Read lulogooli 1 Samweli 25 Bible Online

1 Samweli 25 - lulogooli bible

1 Samweli 25

¹Ma Samweli ya kudza; na Israeli vosi va vugana halala, ni va mu syomera, ni va mu ta mu inyumba yeye ha Rama. Ma Daudi ya singira, na a sulunguta kutsia mu kyangalangwi kya Parani.

²Ya li ho mundu mulala ha Maon, wemiyandu gyigye gya li ha Karimeliuyu ya li mundu munene, naye ya li namagondi tsielfu tsivaka, netsimbuli elfu indala: na inyinga yeyo ya li na a kalaganga ubwoya bwamagondi gege ha Karimeli.

³Na lieta lyomundu uyu lya langwa Nabali; na lieta lyomukali wewe lya langwa Abigaili; mukali uyu ya li wobugeeri bulahi, noweligondo lilahi ligali: navutswa musatsa uvu ya li wekivihiri nomudamano mu vikolwa vivye; naye ya li wenyumba ya Kalebu.

⁴Na Daudi ya hulilira mu kyangalangwi Nabali a veye mu likalaga ubwoya bwamagondi gege.

⁵Ma Daudi ya tuma vasoleli likumi, na Daudi ya volera vasoleli, Mwanegire kutsia Karimeli, mu tsie ku Nabali, mu mu chelidzire mu lieta lyange:

⁶na ndiyo mu la mbolera, u menyanga mbugasu, Mirembe gyi veye ku ive, nemirembe gyi veye ku inyumba yoyo, nemirembe gyi veye ku vyosi vya u veye navyo.

⁷Na kalunu mbuliye ive u veye navandu va kalaganga ubwoya bwamagondi: avayi vovo va li halala na kwinye, na si kwa va kolera kindu kidamano, kinga si va geherwa kindu kali kilala kuvo, inyinga yosi ya va li mu Karimeli.

⁸U teve, vasoleli vovo, navo va la ku volera: kigira yaga avasoleli yavo va nyole liverererwa imbiri wetsimoni tsitsyo; kigira kwinye ku duka mmadiku malahi: mwadza, ku vyosi vi duka mmukono gugwo u haane ku vatumekiri vovo, noku inze mwana wowo Daudi.

⁹Yavo vasoleli va Daudi lwa va duka, va volera Nabali kuli makuva yaga gosi mu lieta lya Daudi, na va kiring'ana.

¹⁰Na Nabali ya tivulira vatumekiri va Daudi, na ya vola, Daudi ni bwaha? Nomwana wa Jesse ni bwaha? Va veye ho avatumekiri vanyingi madiku ga lero, avirukanga sa mulala kutwula ku vanene vavo.

¹¹Mbugule ubukima bwange, namadzi gange, na inyama yange ya nziitiye avandu vange, ava nkalaliranga bwoya bwamagondi, nokuhaana ku avandu va nta manya ha va twulanga?

¹²Ma vasoleli va Daudi va girunkana, ni va tsia, ni virana, ni va tsia ni va volera Daudi kuli makuva yaga gosi.

¹³Na Daudi ya volera avandu veve, Mundu sa mulala yebohe kivavi kikye. Navo veboha mundu sa mulala kivavi kikye; na Daudi yeboha kivavi kikye: navo vanegira kulondana na Daudi va li avandu va duka kuli tsimia tsine; ne tsimia tsiviri va tigala kulinda vindu vyavo.

¹⁴Navutswa mulala ku vasoleli va Nabali ya volera Abigaili, mukali wa Nabali, na a vola, Henza, Daudi u tumi avandu kutwula mu kyangalangwi kuchelidza munene wetu; naye ya va nyega.

¹⁵Navutswa avandu yavo va ku kolera bulahi ligali, na kwinye si kwa nyola lisaleridza, kinga si kwa gota kindu kali kilala, inyinga yosi ya kwa menya navo, lwa kwa li mu kiguti:

¹⁶va li lidigi ku kwinye inyinga yobudiku nombasu halala, tsinyinga tsyosi tsya kwa li halala navo kwaya magondi.

¹⁷Kunangwa kalunu u manye nokuganagana ga wenya kukola; kigira budamano bu tovoleywi ku munene wetu, noku inyumba yeye: kigira uyu a veye muyingwa, kuduka mundu si a nyala kuvolerana naye.

¹⁸Hene yaho Abigaili ya kola bwangu, na a vugula milango gyobukima tsimia tsiviri, netsimuya tsiviri tsyewaini, namagondi gatano ga mali kwiitwa ga tegekeywi, nevigero vitano vyobuswage bu kalange, nevisaganyi mia vyemizabibu, netsimango tsyamakuyu tsimia tsiviri, na ya vi vika ku tsisukiri.

¹⁹Na a volera avasoleli veve, Mwimirire imbiri wange; henza, inze mu londanga. Navutswa si ya volera musatsa wewe Nabali.

²⁰Na ga duka, lwa ya gendanga ku isukiri yeye, nokusulunguta himbi nelivona lyekigulu, henza, Daudi navandu veve va sulunguta kwisunda himbi kuye; naye ya vugana navo.

²¹Ma Daudi ya li na a vola, Ligali gyi veye gya vutswa nda linda vyosi vya uyu a veye navyo mwigendanyama, kuduka si ha veye nekilala kya gota ku butugi bwibwe bwosi: naye u ntungi ubudamano mbugono bwobulahi.

²²Nyasaye a kolere ndiyo avasigo va Daudi vosi, nokuvita, ni mba ni ndeka ku yavo vosi ava veye aveve kali mwana mulala muyai, kuduka inyinga bukya.

