Read lumasaaba Khuurakikha 21 Bible Online

Khuurakikha 21 - lumasaaba bible

Khuurakikha 21

¹Umukasya waaba uwe shiisa naabi isi Sara, waamukholela nga n'aba waamala khuumusuubisa.

²Sara waaba shisoombo, waasaalila Iburayimu umwaana umusiinde mu busakhulu bweewe, khu mbuka nyene isi Umukasya aaba waasuubisa.

³Iburayimu waatwiikha umwaana isi Sara aamusaalila lisiina ari Isaaka.

⁴Aryo Isaaka n'aba nga woolesile biifukhu shinaane bye buukhulu, Iburayimu waamukheba imbalu, nga Umukasya umweene n'alakila.

⁵Khu mbuka isi Isaaka aasaalikhilakho, Iburayimu aaba waayolesa kimiiko shitoondo shitweela (100) kye buukhulu.

⁶Sara waaloma ari, “Wele wambeele kumwikhoyo ni tsintsekho. Nashiryo buli mutweela ukane ashiwulilekho, kane atsekhe asangaale ni nase.”

⁷Sara waalooselakho ari, “Abe naanu unyala waaboolela Iburayimu ari luliba lutweela Sara anuunisekho babaana? Ne ari bona ise naamusaaliile umwaana umusiinde mu busakhulu bweewe.”

⁸Umwaana uyo waatsowa, woola khuurura khu mabeele, ni khu shifukhu khweene ikhwo, Iburayimu waakabula kamayiiya ke kamaani naabi.

⁹Shifukhu shitweela, Sara waabona Ishimaeli umwaana wa Hagari uwe Misiri nga alikho enyaha n'umwaana weewe Isaaka.

¹⁰Kila alomela Iburayimu ari, “Woona umukulwa yuno n'umwaana weewe batsye. Lwekhuuba umwaana uw'omukulwa yuno s'anyala waafunakho bye buusikha, nga abukabanana n'umwaana wase Isaaka ta.”

¹¹Shishiindu shino shatsiina naabi Iburayimu, lwekhuuba shaba shiwaamba khu mwaana weewe Ishimaeli.

¹²Ne Wele waalomela Iburayimu ari, “Kumutaambo kukhakhuwaamba khulw'omwaana umusiinde yuno ni lw'omukulwa Hagari ta. Khola shoosi sheesi Sara ali khuukhulomela khuukhola. Isaaka niye uliba uwe lisaaye lilimanyikhaane, lyeesi nakhusuubisa.

¹³Ne umusooleli yuno isi umukulwa aakhusaalila, naye kane imuwe lisaaye liikali likyele linaambo, lwekhuuba naye umwaana woowo.”

¹⁴Antsye ni bwasha kumutikhinyi mu mamilimili, Iburayimu waabukula kimikaati, ni isutilo iye lihaafu iyitsuulemo kameetsi, waabiwa Hagari. Aryo waabisuta waabira khu mabeka ka Hagari, waamuwoona waatsya n'umusooleli weewe. Hagari wahaamba intsila waatsya nga akyeendana busa mu mubiimbi kwa Berisheba.

¹⁵Kameetsi ni kaabawakho, Hagari waabiikha umwaana weewe aasi e shitsakha.

¹⁶Lwanyuma wakyeenda waatsya wekhala aasi mu shifwo aleeyikho, lwekhuuba elomela mu mwoyo kweewe ari, “Sinyala naaba ano, naalolelela umwaana wase nga afwa ta.” Aryo n'aba nga wekhaale abweene awo, waarundukha kamasika waalila.

¹⁷Ne Wele n'awulila khuulila khw'omwaana, malayika wa Wele khukhwaama mwikulu, waakuukuula isi Hagari nga amuloma ari, “Lwashiina kumutaambo kwakhuwaambile? Ukharya ta. Lwekhuuba Wele waawuliile umwaana nga n'ali khuulilila awo isi ali.

¹⁸N'umwinyuse aasi, umuwaambe kumukhono, lwekhuuba intsya khumwikyelisa linaambo lye kamaani.”

¹⁹Aryo Wele waabiimbula tsimoni tsa Hagari, waabona isebele iye kameetsi, waatsya isi ili, weetsusa isutilo iye lihaafu tsana ni kameetsi. Lwanyuma waawakho umusooleli weewe kamalala khuunywa.

²⁰Umusooleli uyo waatsowa nga Wele umweene niye umulolelela. Aryo waamenyatsaka iyo mu mubiimbi, wekyela umumanyilifu naabi mu bye khuuraambisa buyiingo.

²¹Nga amenya iyo mu mubiimbi kwa Parani, maayi weewe waamufunila umukhasi umu Misiri khuuyila.

²²Khu mbuka nyene iyo, Abimeleki atweela n'umukhulu weewe uwe liiye lyeewe isi balaanga bari Fikolu, waaloma Iburayimu ari, “Wele ali ni nawe mu buli shiindu shoosi sheesi ukhola.

²³Ari ise ingana untsitsubile mu lisiina lya Wele, nga uloma uri kane ubatsake umwiyikinwa isi ise, n'isi lisaaye lye babetsukhulu baase boosi, nga nase samweene ni mbeele umwiyikinwa isi iwe mu shibala shino, mweesi ubeele umenya nga umuwuuyi busa.”

²⁴Iburayimu naye weelamwo ari, “Ikhwitsubila.”

²⁵Lutweela, Iburayimu weelootsela Abimeleki ari, “Batweela khu bakaanisi boowo, baakhubukulakho ndweela khu sebele tseefwe tse kameetsi.”

²⁶Abimeleki naye weelamwo ari, “Ise naakhumanya naanu uwakhola shishiindu shino ta. Kuno nikwo kumuluundi kwase kukuunyoowa khuushiwulilakho, lwashiina ukhaamboolela khaale?”

²⁷Aryo Iburayimu waareera kamasheese ni tsiyeeyi, waabiwa Abimeleki. Musaambo iyo, basaani bano boombi baakhola ikwangwaani.

²⁸Iburayimu waawulakho kamasheese kamakhasi musaafu khukhwaama mu masheese kakaaramile, waakara andulo.

²⁹Kila Abimeleki amureeba ari, “Lwashiina kila waama khukhola shishiindu shino?”

³⁰Iburayimu waamwiilamwo ari, “Ingana ufukiilise kamakheese kamakhasi kano musaafu khukhwaama isi ise, khuuba umujulilwa uri iseese niye uwalima isebele iye kameetsi yino.”

³¹Kila shiifwo isho bashiilaanga bari Berisheba[16], lwekhuuba basaani bano boombi baakholela abweene awo shishitsubo.

³²Nga ni baamala khuukhola indakaano yino i Berisheba, Abimeleki ni Fikolu, umukhulu uwe liiye lyeewe, beelayo mu shibala she ba Filisitiya.

³³Abweene awo, Iburayimu waabyaala kuusaala tamarisiki[17] i Berisheba, lwanyuma wesaaya Umukasya Wele Ukhawawo biilo ni biilo.

³⁴Aryo Iburayimu waamenya imbuka indeeyi naabi, nga umuwuuyi busa mu shibala isho she ba Firisitiya.