Read lulogooli 1 Samweli 20 Bible Online

1 Samweli 20 - lulogooli bible

1 Samweli 20

¹Na Daudi yiruka kutwula ha Naiothu mu Rama, na a tsia kuvola imbiri wa Jonathan, Inze nkoli ki? Ubudamano bwange bu veye ki? Nobwoni bwange bu veye ki imbiri wa dada wowo, kuduka yenyanga livamwoyo lyange?

²Naye ya mu volera, Auwa ligali; ive si u la kudza mba: henza, dada wange si a kolanga kindu kinene kinga kikekeke, navutswa a vuliranga inze; na kigira ki dada wange a la visa yiki ku inze? Si ga veye ndiyo.

³Na Daudi yesuha, na a vola, Dada wowo a manya ligali inze nyoye liverwa imbiri wetsimoni tsitsyo; naye a volanga, Mu ta leka Jonathan a manye kindu yiki mba, gase a la mu vererera: navutswa ligali, kuli Yahova a veye mwoyo, na kuli mwoyo gugwo gu veye mwoyo, li veye ho ligenda lilala lyeng'ine hagati hange nelikudza.

⁴Hene yaho Jonathan ya volera Daudi, Makuva gosi agomwoyo gugwo gwenyanga, nda ku kolera.

⁵Ma Daudi ya volera Jonathan, Henza, mugamba gu veye mweli muhya, na inze si bu li bulahi mbule kwikala ku vyokulia halala nomwami: navutswa leka ntsie, nduke kwivisa mmulimi kuduka ku lidiku li kola gavaka mgolova.

⁶Dada wowo na a lola inze si mbeye ho, hene yaho u la vola, Daudi uyu yenyanga ligali mmu he munwa a nyagule kutsia Beth-lehemu mu lidala lilye; kigira ki veye yo kihaanwa kyomuhiga kigira bwiko bwosi.

⁷Na a va na a vola, Nobulahi; inze mutumekiri wowo nda va nemirembe: navutswa na a va na a vihirirwa, hene yaho u manye u saaviye ubudamano.

⁸Kigira yaga u nkolere ubulahi inze mutumekiri wowo, kigira u mbiki mu lilagana lya Yahova halala nive: navutswa ubudamano ni bu va ni bu veye mu inze, u nziite mwene: kigira ki u la mbila ku dada wowo?

⁹Na Jonathan ya vola, Yaga ga ve ihale ku ive; kigira ni mba ni mmanya dada wange u saaviye kukukolera ubudamano, Dgano si nda ka ku volera?

¹⁰Hene yaho Daudi ya volera Jonathan, Ni bwaha a la mbolera, ni ga va ni ga duka dada wowo u ku tivulira makuva malulu?

¹¹Na Jonathan ya volera Daudi, Hamba, ku tsie mmulimi. Na va tsia vombi halala mmulimi.

¹²Na Jonathan ya volera Daudi, Yahova, Nyasaye wa Israeli, a De muloli: lwa mmala kuteva dada wange, kuli inyinga yo mugamba, kinga lidiku lya kavaka, henza ni ha va ni ha veye nekindu kilahi ku Daudi, inze si nda ku letera, nokukuvuulira kindu zana?

¹³Yahova a kole ndi ku inze Jonathan, nokumeda, dada wange na a va ni yenya kukukola ubudamano, inze ni mba ni mbula kukuvuulira, nokukutuma, u tsie nemirembe na Yahova a ve halala nive, kuli ya li halala na dada wange.

¹⁴Na ive u la mmannya ubulahi bwa Yahova, ga ta va inyinga ya mbeye mwoyo yeng'ine, mbule kukudza;

¹⁵navutswa kandi u la kolera inyumba yange bulahi mihiga nemihiga; auwa, kali inyinga ya Yahova a mali kutwulidza avasigu va Daudi sa mulala ku lirova.

¹⁶Kunangwa Jonathan ya kola lilagana nenyumba ya Daudi, na a vola, Yahova a la ga vanza ku makono gavasigu va Daudi.

¹⁷Na Jonathan yesuhidza Daudi hali kaviri, kigira ubuyanzi bwa ya mu yanza; kigira ya mu yanza kuli yeyanza mwene.

¹⁸Kunangwa Jonathan ya mu volera, Mugamba gu veye mweli muhya: na ive u la henzererwa, kigira intebe yoyo i la va vutswa.

¹⁹Na lwa u menya madiku gavaka, u la sulunguta bwangu, na u la duka ha wivisa inyinga ya makuva yago ga henzwa, na u la menya himbi neligina lya Ezeli.

²⁰Inze nda lasa mibano gyivaka ku luvega lweligina zana, kuli ngeranga lilasa.

