Read lumasaaba Khuurakikha 18 Bible Online

Khuurakikha 18 - lumasaaba bible

Khuurakikha 18

¹Aabawo lutweela, Iburayimu aaba nga wekhaale amulyaango kwe lisari lyeewe, lilyaba aambi ni kimisaala kye kamaani kya Mamure. Tsaba tsinyaanga tse kumuusi mwihangilwe, nga inyaanga yebaanduule naabi.

²Kila uri Iburayimu enyusa tsimoni tseewe, waabona basaani bataru nga beemikhile aambi awo. Aryo wenyukhilamwo khaangu waatsya khuubakaanila, weenamisa kumurwe kweewe aasi khwiiloba.

³Lwanyuma waabalomela ari, “Basakhulu, inywe siinga mubona muri shili shiilayi, imbaloomba ndi mukhaambiriirira busa ta.

⁴Khayo imbareerereyo kameetsi, musiingekho bikyele byeenywe, lwanyuma mwikhalekho aasi e kuusaala, muwolekho.

⁵Lwanyuma kane intsye imbareerereyo khe khuulya, nio munyale khuufuna kamaani kakaakane kabanyalisise khukhwiilooselayo ni lukyeendo. Inywe mwambeesile ise lukoosi khukhwiitsa isi indi, mufukiilise imbakaanise.” Nabo baamwiilamwo bari, “Shiilayi, n'utsye ukhole nga niwaama khuloma.”

⁶Iburayimu waatimaka khaangu waatsya mu lisari, waalomela Sara ari, “Yuubakho! Bukula khaangu isawu iye buufu, ubuŋooneŋoone, ukholeyo kumukaati.”

⁷Nga waamalile aryo, waatimaka khaangu waatsya mu litaala lyeewe lye tsikhaafu, waabukulayo imasoti, inere, ifuurayo buulayi, waakiwayo isi umuraambi, khuutsya khukisala.

⁸Lwanyuma lwayo, waabireera, waakabulila bakyeni beewe kamabeele kamabwowu, ni kamabeele busa, atweela ni nyama tsana intsoshe. Baryo ni baaba nga balikho balya, Iburayimu umweene waaba nga weemikhile aambi awo, mwisina mwe kuusaala.

⁹Kila bamureeba bari, “Umukyelama woowo Sara ali waheena?” Naye waabeelamwo ari, “Ali mukari mu lisari.”

¹⁰Kila Umukasya aloma ari, “Ise indikobola ano khu mbuka nga yino kumwiiko kukwiitsa, n'umukyelama woowo Sara aliba waasaalile umwaana umusiinde.” Khu saawa iyo, Sara aaba nga weemikhile inyuma wa Iburayimu, a mulyaango kwe lisari.

¹¹Iburayimu ni Sara boombi baaba nga bahaangaale mu miiko, ni Sara aaba waabira khaale kimiiko kye khuusaala babaana.

¹²Aryo Kila Sara atsekha, nga elomela umweene ari, “Ise naakora khaale ndi, n'umusakhulu wase naye waakora, khunyala khwasaala umwaana mu miiko kino?”

¹³Kila Umukasya areeba Iburayimu ari, “Lwashiina kila Sara atsekhile? Lwashiina aloma ari, ‘Kane inyale indyeena khuusaala umwaana nga naamala khuukora ndi?’

¹⁴Manya iliwo shishiindu shishikhaasa Umukasya khuukhola? Nga niimalile khaale khuuloma, ikhaakobole ano khu mbuka yino mu mwiiko kukwiitsa, ni Sara akhaabe nga waasaala khaale umwaana umusiinde.”

¹⁵Ne Sara waaba nga waariire, kila ekaana nga aloma ari, “Ise sinatsekhilekho ta.” Ne Umukasya waaloma ari, “Khuutsekha nikhwo utsekhile.”

¹⁶Lwanyuma basaani tsana bataru bano, benyukha nga bakana khutsya, baalola kwe Sodomu, ni Iburayimu waakyeendakho ni nabo nga abaroongesa.

¹⁷Kila Umukasya elomela umweene ari, “Ilala ise kane imbisabise Iburayimu sheesi indi khuutsya khuukhola?

