Read lumasaaba Khuurakikha 17 Bible Online

Khuurakikha 17 - lumasaaba bible

Khuurakikha 17

¹Khu mbuka isi Iburamu oolesela kimiiko kamakhumi syeenda na syeenda (99) kye buukhulu, Umukasya waabonekhela Iburamu, waamulomela ari, “Ise ndi Wele umunyali wa byoosi. Ingana iwe ukyeendatsakile mu ntsila tsase naluundi ingana ukholatsake bye bukwalaafu.

²Kane ise ingumise indakaano akari aase ni nawe, naluundi kane imbalaayise lisaaye lye babetsukhulu boowo libe liikali naabi.”

³Lwe lomo iyo, Iburamu weenamisa kumurwe kweewe aasi khwiiloba, kila Wele amulomela ari,

⁴“Yino niyo indakaano yase ni nawe: Ikhusuubisa ndi iweewe utsya khuuba paapa we kamanaambo kamakali kameene.

⁵Lisiina lyoowo singene libe Iburamu luundi ta, ne kane ulaangibwatsake Iburayimu[12], lwekhuuba naakhwikyelisile iwe khuuba paapa we kamanaambo kamakali kameene.

⁶Indi khuutsya khuukhuwa iwe lisaaye lye babetsukhulu liikali lilyeene. Mu mbuka iye mu moni, bakheekyelemwo kamanaambo ke kamaani. Ni baalala khu nibo beekyele baayiinga.

⁷Ise kane iniinde shisuubiso she ndakaano yase isi ikholile ni nawe, atweela ni babetsukhulu boowo babaaliilawo lwanyuma lwoowo, biilo ni biilo bibiitsa mu moni. Ise kane imbaatsake Wele woowo, luundi Wele we babetsukhulu boowo.

⁸Ise ikhaakhuwe iwe ni nabo liiswa lyoosi mweesi iwe aluno uli khuumenyamwo nga umukyeendaani busa. Ikhaakabile liiswa ilyo lya Kanaani lyoosi isi babetsukhulu boowo, khuuba lilyaabwe biilo ni biilo, ni nase kane imbatsake Wele waabwe.”

⁹Lwanyuma ndi Umukasya waalomela Iburayimu ari, “Iwe Iburayimu, atweela ni babetsukhulu boowo babaliilawo, mwaakha khuuliinda indakaano yino, kimiboolo ni kimiboolo kikiitsa iburaangisi.

¹⁰Indakaano isi iwe ni babetsukhulu boowo muli ni khuuliindila ilala, akari eenywe ni nase, niyo iye khuufukiilila khukhwiinjila imbalu. Buli mwaana umusiinde yeesi musiinywe, aakha khuukhebebwa imbalu.

¹¹Muli ni khukhwiinjila imbalu, lwekhuuba niyo ikane ibe khaabonelo khe ndakaano ikholibwile akari owo ni nase.

¹²Khukhwaama aluno ari khukhwoola mu miboolo kyoowo kikiitsa iburaangisi, buli uwesaani yeesi, usaalikhana muungo mwoowo, nga woolisile biifukhu shinaane bye buukhulu, aakha khuukhebebwa imbalu, namwe umuundu yeesi isi muba nga mwaakulile busa ni tsinusu khuumenya muungo mweenywe, naye aakha khuukhebebwa imbalu.

¹³Umuundu yeesi, oba waasaalikhiile muungo mwoowo, oba nga mwaamukulile busa ni tsinusu, aakha khuukhebebwa imbalu. Khano kane khabe khaabonelo khe khu ngaaki khakhabonekha, khakhokyesanisa indakaano yase iye biilo ni biilo.

¹⁴Uwesaani yeesi uliba nga waakhukhebewa imbalu ta, aba waakhuliinda indakaano yase ta. Nashiryo umuundu uyo, aba s'abalibwa khuuba mutweela khu baandu baase ta, lwekhuuba aba waafuniaakile indakaano yase.”

¹⁵Wele waalomela luundi Iburayimu ari, “Lisiina ly'omukyelama woowo s'ulimulaanga luundi ari Sarayi ta, ne kane umulaangatsake uri Sara[13].

¹⁶Kane imuwe tsikhabi, ni nawe ulisaala ni naye umwaana umusiinde. Kane imuwe tsikhabi khukhwoolesa ni kane abe maayi uwe kamanaambo kamakali, ni baalala khu betsukhulu beewe bakhaabe bayiinga.”

¹⁷Lweesho Iburayimu weenamisa kumurwe kweewe aasi khwiloba, ne waaba nga ambaasa mu mwoyo kweewe, nga atsekha busa ari, “Muundu shiina unyala waasaala umwaana nga woolisile kimiiko shitoondo shitweela (100) kye buukhulu? Ni Sara naye ari woolisile kimiiko kamakhumi syeenda kimibuufu (90), ilala anyala wasaala umwaana?”

¹⁸Lwanyuma kila Iburayimu alomela Wele ari, “Ne shiina kila Ishimaeli akhaba niye usikhila ibyo byeesi waasuubisa ise?”

¹⁹Ne Wele naye waamwiilamwo ari, “Taawe! Umukyelama woowo Sara, alikhusaalila umwaana umusiinde. Ni nawe ulimutwiikha lisiina uri Isaaka[14]. Ise indiŋaŋasa indakaano yase ni naye atweela ni babetsukhulu beewe, khuuba indakaano iye biilo ni biilo.

²⁰Ne ibyo bibiwaamba khu Ishimaeli byeesi uloombile, naabiwuliile. Kane imuwe tsikhabi, naye asaale lisaaye liikali, abe ni babetsukhulu baakali naabi. Naye kane abe paapa we baawuli likhumi na babili, naluundi ikhole lisaaye lyeewe libe linaambo lye kamaani.

²¹Ne indakaano yase indi khuukiŋaŋasa ni Isaaka, isi Sara alikhusaalila iwe, mu mbuka nga yino, kumwiiko kukwiitsa.”

²²Wele waamaliilisa khuukanikha isi Iburayimu, lwanyuma waamulekhawo, waatsya.

²³Lwanyuma khu shifukhu khweene ikhwo, Iburayimu waayila umusooleli weewe Ishimaeli, waamukheba imbalu, atweela ni baakulwa boosi babaasaalikhila muungo mweewe, namwe beesi aakula ni tsinusu tseewe, ni besaani boosi babaaba muungo mweewe. Bino byoosi aabikhola khuusiintsiila khwiibyo byeesi Wele aamulakila.

²⁴Iburayimu aaba oolesa kimiiko kye buukhulu bweewe kamakhumi syeenda na syeenda (99) khu mbuka isi enjililakho imbalu,

²⁵n'umusooleli weewe Ishimaeli aaba nga oolesa kimiiko likhumi na kitaru (13).

²⁶Baryo Iburayimu n'umusooleli weewe Ishimaeli benjila imbalu khu shifukhu sheene shitweela,

²⁷nga waayililemo atweela ni baakulwa besaani boosi babaaba muungo mweewe, ni babaasaalikhilamwo, ni naabo beesi aakula nga araambisa tsinusu tseewe.