Read lulogooli 1 Samweli 7 Bible Online

1 Samweli 7 - lulogooli bible

1 Samweli 7

¹Navasatsa ve Kiriathu-jearim vadza, ni va ginga lisanduku lya Yahova, ni vanegira nalyo kuduka mu inyumba ya Abinadabu mu kigulu, ni va takasa Eleazaru mwana wewe a duke kulinda lisanduku lya Yahova.

²Na ga duka, kutwula ku lidiku lyelisanduku lya menya mu Kiriathu jearim tsinyinga tsya duka tsinyingi; kigira tsya li mihiga makumi gaviri: nenyumba yosi ya Israeli va li mu lyanira ku Yahova.

³Na Samweli ya volera inyumba yosi ya Israeli, na a vola, Mwinye ni mu va ni mwirana ku Yahova nemyoyo gyenyu gyosi, hene yaho mu vike ihale ku mwinye avanyasave vageni, na Ashitarothu va veye hagati henyu, na mu yekidze myoyo gyenyu ku Yahova nokumutumekira yeng'ine; naye a la mu honnya ku makono ga Vafilisiti.

⁴Hene yaho avana va Israeli va vika ihale kuvo Vabaal na Ashitarothu, na va tumekira Yahova yeng'ine.

⁵Na Samweli ya vola, Israeli vosi va vugane halala ha Mizipa, na inze nda saalira mwinye ku Yahova.

⁶Ma va vugana halala ha Mizipa, na va daha madzi, ni va ga tsuka hasi imbiri wa Yahova, navo va honga lilia lidiku yilyo, na va vola ha zana amakura yaga, Kwinye ku koleye Yahova ubwoni. Na uyu Samweli ya kalagira avana va Israeli mu Mizipa.

⁷Na Vafilisiti lwa va hulira avana va lsraeli va vugani halala ha Mizipa, avakulundu va Vafilisiti vanegira ku Israeli. Navana va Israeli, lwa va nyola amakuva, va tia Vafilisiti.

⁸Navana va Israeli va volera Samweli, U ta leka kwanira Yahova Nyasaye wetu kigira kwinye, a duke kukuhonnya ku makono ga Vafilisiti.

⁹Kunangwa Samweli ya vugula kimeme kyeligondi ki nunanga, na ya ki haana kigima ki ve kihaanwa kyokusambwa ku Yahova: na Samweli yanira Yahova kigira Israeli; na Yahova ya mu tivulira.

¹⁰Na lwa Samweli ya li mu lihaana kihaanwa kyokusambwa, Vafilisiti visunda himbi kulwana Israeli; navutswa Yahova ya syagukidza tsinkupa tsinene ku lidiku yilyo ku Vafilisiti, nokuvadambidza, navo va kuywa nokugwa imbiri wa Israeli.

¹¹Navandu va Israeli va twula Mizipa, ni va kunga Vafilisiti, nokuvakuya, kuduka isi wa Beth-kari.

¹²Hene yaho Samweli ya vugula ligina, nokulisingeridza hagati ha Mizipa na Shen, na ya gulika ligina zana Ebenezeri, na a vola, kuduka kalunu Yahova u ku konyi.

¹³Ni ndiyo Vafilisiti va guutwa, navo si vingira kandi mu tsinzako tsya Israeli: nomukono gwa Yahova gwa li ku Vafilisiti madiku gosi ga Samweli.

¹⁴Namadala ga Vafilisiti va nuula ku Israeli ga galukidzwa ku Israeli, kutwula Ekiron kuduka Gathu; nolwako lwavo Israeli va twulidza ku makono ga Vafilisiti. Nemirembe gya li hagati ha Israeli na Vaamoni.

¹⁵Na Samweli ya kalaga mu Israeli madiku gosi gelimenya lilye.

¹⁶Naye ya tsia muhiga nomuhiga mu li vodonkana lilye kuduka Betheli, na Gilgali, na Mizipa; na ya kalaga mu Israeli mmadala yaga gosi.

¹⁷Na yirana kuduka Rama, kigira inyumba yeye ya li ho; na ya kalaga mu Israeli ha zana, na yombakira Yahova ubwali yo.