Read lulogooli 1 Samweli 19 Bible Online

1 Samweli 19 - lulogooli bible

1 Samweli 19

¹Na Saulo ya volera Jonathan mwana wewe, navatumekiri veve vosi, viite Daudi. Navutswa Jonathan, mwana wa Saulo, ya li na ya yanza Daudi ligali.

²Ma Jonathan ya volera Daudi, na a vola, Dada wange Saulo yenyanga kukwiita: kalunu, mwadza, welinde ligali mugamba, u menye hokwivisa, wivise:

³na inze nda tsia kyova kusingira himbi nadada wange mu mulimi ha u veye, na nda volerana na dada wange ku makuva gogo; ni mba ni ndola kindu ku vyosi, nda ku volera.

⁴Na Jonathan yidzominya Daudi ku dada wewe Saulo, na a mu volera Mwami a ta kola ubwoni ku mutumekiri wewe Daudi; kigira uyu si ya kola bwoni ku ive kandi kigira likola lilye li veye lilahi ku luvega lulwo:

⁵kigira uyu ya vika livamwoyo lilye mmukono gwigwe mwene, na yiita Mufilisiti, na Yahova ya kolera Israeli vosi ubuhonnyi bunene: ive wa lola inkuva yiyi, na wa sangala; kunang va ni kindu ki kalunu ive wenya kukola ubwoni ku masahi ga ta veye nekindu, nokwiita Daudi bugira kivune?

⁶Na Saulo ya huliridza mwoyo gwa Jonathan: ma Saulo yesuha, na a vola, Kuli Yahova a veye mwoyo, uyu a la vula kwiitwa.

⁷Kunangwa Jonathan ya langa Daudi, na Jonathan ya mu mannya makuva yaga gosi. Na Jonathan ya hila Daudi ku Saulo, naye ya li imbiri wewe, kuli matsyambiri.

⁸Na lwenyima ubulwani bwa li ho kandi: na Daudi ya twula, na a lwana na Vafilisiti, na ya viita ne liita linene; na viruka imbiri wewe.

⁹Kandi roho mudamano gwa twula ku Yahova gwa li ku Saulo, lwa yikala mu inyumba yeye na ya li nelitimu mmukono gwigwe; na Daudi ya kupa bukana nomukono gwigwe.

¹⁰Na Saulo yenya kutumita Daudi kuduka ku lidigi nelitimu; navutswa yevala kutwula imbiri wa Saulo, naye ya tumita lidigi nelitimu: na Daudi yiruka, na a tsia ubudiku zana.

¹¹Ma Saulo ya tuma vatumwa ku inyumba ya Daudi, kumugoneka, nokumwiita mugamba: na Mikali, muka Daudi, ya mu volera, na a vola, Ive nu u va nu u vula kwehonnya mwene ubudiku yibu, mugamba u liitwa.

¹²Kunangwa Mikali yikidzira Daudi mwidirisha: naye ya tsia, ni yiruka, na a hona.

¹³Na Mikali ya vugula kifwananyi, na a kyalira ku kitali, na a vika muto gwobwga bwetsimbuli ku mutwe gwakyo, na a ki fwuma ingubo.

¹⁴Na lwa Saulo ya tuma vatumwa kugumira Daudi, mukali uyu ya vola, A lwalanga.

¹⁵Na Saulo ya hila vatumwa va duke kulola Daudi, na a vola, Mu mu lete yino ku inze mu kitali kikye, nduke kumwiita.

¹⁶Na lwa vatumwa vingira, henza, kifwananyi ki veye ku kitali, ni ki veye nomuto gwo bu oya bwetsimbuli ku mutwe gwakyo.

¹⁷Na Saulo ya volera Mikali, Kigira ki ive u ngadanga ndi, nokuleka umusigu wange na a tsia, na a honoka? Na Mikali ya tivulira Saulo, Uyu ya mbolera, Ndeka ntsiye; kigira ki nda kwiita?

¹⁸Hene yaho Daudi yiruka, na a hona, na a duka ku Samweli ha Rama, na ya mu volera gosi ga Saulo ya mu kolera. Naye na Samweli va tsia kumenya ha Naiothu.

¹⁹Na Saulo ya volerwa, livola, Henza, Daudi a veye Naiothu mu Rama.

²⁰Ma Saulo ya hiia vatumwa kuvugula Daudi: na lwa va lola kiduma kyavaprofeti va veye mu liprofeta, na Samweli u singiye kuli a veye mutwe gwavo, Roho wa Nyasaye yadza ku vatumwa va Saulo, navo kandi va profeta.

²¹Na lwa Saulo ya volerwa inkuva yiyi, ya hila avatumwa vandi, navo kandi va profeta. Na Saulo ya tuma avatumwa avandi hali kavaka, navo kandi va profeta.

²²Hene yaho mwene ya tsia ha Rama, na ya duka ha kidaho kinene ki veye ha Seku: na ya teva na a vola, Samweli na Daudi va veye haliha? Mundu nulala ya vola, Henza, va veye Naiothu mu Rama.

²³Na ya tsia Naiothu mu Rama: na Roho wa Nyasaye yadza kuye kandi, na ya tsia imbiri na a profeta, kuduka ha Naiothu mu Rama.

²⁴Halala na yaga ya navula tsingubo tsitsye, na a profeta imbiri wa Samweli, na a gona hasi na a va kyahonyo mbasu bei nobudiku bei. Kigira yaga va vola, Saulo kandi a veye mbaprofeti?