Read lumasaaba Khuurakikha 22 Bible Online

Khuurakikha 22 - lumasaaba bible

Khuurakikha 22

¹Nga abirirewo kimiiko kikyoolakho, Wele waakhalawo khuukhakilisa Iburayimu. Kila amulaanga ari, “Iburayimu!” Iburayimu naye weelamwo ari, “Ise niyooyu.”

²Kila Wele amulomela ari, “Tsya uyile umusooleli woowo mutweela yenyene Isaaka uyo, isi ukana naabi! Umuyile mu shibala sha Moriya, ni nase kane ikhwookesanise lukiingi khweesi kane umuwaanilekho nga isaayilo intsoshe.”

³Aryo Iburayimu waawuuna naabi kumutikhinyi kukweelakho, waasaaka tsiikhu tse khukhwoosha shiwaanwa. Lwanyuma waatsira khu sikilya yeewe, wenyukha waatsya mu shifwo sheesi Wele aamulomela khuutsya, nga ali ni Isaaka atweela ni babaakaanisi beewe babili.

⁴Lwanyuma lwe khuukyeenda biifukhu bitaru, Iburayimu wenyusa tsimoni tseewe, waabona shiifwo tsana nga shili ataayikho.

⁵Kila alomela babaakaanisi beewe ari, “Inywe ni murame ano atweela ni sikilya. Ise n'umusooleli wase Isaaka kane khutsye khwisaayekho Umukasya mu shifwo she taayi isho. Lwanyuma kane khukobole isi muli.”

⁶Aryo Iburayimu wetyuukhisa Isaaka tsiikhu tsana, ne niye umweene waasuta kamaanda ke kumulilo ni kumubano. Ne ni baaba nga bakyeenda batsya,

⁷Isaaka waareeba paapawe ari, “Paapa, naaboone khwaasutile kamaanda ke kumulilo atweela ni tsiikhu, ne lisheese lye khukhwoosha lili eena?”

⁸Paapawe Iburayimu naye waamwiilamo ari, “Mwana wase, Wele umweene kane efunileyo[18] lisheese lye khukhwoosha.” Baryo boombi baaba nga beelooselayo ni lukyeendo lwaabwe.

⁹Ni baamala khukhwoola mu shifwo sheesi Wele aamuboolelakho, Iburayimu woombekha shisheeso, lwanyuma waashipaangakho tsiikhu buulayi. Nga waamalile aryo, wahaamba umusooleli weewe Isaaka, waamubowa kimikosi, waamwaalisa khu tsikhu khu ngaaki.

¹⁰Lwanyuma waabukula kumubano tsana khuusala umusooleli.

¹¹Ne Malayika w'Omukasya waakuukuula ni likono lye angaaki khukhwaama mwikulu nga aloma ari, “Iburayimu! Iburayimu!” Kila Iburayimu naye elamwo ari, “Ise niyooyu!”

¹²Malayika waamulomela ari, “Ukhasala umusooleli woowo, namwe waamukholakho shishiindu shiibi shoosi ta. Lwekhuuba ari ise naamanyiile ilala ndi, ufukiilisa luundi uwulila sheesi Wele akhulomela. Bona waafukiilila ni khuuwaanayo umwaana woowo, uuli mutweela yenyene aryo, isi ise!”

¹³Iburayimu wenyusa tsimoni tseewe, uri esheenga ari, waabona limiiku nga lyawaambikhiile mu shitsakha ni tsiintsika tsalyo. Aryo Iburayimu waatsya waalikhweesayo, waalireera, waaliwaanayo nga isaayilo intsoshe mu shifwo sh'omusooleli weewe.

¹⁴Kila Iburayimu atwiikha shiifwo isho lisiina ari, “Yehova Yire.” Ni khukhwoolesa ari babaandu baashiiloma bari “Khu lukiingi lw'Omukasya lweesi awaanilayo.”

¹⁵Malayika w'Omukasya waalaanga Iburayimu kumuluundi kwe khabili khukhwaama mwikulu,

¹⁶nga aloma ari, “Ise ndi Umukasya, nitsubila samweene mu lisiina lyase, nga inoma ndi, khukhwaama nga n'ubeele mwirekefu khuuwaanayo umwaana woowo natweela yenyene uyo, waalekha khumwiimana ta,

¹⁷Ilala kane ikhuwe iwe tsikhabi, imbalaayise lisaaye lye babetsukhulu boowo, bayiimbe babe baakali bafwaane nga tsinieniesi tse khwikulu, namwe bafwaane busa nga kumuyekhe kwe khu ndulo khwe nyaantsa. Babetsukhulu boowo bakhaasoolanise luundi bawule baasiku baabwe, bayile biriimba byaabwe abe mweesi bamenya.

¹⁸Ni kamanaambo koosi ke khu shibala kakhaafune tsikhabi khuubirira mu betsukhulu boowo, lwekhuuba iwe waawuliilisile byeesi ise inoma.”

¹⁹Lwanyuma lwayo Iburayimu waakobolayo isi aalekha babaakaanisi beewe, baryo bawaamba lukyeendo baakobolayo i Berisheba isi Iburayimu aamenyatsaka.

²⁰Lwanyuma lwa bino byoosi, Iburayimu waashiwulilakho ari Milika waasaalila Nahori babaana besiinde musaafu, nga nibo bano:

²¹Uzi niye uwaba umukiboole, ni wandaaye bari Buzi, ni Kemuweli uwaba paapa wa Aramu,

²²Khesedi, Hazo, Piludashi, Jidilafu, ni Besweli.

²³Besweli niye uwekyela paapa wa Rebeka. Milika aasaalila Nahori waandaaye wa Iburayimu babaana besiinde shinaane.

²⁴Nahori aaba n'umukhasi uwe bulafu abe lisiina bari Rewuma. Rewuma yuno aasaalila Nahori babaana bano: Teba, Gahamu, Tahashi ni Maaka.