²³Na lwa Abigaili ya lola Daudi, ya kola bwangu kwika ku isukiri yeye, na ya gwa mammama imbiri wa Daudi, na yinama hasi.

²⁴Na ya gwa ha virenge vivye, na a mu volera, Ku inze, munene wange, ubudamano yibu bu ve ku inze; na ive u leke mukana mutugwa wowo, mwadza, mbole mu amatu gogo, na u hulire makuva gomukana mutugwa wowo.

²⁵Mwadza, umunene wange, u ta henza muyingwa, uyu Nabali, kigira kuli lieta lilye li veye, ni ndiyo a veye; Nabali ni lieta lilye, nobusiru bu veye naye; navutswa inze mukana mutugwa wowo, si nda lola vasoleli vomunene wange, ava wa leta.

²⁶Kunangwa kalunu, munene wange, kuli Yahova a veye mwoyo, na kuli ive mwene u veye mwoyo, kigira Yahova u ku gayi u ta sundula i masahi, kandi u tevanzira kisalya nomukono gugwo mwene, kunangwa kalunu avasigu vovo vosi, navandu ava kwenyeranga likuva lidamano ku ive, va ve kuli uyu Nabali.

²⁷Na kalunu kihaanwa yiki kyomutumekiri wowo nku leteye ive, munene wange, va hebwe yavo avasoleli ava ku londanga, munene wange.

²⁸Mwadza, u samehe ubukyamu bwange, inze mukana mutugwa wowo: kigira Yahova ligali a la ku lombera ive, munene wange, inyumba inkulumamu, kigira ive, munene wange, u lwananga ubulwani bwa Yahova; kandi ubudamano si bu la loleka mu ive tsinyinga tsitsyo tsyosi.

²⁹Kandi ni i va mundu a singira kukulonda, nokwenya livamwoyo lilyo, navutswa livamwoyo lilyo, munene wange, li la bofwa mu liboha lyelivamwoyo halala nelivamwoyo lya Yahova Nyasaye wowo: nemyoyo gya avasigu vovo, a la gyi syuva kyova, kuli lisyuvwa lyeligina hagati holukova.

³⁰Na ga la duka, lwa Yahova a la mala kukolera ive, munene wange, kuli ubulahi bwosi bwa a voye ku makuva gogo, nokukuvika kuva mwami ku Israeli,

³¹inkuva yiyi i la vula kuva ubuvereri ku ive, kinga kyokwikigitala kyomwoyo ku ive, munene wange, nu u va nu u sundula masahi bugira kivune, kinga ive, munene wange nu u va ni wevanzira kisalya. Na lwa Yahova a kolera munene wange ubulahi, widzulire inze mukana mutugwa wowo.

³²Na Daudi ya volera Abigaili, A gasidzwe Yahova, Nyasaye wa Israeli, wa tuma ive lero kwagana ninze:

³³bu gasidzwe ubugeeri bubwo, kandi ive u gasidzwe, wa ngaya lero mbule kusundula masahi, kandi mbule kwevanzira kisalya nomukono gwange mwene.

³⁴Kigira ligali, kuli Yahova, Nyasaye wa Israeli, a veye mwoyo, wa gaya inze mbule kukusaliridza, nu u va wa vula kukola bwangu kuduka kuvugana ninze, ligali uyu Nabali, ngano si a tigala nekindu, kali mwana muyai mulala inyinga ya bwa kya.

³⁵Na ndiyo Daudi ya vugula mmukono gwigwe vya ya mu letera: na ya mu volera, Yanegire, u tsie ingo wowo nemirembe; henza, mbuliye mwoyo gugwo, na mbugiriye liva lilyo.

³⁶Na Abigaili yirana ku Nabali; na, henza, ya lomba lilia mu inyumba yeye, kuli lilia lyomwami; nomwoyo gwa Nabali gwa li nobusangala muye, kigira ya hambika ligali: kigira yaga mukali wewe ya vula kumuvolera kindu, ku bukekeke kinga ku bunyingi, bwa luha bwa kya.

³⁷Na ga duka mugamba, lwa iwaini ya kalika ku Nabali, mukali wewe ya mu volera makuva yaga, nomwoyo gwigwe gwa kudza muye, na ya gwa kuli ligina.

³⁸Na ga duka kuli madiku likumi inyima wa makuva yaga, Yahova ya duya Nabali, na a kudza.

³⁹Na Daudi lwa ya hulira Nabali u mali kukudza, ya vola, A gasidzwe Yahova, wa hing'ana na Nabali ku likuva lyelinyegwa lyange, na ya gaya mutumekiri wewe ku budamano: nelikola lidamano lya Nabali, Yahova ya li galukidza ku mutwe gwigwe mwene. Na Daudi ya tuma mundu na a volerana na Abigaili, a duke kumukwa.

⁴⁰Na lwa avatumekiri va Daudi va duka ku Abigaili ha Karimeli, va volerana naye, nokumuvolera Daudi u ku tumi ku duke ku ive, ku ku hile u ve mukali wewe.

⁴¹Naye ya singira, na yeyinaminya kuduka hasi, na a vola, Henza, inze mukana mutugwa wowo mbeye mutumekiri wokusinga virenge vyavatumekiri vomunene wange.

⁴²Na Abigaili ya kola bwangu, na a singira, na a nina ku isukiri, navakana vatugwa veve vatano va mu londa; naye ya londa avatumwa va Daudi, na a gwa mukali wewe.

⁴³Kandi Daudi ya kwa Ahinoam wa Jezireeli; navo vombi va gwa vakali veve.

⁴⁴Na Saulo ya li ni ya mu ha Paliti mwana wa Laishi, wa li wa Galimu, Mikali mukana wewe, wa li mukali wa Daudi.