Read lulogooli 1 Samweli 24 Bible Online

1 Samweli 24 - lulogooli bible

1 Samweli 24

¹Na ga duka, lwa Saulo yirana kutwula ku lilonda lya Vafilisiti, ya volerwa, Henza, Daudi a veye mwigendanyama lya Engedi.

²Hene yaho Saulo ya vugula avandu tsielfu tsivaka ava tovolwa mu Israeli vosi, na a tsia kulonderera Daudi navandu veve ku tsinyanda tsyetsimbuli tsyobulimu.

³Naye ya duka ku inzira ha vigo vyamagondi, ha zana ha li noluhangaywa; na Saulo yingira mu kukunika virenge vivye. Na Daudi navandu veve va li ni va menya mu luhangaywa ku luvega lwomugati ligali.

⁴Avandu va Daudi va mu volera, Henza, Yili li veye lidiku lya Yahova ya ku volera, Henza, nda vika musigu wowo mmukono gugwo, na u la mu kolera kuli u lola kuva ubulahi. Hene yaho Daudi ya singira, na a kalaga lukigiti lwengubo ya Saulo makiriri.

⁵Na lwenyima, mwoyo gwa Daudi gwa mu luma, kigira ya kala lukigiti lwengubo ya Saulo.

⁶Na ya volera avandu veve, Yahova a ngaye mbule kukolera mwami wange kindu yiki, a veye mbake wa Yahova, kunyira mukono gwange kuye, kigira a veye mbake wa Yahova.

⁷Na ndiyo Daudi ya gaya avandu veve namakuva yaga, si a va leka va singire kutsia ku Saulo. Na Saulo ya singira na a twula mu luhangaywa, na a tsia.

⁸Na Daudi ya singira lwenyima, na a twula mu luhangaywa, naye yanira Saulo, na a vola, O mwami, mwami wange. Na Saulo lwa ya henza inyima, Daudi yinama na henzidza mumoni mwimwe hasi, na sigamira.

⁹Daudi ya volera Saulo, Kigira ki u huliranga makuva gavandu, ni va vola, Henza, Daudi yenyanga kukukolera budamano?

¹⁰Henza, lero tsimoni tsitsy'o tsi lolanga kuli Yahova a viki ive mu mukono gwange mu luhangaywa: na valala va mbolere, nkwiite; navutswa imoni yanoe ya ku honnya; na nda vola, Si nda nyira mukono gwange ku mwami wange; kigira a veye mbake wa Yahova.

¹¹Nokuvita yaga, dada wange, henza, yee, henza ulukigiti lyengubo yoyo mmukono gwange; navutswa inkuva yiyi, yagira ni nkala lukigiti lwengubo yoyo, ni mbula kukwiita, u manye na u lole si ha veye nobudamano kinga ubukyamu mmukono gwange, na mbule kukola bwoni ku ive, kali ive no u seteranga livamwoyo lyange kuligumira.

¹²Yahova a kalage hagati hange nive, na Yahova a vanze kisalya ku ive; navutswa mukono gwange gu la vula kuva ku ive.

¹³Kuli lugano lwa makuva gavandu va kale lu volanga, Mu yavo avadamano ubudamano bu twulanga; navutswa mukono gwange gu la vula kuva ku ive.

¹⁴Mwami wa Israeli ya twula na a londerera bwaha? Na ive wa londerera bwaha? Wa londerera imbwa inkudzu, kinga kisiiri.

¹⁵Kunangwa Yahova a ve mukalagi, a kalage hagati hange nive, na a lole, na a vere makuva gange, na a mbonnye ku mukono gugwo.

¹⁶Na ga duka, lwa Daudi ya mala kuvolera Saulo makuva yaga, Saulo ya vola, Gu veye mwoyo gugwo, mwana wange, Daudi? Saulo ya ginga mwoyo gwigwe, na a lira.

¹⁷Na ya volera Daudi, Ive u veye nobulungi kuvi ta inze; kigira ive u mbeye ubulahi, na inze nku heye ubudamano.

¹⁸Ive u landidzi lero kuli wa nkolera bulahi, kigira lwa Yahova ya mala kumbika mmukono gugwo, ive wa vula kunziita.

¹⁹Kigira umundu na a nyola musigu wewe, a la mu leka a tsia nemirembe? Kigira yaga Yahova a tunga ive bulahi kigira yaga wa nkolera lero.

²⁰Kandi, kalunu, henza, mmanya ive ligali u la va mwami, kandi bwami bwa Israeli bu la singeridzwa mmukono gugwo.

²¹Kunangwa kalunu u nzisuhire ku Yahova, u la vula kukalaga kisukululwi kyange inyima wange, na u la vula kudividza lieta lyange kutwula mu inyumba ya dada wange.

²²Na Daudi yisuhira Saulo. Na Saulo ya tsia ingo wewe; navutswa Daudi navandu veve vanegira kutsia mu lyevisa.