Read lulogooli 1 Samweli 26 Bible Online

1 Samweli 26 - lulogooli bible

1 Samweli 26

¹Na Vazifu va duka ku Saulo ha Gibea, ni va vola, Daudi si yivisa mu kigulu kya Hakila, ki henza ku kyangalangwi?

²Hene yaho Saulo ya singira na a sulunguta migendanyama lya Zifu, na a veye navandu va Israeli tsielfu tsivaka ava tovolwa halala naye, kwenya Daudi mwigendanyama lya Zifu.

³Na Saulo ya singeridza mahema gege mkigulu kya Hakila ki henza ku kyangalangwi, ku inzira. Navutswa Daudi ya menya mwigendanyama, na ya lola Saulo a mu londa mwigendanyama.

⁴Kigira yaga Daudi ya tuma avaluti, na va manya ligali Saulo u duki.

⁵Na Daudi ya singira, na a duka ha zana ha Saulo ya singeridza mahema gege; na Daudi ya lola ha Saulo a gonanga, na Abineri, mwana wa Neri, munene welihe lilye: na Saulo ya gona hagati ha magari, navandu va mu kumbiridza tsimbega tsyosi.

⁶Hene yaho Daudi ya teva, na a volera Ahimeleku Muhiti, na Abishai mwana wa Zeruia, amwavo wa Joabu, na a vola, Ni bwaha u la sulunguta halala ninze ku Saulo mmahema gege? Abishai ya vola, Inze nda sulunguta halala nive.

⁷Ma Daudi na Abishai va duka ku avandu ubudiku: na, henza, Saulo ya li na a gonanga hagati ha magari, naye ya li nelitimu lilye ni li singiye hasi ha mutwe gwigwe; na Abineri navandu va gona kumukumbiridza tsimbega tsyosi.

⁸Hene yaho Abishai ya volera Daudi, Nyasaye u haani musigu wowo nokumuvika mmukono gugwo lero: kunangwa kalunu, nku saala, u lelie mmu tumite nelitimu kuduka mmarova inyinga indala, si nda mu tumita hali kaviri.

⁹Na Daudi ya volera Abishai, U ta mu dividza; kigira ni bwaha u nyala kunyira mukono gwigwe ku mbake wa Yahova, ma a vule kuva nekindu kuye?

¹⁰Kandi Daudi ya vola, Kuli Yahova a veye mwoyo, Yahova a la mu duya; kinga lidiku lilye lyelikudza li la duka; kinga a la sulunguta mbulwani, na a la diva.

¹¹Yahova a ngaye mbule kunyira mukono gwange ku mbake wa Yahova: navutswa kalunu, mwadza, u vugule litimu li veye ha mutwe gwigwe, nekimuga kya madzi, ku tsie.

¹²Na Daudi ya vugula litimu, nekimuga kyamadzi ha mutwe gwa Saulo; na va tsia: si ha li nomundu wa lola yaga, nokugamanya, kinga si ha li nomundu wa vuka, kigira va li ni va gonanaga vosi; kigira tsindodo tsinene tsitwula ku Yahova, tsya gwa kuvo.

¹³Hene yaho Daudi ya tsia engereka, na a singira ku kigulu ihale ligali; ubwiyangu ubunene bwa li hagati havo;

¹⁴Daudi yanira ku vandu, noku Abineri mwana wa Neri, na a vola, Si u tivula kindu, ive Abineri? Hene yaho Abineri ya tivula na a vola, Ni bwaha ive waniranga mwami?

¹⁵Na Daudi ya volera Abineri, Ive si u veye mundu wobuluviriri? Kandi ni bwaha u veye kuli ive mu Israeli? Kigira ki ive wa vula kulinda munene wowo, mwami? Kigira mundu mulala ku avandu yingira a duke kudividza mwami munene wowo.

¹⁶Si i veye inkuva indahi ya ive wa kola. Kuli Yahova a veye mwoyo, mwinye mu dukani nelikudza, kigira si mwa linda munene wenyu, mbake wa Yahova. Kunangwa kalunu henze, litimu lyomwami, nekimuga kyamadzi, vya li ha mutwe gwigwe, vi veye haliha?

¹⁷Na Saulo ya manya mwoyo gwa Daudi, na a vola, Yigu gu veye mwoyo gugwo, mwana wange Daudi? Na Daudi ya vola, Gu veye mwovo gwange, munene wange, O mwami.

¹⁸Kandi ya vola, Kigira ki munene wange u londanga inze mutumekiri wowo? Kigira nkoli kindu ki? Kinga ni budamano ki bu veye mmukono gwange?

¹⁹Kunangwa kalunu, nku saala, munene wange mwami u hulire makuva gomutumwa wowo. Na a va na a veye Yahova u vukidzi ive ku inze, a vugule kihaanwa: navutswa ni va va ni va veye avana vavandu, va laamwe imbiri wa Yahova; kigira va nkungi lero, mbule kuhambana nemiyandu gya Yahova, ni va vola, Tsia u tumekire avanyasaye vandi.

²⁰Kunangwa kalunu, u ta leka masahi gange ga sundulwe ihale na Yahova: kigira mwami wa Israeli u twuli kwenya kisiiri, kuli lwa mundu a tsitsanga kuhima inkwari mu vigulu.

²¹Hene yaho Saulo ya vola, Inze nkoli ubwoni: yirana, Daudi mwana wange; kigira inze si nda ku kolera kindu kidamano kandi mba, kigira livamwoyo lyange lya li nobuguli budinyu imbiri wetsimoni tsitsyo lero: henza, nkoli agobusiru, na nkoli amahyolo ligali.

²²Na Daudi ya tivula na a vola, Henza litimu, O mwami mulala ku vasoleli yambuke yino yadze kulivugula.

²³Na Yahova a la tunga mundu sa mulala ubulungi bwibwe nobusuuvirifu bwibwe; kigira Yahova ya ku vika mmukono gwange lero, na si mbugirira kunyira mukono gwange ku mbakewa Yahova.

²⁴Kandi, henza, kuli livamwoyo lilyo li veye linene imbiri wetsimoni tsyange lero, ni ndiyo livamwoyo lyange li veye linene imbiri wetsimoni tsya Yahova, naye a la mbonnya mu kivi kyosi.

²⁵Hene yaho Saulo ya volera Daudi, U gasidzwe, ive mwana wange Daudi, u la kola nobunyali bunene, na ligali u la guuta. Kunangwa Daudi ya tsia, na Saulo yirana hango hehe.