Read lumasaaba Khuurakikha 10 Bible Online

Khuurakikha 10 - lumasaaba bible

Khuurakikha 10

¹Lwanyuma lwe khuusalaasala khwe kameetsi, basooleli ba Nowa baataru Shemu, Hamu ni Yafesi, nabo baasaala lisaaye liikali naabi.

²Basooleli ba Yafesi baaba nibo; Gomeri, Magogo, Madayi, Yavani, Tubali, Mesheki, ni Tirasi.

³Basooleli ba Gomeri baaba nibo; Ashikenazi, Rifasi, ni Togarima.

⁴Basooleli ba Yavani baaba nibo; Elisha, Tarushishi, Kitimu, ni Dodanimu.

⁵Mu bano mwaamamwo babaandu abe babaamenya khu ndulo khwe nyaantsa ni khu bikelemeesi. Bano boosi baaba babetsukhulu ba Yafesi babaamenya mu bisiintsa byaabwe, khuusiintsiila khu tsiingo tsaabwe, nga buli batweela khu nibo bali ni luulomo lwaabwe.

⁶Basooleli ba Hamu baaba nibo; Kushi, Misiri, Puti, ni Kanaani.

⁷Basooleli ba Kushi baaba nibo; Seba, Havila, Sabuta, Raama ni Sabuteka. Basooleli ba Raama baaba nibo; Sheba ni Dedani.

⁸Kushi ekyela paapa wa Nimurodi. Nimurodi yuno niye uwaba umuundu uwanyoowa khuuba umusaani uwe kamaani naabi khu shibala.

⁹Niye aaba umuyiifwi uwe kamaani naabi mu moni ts'Omukasya, isho nisho shishakila babaandu baakyelawo baalomatsaka bari, “Ube nga Nimurodi uwaba umuyiifwi uwe kamaani mu moni ts'Omukasya.”

¹⁰Buyiinga bweewe bubwanyoowa bwaba Babeli, Ereki, ni Akadi. Bisiintsa bino byoosi nga bili mu shibala sha Babulooni.

¹¹Nga waamile mu shibala sheene isho, waatsya wenjila mu Asiriya, woombakha biriimba Nineve, Rehobosi Iri, Kala

¹²ni Reseni, shishiili akari a Nineve ni Kala, shiriimba she kamaani.

¹³Misiri ekyela paapa wa Ludimu, Anamimu, Lehabimu, Nafutuhimu,

¹⁴Pasirusimu, Kasiluhimu (Mu niye mwaamamwo ba Firisitiya), ni Kafutorimu.

¹⁵Kanaani ekyela paapa wa Sidoni, nga niye umusooleli weewe umukiboole, ni Hesi,

¹⁶Kanaani mweene niye uwekyela kuuka uwe ba Yebusi, ba Amori, ni ba Girugashi,

¹⁷ni ba Hivi, ba Ariki, ba Sini,

¹⁸ba Arivadi, ba Zemari ni ba Hamasi. Lwanyuma buukuuka buukyeekhe bwe ba Kanaani bwaasalanila bwaamalatana oosi.

¹⁹Shisiintsa shino she ba Kanaani shabalaaha khukhwaamila ilala i Sidoni, khuutsya khukhwoola lubeka lwe Gerari, ni khuutsya khukhwoolela ilala i Gaza, ni khuutsya khu lubeka lwa Sodomu, Gomora, Adima, ni Zeboyimu, ni khuutsya khukhwoola i Lasha.

²⁰Bano boosi baaba basooleli ba Hamu, khuusiintsiila khu tsiingo, bukuuka bukyeekhe, tsinimi ni kamanaambo kaabwe.

²¹Shemu, uwaba waandaaye umukhulu wa Yafesi, naye aasaala Eberi, uwaamamwo babaandu baakali busa.

²²Basooleli ba Shemu baaba nibo; Elamu, Ashuri, Arupakusadi, Ludi ni Aramu

²³Basooleli ba Aramu baaba nibo; Uzi, Huli, Geseri, ni Mashi.

²⁴Arupakusadi ekyela paapa wa Shela, Shela naye wekyela paapa wa Eberi.

²⁵Eberi naye aasaala basooleli babili, mutweela abe baamulaanga bari Pelegi[4], lwekhuuba mu biifukhu byeewe, nimwo mweesi shibala shaawukhanilamwo, ni waandaaye lisiina abe bari Yokutani.

²⁶Yokutani ekyela paapa wa Alumodadi, Shelefu, Hazarimavesi, Jera,

²⁷Hadoramu, Uzali, Dikula,

²⁸Obali, Abimayeli, Sheba,

²⁹Ofiri, Havila, ni Yobabu. Bano boosi baama mu Yokutani.

³⁰Shibala sheesi nibo baamenyamwo shaamila ilala i Mesha khuulola kwe Seferi, shishaba mu shibala she mu ngoongo she bwaamanyaanga.

³¹Bano nibo baaba babetsukhulu ba Shemu, babaaba bamenya khusiintsila khu bukuuka bwaabwe bukyeekhe, ni tsinimi tsaabwe, mu bisiintsa byaabwe ni kamanaambo kaabwe.

³²Luruungo luno lumalayo babaandu babaama mu Nowa boosi, khuusiintsiila khu nyilili tsaabwe, ni kamanaambo kaabwe. Ni khukhwaama mubeene bano, kamanaambo koosi kaasalanila khuumala shibala shoosi lwanyuma lwe kameetsi.