Read lumasaaba Khuurakikha 14 Bible Online

Khuurakikha 14 - lumasaaba bible

Khuurakikha 14

¹Khu mbuka iyo, Amurafeli umuyiinga wa Shinari, ni Ariyoki umuyiinga wa Elasari, ni Kedorilawomeri umuyiinga Elamu, ni Tidali umuyiinga Goyiimu,

²baatsya bebwakala Bera, umuyiinga wa Sodomu, ni Birisha, umuyiinga Gomora, ni Shinabu, umuyiinga wa Adima, ni Shemeberi, umuyiinga wa Zeboyiimu, n'umuyiinga wa Bela. Bela alala shishimanyikhaane nga Zowari.

³Bayiinga bano baraano, betubaasa atweela, baara kamaye kaabwe atweela mu Litila lya Sidimu, alala isi balaanga bari Dedi Si[8].

⁴Abe khuumala kimiiko likhumi na kibili kimibuufu, baaba nga bawulibwa n'umuyiinga Kedorilawomeri. Ne mu mwiiko kukuukhola likhumi na kitaru, baakhalawo khuumuminyaalila.

⁵Kila mu mwiiko kwe likhumi na kine umuyiinga Kedorilawomeri atweela ni basheewe, baatsya bebwakala, luundi baawula babaandu ba Refayimu mu Ashiterosi-Karinayimu, ni ba Zuzi mu Hamu, ni ba Emi mu Shave-Kiriyasayimu.

⁶Ni khuulooselakho baatsya baawula babaandu ba Hori, mu shibala she mu ngoongo sha Edomu[9], khuutsya khukhwoolela ilala i Eli-Parani, shishiili aambi ni kumubiimbi.

⁷Khukhwaama awo, baashuukha baatsya i Eni Mishipati, alala shishimanyikhaane nga Kadeshi. Lwanyuma baawaamba shibala shoosi shishaba she ba Amaleki, baawula ni babaandu ba Amori boosi, babaaba bamenya mu Hazazoni-Tamari.

⁸Lwanyuma kila nabo bayiinga nga, umuyiinga wa Sodoma, n'uwa Gomora, n'uwa Adima, n'uwa Zeboyiimu, n'uwa Bela, babuusanisa kamaye kaabwe, baatsya bebuusila mu Litila lya Sidimu

⁹khuutsya khuusoolana ni Kedorilawomeri umuyiinga wa Elamu, ni Tidali umuyiinga wa Goyiimu, ni Amurafeli umuyiinga wa Shinari, ni Ariyoki umuyiinga wa Elasari, bayiinga bane nga basoolanisa bayiinga baraano.

¹⁰Ne Litila lya Sidimu lino abe lyaayitsulamwo kamalowo ni kamalowo. Shikila bayiinga uwa Sodomu, n'uwa Gomora, ni baaba nga batitukha khukhwaama mu busoolo atweela ni kamaye kaabwe, baalala baakwaka mu malowo ako. Ne babaaramile baatitukha, belukhila mu shibala she mu ngoongo.

¹¹Baryo baasiku baabwe baatsya bayaaya bye buyiindifu khukhwaama mu Sodomu ni mu Gomora, ni bye khuulya byaabwe byeene, lwanyuma baakhuumba baatsya.

¹²Ni Loti, umwaana wa wandaaye wa Iburamu, uwaba nga amenya mu Sodomu, naye baamuyililamwo atweela ni bye buyiindifu byeewe byoosi.

¹³Khu mbuka yino, Iburamu umu Heburaniya, aaba nga amenya aambi ni kimisaala kye kamaani kikyaba kya Mamure umu Amori. Mamure atweela ni babandaaye Eshikolu ni Aneri, baaba nga bali be buusaale ni Iburamu. Yabawo umuundu mutweela uwatitukha khukhwaama isi buusoolo bwaba, weetsa waashiboolelakho Iburamu.

¹⁴Shikila Iburamu nga n'ashiwulila ari umulebe weewe Loti naye baamuyililemo nga umubowe, waalaanga atweela basaani beewe baaleekele mu bye busoolo, baboola bitoondo bitaru ni likhumi na shinaane (318), babaasaalikhila muungo mweewe. Aryo waatsya ni nabo nga aloonda khu bayiinga baane tsana abo, khukhwoolela ilala i Dani.

¹⁵Mu shilo isho, waakabananisamwo liiye lyeewe, khuutsya bebwakale baasiku khukhwaama mu soonda tsoosi. Baryo baatsya babebwakala, baabawula, naluundi baabatimisa khuutsya khwoola i Hoba, shishaba ingaaki wa Damasiko.

¹⁶Musaambo iyo, Iburamu waakobosa bibiindu byeesi baayaaya byoosi. Aryo waakobosa n'umwaana wa wandaaye, Loti ni bye buyiindifu byeewe byoosi, atweela ni bakhasi, na buli muundu yeesi abe isi baawaamba.

¹⁷Aryo Iburamu waakobola lwanyuma lwe khuuwula umuyiinga Kedorilawomeri ni bayiinga babaandi abo. Umuyiinga wa Sodomu weetsa khukhwakaanana Iburamu mu Litila Shave, alala lyeesi abe balaanga bari Litila ly'Omuyiinga.

¹⁸Ni Melekizedeki umuyiinga wa Salemu, uwaba umusaayi wa Wele Uuli angaaki luukali, waareera kumukaati ni viini,

¹⁹kila awa Iburamu tsikhabi nga amulomela ari, “Khali Wele uwe Angaaki Lukali, akhuweele iwe tsikhabi, Niye Umubuumbi we Likulu ni Shibala

²⁰Naluundi aruuyibwe naabi Wele uwe Angaaki Lukali uwakhunyalisile iwe khuuwula baasiku boowo!” Aryo Iburamu waawa Melekizedeki shitweela she likhumi she bibiindu byoosi byeesi aaba nabyo.

²¹Umuyiinga wa Sodomu kila alomela Iburamu ari, “Sheesi ise ikhukanakho nibo babaandu baase bonyene. Ne unyala weramisila bye buyiindifu byoosi.”

²²Naye Iburamu weelamwo umuyiinga wa Sodomu ari, “Ise naamalile khaale khukhwitsuba isi Umukasya Wele Uwe Angaaki, nga niye Uwabuumba Likulu ni Shibala,

²³nga inoma ndi mbaawo shishiindu shoosi shishiili shishoowo, sheesi ise kane niiramisile ta, abe yakhaba khaawutsi, namwe lukoye lulubowa shilaalo ta! Nio iwe ulekhe khuuloma uri ise naayiindiile khulwe bibiindu byoowo ta.

²⁴Ari kumukabo kwase khayo kube biilyo byeesi basaani baase baaliile byonyene. Ne lekha basaale baase bano Aneri, ni Eshikolu, ni Mamure, bayile kumukabo kwaabwe.”