¹⁸Ate Iburayimu yuno atsya khwikyelamwo linaambo lye kamaani luundi likhulu naabi, ni kamanaambo koosi ke mu shibala katsya khuuweebwa tsikhabi khuubirira mu niye.

¹⁹Ise naamuroboore niye khuubona ari aleekela babaana beewe, ni babetsukhulu beewe boosi khuuloondelela kamakaambila kaase, khuukhola byeesi ise ingana. Lwe shisheene isho, intsya khukhwoolelesa isho sheesi namusuubisa khuumukholela.”

²⁰Lwanyuma kila Umukasya aloma Iburayimu ari, “Ise naawuliile bari babaandu ba Sodomu ni Gomora, bali khuukhola bibiindu biibi naabi, ni bubwoonaki bwaabwe bwaabiriirire naabi.

²¹Nashiryo ari indi khuutsyayo nibonelekho samweene, oba nga ilala babaandu abo bali baabi naabi nga nishili khuuwulilikha. Ne siinga baba nga sibali baryo ta, ingana khuushiimanya.”

²²Baryo basaani bano baashuukhila abweene awo, baarakikha lukyeendo lwe khuutsya i Sodomu. Ne Iburayimu niye waarama nga weemikhile mu shifwo mubweene n'Umukasya.

²³Lwanyuma kila Iburayimu esyeenda aambi waareeba ari, “Umukasya, ilala uli khuutsya khuhesela atweela babaandu bakwalaafu ni baabi beene?

²⁴Ne siinga mu shiriimba umwo munyoolekhanamwo babaandu bakwalaafu kamakhumi karaano? Iwe s'unyala waasaasila shiriimba isho khulwe babaandu kamakhumi karaano ako ta?

²⁵Abe sishaakha khuuba shiryo ta. Iwe s'unyala waahesa babaandu bakwalaafu atweela ni baabi beene ta. Sishinyalikha bakwalaafu khuukabananila atweela mu shitaambiso isho ta. Iwe s'unyala waakhola isho ta. Iwe uli Umukayi uwe shibala shoosi, ukhola bibyaakhila.”

²⁶Kila naye Umukasya amwiilamwo ari, “Siinga nga inyoolayo babaandu kamakhumi karaano bakwalaafu mu Sodomu, kane isaasile shiriimba isho khulwaabwe.”

²⁷Iburayimu ndi waakanikha luundi nga aloma ari, “Khukhwaama niindakikhile khuukanikha lubuula ndyo isi Umukasya, abe yakhaba nga indi litosi busa luundi likokhe, isaasile busa.

²⁸Ne siinga unyoolamwo babaandu kamakhumi kane na baraano bonyene babaali bakwalaafu? Kane uwese shiriimba isho shoosi lwekhuuba babaandu baraano sibalikho ta?” Umukasya weelamwo ari, “Singene imbese shiriimba isho ta, siinga inyoolamwo babaandu kamakhumi kane na baraano bakwalaafu.”

²⁹Luundi ndi Iburayimu waareeba ari, “Ne siinga munyoolekhamwo kamakhumi kane konyene?” Umukasya weelamwo ari, “Khulwe kamakhumi kane ako, singene imbese shiriimba isho ta.”

³⁰Iburayimu waaloma luundi ari, “Umukasya ukhaakhalalila nga naareebile luundi ta. Ne siinga unyoolamwo babaandu baalayi kamakhumi kataru konyene?” Umukasya weelamwo ari, “Khulwe kamakhumi kataru ako, singene imbese shiriimba isho ta.”

³¹Lwanyuma kila Iburayimu aloma ari, “Khukhwaama nga ninyalisile khuukanikha isi Umukasya, khayo indeebe, ne siinga munyoolekhamwo kamakhumi kabili konyene?” Umukasya weelamwo ari, “Khulwe kabili abo, singene imbese shiriimba ta.”

³²Lulwakamayo Iburayimu waaloma ari, “O Umukasya, ukhaakhalalila ta, ne khayo indeebeyo kumuluundi kuno mutweela kwonyene. Ne siinga unyoolamwo likhumi bonyene?” Umukasya weelamwo ari, “Khulwe likhumi abo, singene imbese shiriimba isho ta.”

³³Lwanyuma lwayo nga Umukasya waamalile khuukanikha ni Iburayimu, waamulekha waatsya, ni Iburayimu naye waakobolayo ingo weewe.