²¹Na, henza, nda tuma muyai, nokumuvolera, U tsie kwenya mibano. Ni mba ni mu volera muyai zana, Henza, mibano gyi veye ku luvega yilu; u gyi vugule, udze nagyo; kigira gyi veye mirembe ku ive, si bu veye ubuhimwa mba, kuli Yahova a veye mwoyo.

²²Navutswa ni mba ni mmu volera muyai zana likuva yili, Henza, mibano gyi veye imbiri wowo; u tsie ku inzira yoyo; kigira Yahova u ku tumi u tsie.

²³Kandi ku inkuva ya kwa volerani, inze nive henza Yahova a veye hagati hoho ninze kazozo.

²⁴Kunangwa Daudi yivisa mmulimi: na lwa mweli muhya gwa duka, mwami yikala a duke kulia.

²⁵Nomwami yikala ku intebe yeye, kuli madiku gosi, ku intebe i veye himbi ku lidigi; na Jonathan ya singira, na Abineri yikala himbi ku Saulo: navutswa bugono bwa Daudi bwa li vutswa.

²⁶Navutswa Saulo si ya vola kindu lidiku yilyo: kigira ya ganagana, Kindu ki mu gwiriye, si a veye mutakase; ligali si a veye mutakasa.

²⁷Na ga duka mugamba inyima ku mweli muhya, lidiku lya kaviri, bugono bwa Daudi bwa li vutswa: na Saulo ya volera Jonathan mwana wewe, Kigira ki mwana wa Jesse si ya duki kulagira, mgolova na lero?

²⁸Na Jonathan ya tivulira Saulo, na a vola, Daudi yenya ligali mmu he munwa a tsia Beth-lehemu:

²⁹na ya vola, Mwadza, leka ntsie; kigira bwiko bwetu bu veye nekihaanwa mu lidala; namwavo wange u ndagi mbe ho: kunangwa kalunu, ni mba ni nyoye tsimbabasi imbiri wowo, ndeke ntsie, mwadza, ndole vamwavo vange. Yiki ni kigira si yadzi ku imeza yomwami.

³⁰Hene yaho Saulo ubutima bwibwe bwaaka ku Jonathan, na ya mu volera, Ive mwana womukali mudamano nomutingu, inze si mmanya ive wa tovola mwana wa Jesse ku tsisoni tsitsyo mwene, na ku tsisoni tsyekyahonyo kya mama wowo?

³¹Kigira madiku gosi ga mwana wa Jesse a veye mwoyo mu kivala, ive si u la singeridzwa, kinga ubwami bubwo. Kunangwa u tume mundu a mu lete ku inze, kigira ligali a la kudza.

³²Na Jonathan ya tivulira Saulo dada wewe, na a mu volera, A liitwa Kigira ki? A koli ki?

³³Saulo ya mu tumita litimu a duke kumutumita; kunangwa ku likuva yilyo Jonathan ya manya nkani dada wewe ya saavira kwiita Daudi.

³⁴Ma Jonathan ya singira ha imeza na a ve nobutima bululu ligali, na ya vula kulia kindu kali hakuzuzu lidiku lya kaviri lyomweli, kigira ya vererera Daudi ligali, kigira dada wewe ya mu legannya.

³⁵Na ga duka mugamba, Jonathan ya tsia mmulimi ku inyinga ya ya lagana na Daudi, naye ya li nomuyai mukekeke halala naye.

³⁶Na ya volera muyai wewe, Nyagula, wenye mibano gya ndasanga. Na lwa muyai ya li na a nyagula, ya lasa mbano imbiri wewe.

³⁷Na lwa muyai ya duka ha Jonathan ya lasa mbano, Jonathan ya kupira muyai lwanga, na a mu teva, Mbano si gu veye imbiri wowo?

³⁸Ma Jonathan ya kupa lwanga inyima womuyai, U tsie bwangu, kola bwangu, u ta lindagira. Nomuyai wa Jonathan ya dola mibano, na ya tsia ku mwami wewe.

³⁹Navutswa muyai si ya manya kindu: Jonathan na Daudi veng'ine va manya inkuva yiyi.

⁴⁰Na Jonathan ya ha muyai vyuma vivye, na ya mu volera, U tsie, kuvihila mu lidala.

⁴¹Nonoho umuyai lwa ya mala kutsia, Daudi ya twulira ku luvega lwa Kusini, na ya gwa hasi mammama, naye yinama hali kavaka: na va busana, nokulilirana, uyu no uyu, kuduka Daudi na a kira.

⁴²Na Jonathan ya volera Daudi, U tsie nemirembe, kigira kwinye kwombi kwisuhi ku lieta lya Yahova, ni ku vola, Yahova uyu a la va hagati hange nive, kandi hagati hekisukululwe kyange nekisukululwi kyikyo, mihiga nemihiga. Na ya twula na a tsia: na Jonathan yingira mu lidala.