Read lumasaaba Khuurakikha 11 Bible Online

Khuurakikha 11 - lumasaaba bible

Khuurakikha 11

¹Mu khunyoowa khukhweene, babaandu be shibala shoosi baaba bakanikha luulomo lutweela.

²Ne babaandu ni baakyeendaanaka beetsa khukhwaama i bwaamanyaanga, boola khu musaleela kwe mu Shinari[5], bekholela buumenyo ibweene iyo.

³Baryo kila beelomela bonyene bari, “Khakhwiitse atweela, khubuumbeyo kamatofwaali, khukoomise koome kahandalalile ilala buulayi bubweene.” Baryo baafuna kamatofwaali ke khukhwoombekhela mu shifwo she kamabaale busa, baafunayo ni buutosi bubuwaambanisa kamatofwaali atweela.

⁴Lwanyuma ndi kila beelomela bonyene bari, “Khayo khwiyombekhele shiriimba, nga shilimwo kukwombekhe kwe tsinuungo tsingali, nga kwaakulukha shisuli shakwo, shaaniina khukhwoola mwikulu, nio nafwe khuryo khube nga khwekholeele lisiina. Shino shinakhuyeeta khulekhe khusalanila khumalatane mu shibala shoosi ta.”

⁵Ne Umukasya naye umweene kila eekha aasi khuulola khu shiriimba ni kukwoombekhe byeesi babaandu baaba boombekhile.

⁶Kila Umukasya naye aloma ari, “Babaandu bano balikho baraambila atweela, lwekhuuba bakanikha luulomo lutweela. Khuno khuli khuurakikha busa khweesho sheesi bali khuukana khuukhola. Nashiryo mbaawo shiindu shoosi shishikane shibakhaase khuukhola ta.

⁷Nashiryo ari yiitsa khwiikhe aasi, khutsye khukaraangaranise luulomo lwaabwe, nio ilekhe khuubawo umuundu umanya sheesi uwashe aloma ta.”

⁸Aryo Umukasya waasalanisaka babaandu khukhwaama awo khuutsya mu shibala shoosi. Ni abweene awo baakamisa khukhwoombekha shiriimba.

⁹Isho nisho shishakila shiriimba isho shalaangibwa bari Babeli, lwekhuuba abweene awo, niwo isi Umukasya aakaraangaranisila luulomo lwe babaandu boosi. Ni khukhwaama abweene awo, waasalanisa babaandu khuutsya mu shibala shoosi.

¹⁰Bano nibo babaaba babetsukhulu ba Shemu. Lwanyuma lwe kimiiko kibili nga kameetsi kaaweeleele, Shemu aaba nga oolesa kimiiko shitoondo shitweela (100) kye buukhulu, waasaala Arupakusadi.

¹¹Ne lwanyuma lwe khuusaala Arupakusadi, aawaangala waamenyawo kimiiko kikiindi bitoondo biraano (500), waasaalayo babaana babaandi besiinde ni bekhaana.

¹²Nga Arupakusadi naye woolesile kimiiko kamakhumi kataru na kiraano (35) kye buukhulu, waasaalayo umwaana umusiinde, waamutwiikha lisiina ari Shela.

¹³Lwanyuma lwe khuusaala Shela, Arupakusadi aawaangala, waamenyawo kimiiko kikiindi bitoondo bine na kitaru (403), waasaalayo babaana babaandi besiinde ni bekhaana.

¹⁴Nga Shela naye woolesile kimiiko kamakhumi kataru (30) kye buukhulu, waasaala umwaana umusiinde waamutwiikha lisiina ari Eberi.

¹⁵Lwanyuma lwe khuusaala Eberi, Shela aawaangala, waamenyawo kimiiko kikiindi bitoondo bine na kitaru (403), waasaalayo babaana babaandi besiinde ni be khaana.

¹⁶Nga Eberi naye woolisile kimiiko kamakhumi kataru na kine kye buukhulu (34), waasaala umwaana umusiinde, waamutwiikha lisiina ari Pelegi.

¹⁷Lwanyuma lwe khuusaala Pelegi, Eberi aawaangala, waamenyawo kimiiko kikiindi bitoondo bine ni kamakhumi kataru (430), waasaalayo babaana babaandi besiinde ni bekhaana.

¹⁸Nga Pelegi woolesile kimiiko kamakhumi kataru (30) kye buukhulu, waasaala umwaana umusiinde, waamutwiikha lisiina ari Rewu.

¹⁹Lwanyuma lwe khuusaala Rewu, Pelegi aawaangala, waamenyawo kimiiko kikiindi bitoondo bibili na syeenda (209), waasaalayo babaana babaandi besiinde ni bekhaana.

²⁰Nga Rewu naye woolisile kimiiko kamakhumi kataru na kibili (32) kye buukhulu, waasaala umwaana umusiinde, waamutwiikha lisiina ari Serugi.

²¹Lwanyuma lwe khuusaala Serugi, Rewu aawaangala, waamenyawo kimiiko kikiindi bitoondo bibili na musaafu (207), waasaalayo babaana babaandi besiinde ni bekhaana.

²²Nga Serugi naye woolisile kimiiko kamakhumi kataru (30), waasaala umwaana umusiinde, waamutwiikha lisiina ari Nahori.

²³Lwanyuma lwe khuusaala Nahori, Serugi aawaangala, waamenyawo kimiiko kikiindi bitoondo bibili (200), waasaalayo babaana babaandi besiinde ni bekhaana.

²⁴Nga Nahori naye woolisile kimiiko kamakhumi kabili na syeenda (29), waasaala umwaana umusiinde, waamutwiikha lisiina ari Tera.

²⁵Lwanyuma lwe khuusaala Tera, Nahori aawaangala, waamenyawo kimiiko kikiindi shitoondo shitweela ni likhumi na syeenda (119), waasaalayo babaana babaandi besiinde ni bekhaana.

²⁶Nga Tera naye woolisile kimiiko kamakhumi musaafu (70), waasaala babaana besiinde bataru, nga nibo bano: Iburamu, Nahori, ni Harani.

²⁷Lusaalo lwa Tera lwaba luri: Tera aasaala Iburamu, Nahori, ni Harani. Harani naye waasaala Loti.

²⁸Lwanyuma Harani waafwiila mu shiriimba sheesi aasaalikhilamwo sha Uri[6], shishaba she Bakaludaaya, nga paapa weewe ashiiliwo mulamu.

²⁹Nabo Iburamu ni Nahori baayila bakhasi. Iburamu aayila umukhasi isi balaanga bari Sarayi, n'isi Nahori naye aayila nga bamulaanga bari Milika, uwaba umukhaana wa Harani naluundi paapa wa Isika.

³⁰Sarayi aaba umukuumba busa, niye s'asaalakho babaana ta.

³¹Tera waakhalawo khuuwuuya khukhwaama i Uri, khuutsya mu shibala sha Kanaani. Aryo waatsya ni Iburamu atweela ni Sarayi, umukhaana weewe umukhwe, uwaba umukhasi wa Iburamu, ni Loti umwitsukhulu weewe, uwaba umwaana wa Harani. Baryo ni beetsa boola mu Harani, baamenya ibweene iyo.

³²Tera waafwiila ibweene iyo mu Harani, nga woolisile kimiiko bitoondo bibili na kiraano (205) kye buukhulu.