Read lulogooli 1 Samweli 6 Bible Online

1 Samweli 6 - lulogooli bible

1 Samweli 6

¹Lisanduku lya Yahova lya li mu kivala kya Vafilisiti myeli gyitano na gyiviri.

²Na Vafilisiti va langa avasalisi navasegetiri, na va vola, Ku la kola ki nelisanduku lya Yahova? Mu ku mannye kuli kunyala kuligalukidza hango halyo.

³Navo va va volera, Mwinye ni mu hila lisanduku lya Nyasaye wa Israeli, li twule ku mwinye, mu ta li hila lyere; navutswa ga mu dukira mu hile kindu kyekihaanwa kyelihyola lyenyu: hene yaho mu la honywa, kandi mu la vulirwa kivune kyomukono gwigwe gu vuli kutwulira ku mwinye.

⁴Hene yaho va teva, Kihaanwa kyelihyolo ki la va kindu ki kumuhilira? Navo va vola, Amihi gatano gethahabu, nevisie vitano vyethahabu, kuli livalidzwa lyavakulundu va Vafilisiti, kigira liduya lilala lya li ku mwinye vosi, noku vakulundu venyu.

⁵Kigira yaga mu la lomba kifwananyi kyamihi genyu, nekifwananyi kyevisie vyononyanga kivala kyenyu; na mu la kuminya Nyasaye wa Israeli: mbula a la gehidza ubuliduhu bwomukono gwigwe bu veye ku mwinye, noku vanyasaye venyu, noku kivala kyenyu.

⁶Kunangwa kigira ki mu kolanga myoyo gyenyu miliduhu, kuli Vaegepeti na Farao va kola myoyo gyavo miliduhu? Lwa ya kola vindu vyokugenya hagati havo, si va leka avandu kutwula, nokutsia?

⁷Kunangwa kalunu mwelombere avene ligari lihya, netsing'ombe tsiviri tsidwasi tsikerangwa, tsya va kikiri kuvika inira kutsyo; mu bohe tsing'ombe yitsi ku ligari nevimoli vyatsyo mu vi twulidze mu vivike mu inyumba;

⁸na mu vugule lisanduku lya ahova nokulivika ku ligari; neviju vyethahabu, vya mu hila kuye kuva kihaanwa kyelihyolo lyenyu, mu kasanduku ku nyasi kwelisanduku; nokulihila, li duke kutwula ku mwinye.

⁹Na henza; ni li va ni li londa ku inzira yo lwako lwalyo lyene kuduka Beth-shemeshi, hene yaho a ku koleye ubudamano bunene yibu: navutswa ni li va ni li vula kulonda inzira yeyo, hene yaho ku la manya si gu veye mukono gwigwe gwa kukuya; navutswa ki veye kyegendera kya ku gwira.

¹⁰Navandu va kola ndiyo, va vugula tsing'ombe tsiviri tsidwasi, nokutsiboha ku ligari, nevimoli vyatsyo va vi boha mu inyumba;

¹¹na va vika lisanduku lya Yahova ku ligari, nakasanduku kevisie vyethahabu, navifwananyi vyamihi gavo vya li mu.

¹²Netsing'ombe tsya londa inzira inungi i tsitsanga Beth-shemeshi, na tsi londa lihasi, na tsya tsia na tsyana, na si tsya govera ku mukono mulungi, kinga ku mukono mosi; avakulundu va Vafilisiti va tsi londa kuduka ku lwako lwa Beth-shemeshi.

¹³Navandu va Beth-shemeshi va li ni va gesanga ligesa lyavo lyengano mwivona; na va ginga tsimoni tsyavo, ni va lola lisanduku, na va sangala kulilola.

¹⁴Naligari lya duka mmulimi gwa Joshua Mubeth-shemeshi, na lya singira ha zana, na ha li ho lwanda lunene: na va tannya misala gyeligari, na viita tsing'ombe kuva kihaan-va kyokusambwa ku Yahova.

¹⁵Na Valevi vikidza lisanduku lya Yahova, halala nakasanduku ka li halala nalyo, keviju vyethahabu vya li mu, nokuvivika ku lwanda lunene: avandu va Beth-shemeshi va haana vihaanwa vyokusambwa nokwiitira Yahova isadaka ku lidiku zana yilyo.

¹⁶Avakulundu vatano va Vafilisiti lwa va lola inkuva yeyo, virana wavo Ekiron lidiku zana yilyo.

¹⁷Amihi yaga gethahabu ga Vafilisiti va leta ga ve kihaanwa kyelihyolo lyavo ku Yahova ga veye ndi: lya Ashidodi lilala, na lya Gaza lilala, na lya Ashikelon lilala, na lya Gathu lilala, na tya Ekiron lilala;

¹⁸navisie vyethahabu kuli livalidzwa lya madala gosi ga Vafilisiti ga veye ga avakulundu vatano, madala getsingaga namadala gekivala vutswa, kuduka ku lwanda lunene, lwa va vika ku lisanduku lya Yahova, lwanda yilu lu menya kuduka lero mmulimi gwa Joshua Mubeth-shemeshi.

¹⁹Naye ya duya avandu va Beth shemeshi, kigira va henza mu lisanduku lya Yahova, naye ya duya kuvo avasatsa makumi gatano na gaviri, navasatsa tsielfu makumi gatano: navandn va syoma, kigira Yahova ya duya avandu neliitwa linene ligali.

²⁰Navandu va Beth shemeshi va vola, Ibwaha u nyala kusingira imbiri wa Yahova, Nyasaye uyu mutakatifu? Naye a lanegira kutsia ku bwaha kutwula ku kwinye?

²¹Na va tuma vatumwa va tsie ku avandu avamenyi Kiriathu-jearim nokuvavolera, Vafilisiti va leti lisanduku lya Yahova kandi; mu sulungute mwinye, mudze kuliginga mu tsie nalyo igulu wenyu.