva mwami ku Israeli.

²⁷Na lwa Samweli ya girunkana a twula kuye, Saulo ya gumira lukigiti lwengubo yeye, nayo ya tanduka.

²⁸Na Samweli ya mu volera, Yahova u tanduye ubwami bwa Israeli bu twule ku ive lero, naye u heye mulala ku avatende vovo, u veye mulahi kuvita ive.

²⁹Na kandi kuvita yaga, Munyali wa Israeli si a la veha kinga si a leganira; kigira si a veye umundu, a duke kweganira.

³⁰Hene yaho ya vola, Nkoli ubwoni: kali ni ga veye ndiyo, nku goonya, u nzidzominye kalunu imbiri wa vakulundu vavandu vange, na imbiri wa Israeli, na wirane kandi halala ninze nduke kusigamira Yahova Nyasaye wowo.

³¹Kunangwa Samweli yirana kulondekana na Saulo; na Saulo ya sigamira Yahova.

³²Hene yaho Samweli ya vola, Mu ndetere Agagi mwami wa Vaamaleki. Na Agagi ya duka imbiri wewe nobuluviriri. Na Agagi ya vola, Ligali ubululu bwelikudza bu viti.

³³Na Samweli ya mu volera, Kuli kivavi kikyo kya kola avakali va ve bugira avana, ni ndiyo mama wowo a la va bugira mwana hagati ha avakali. Na Samweli ya dononnya Agagi imbiri wa Yahova ha Gilgali.

³⁴Inyinga yeyo Samweli ya tsia Rama; na Saulo yanegira na a tsia mu inyumba yeye kuduka Gibea lya Saulo.

³⁵Na Samweli si ya tsia kandi kulolana na Saulo kuduka ku lidiku lyelikudza lilye; kigira Samweli ya syomera Saulo: na Yahova yeganira kigira yamehidza Saulo a veye mwami wa Israeli.