Read lumasaaba Khuurakikha 23 Bible Online

Khuurakikha 23 - lumasaaba bible

Khuurakikha 23

¹Sara aawangaala woolesa kimiiko shitoondo shitweela ni kamakhumi kabili na musaafu (127).

²Aryo waafwiila i Kiriyasi Aruba (nga nisho Heburoni) mu shibala sha Kanaani. Mu mbuka iyo, Iburayimu wewunamila lwe kumutaambo kwe khuufwa khweewe.

³Lwanyuma Iburayimu wenyukhawo isi umufu weewe aaba, waatsya isi ba Hiiti, waabalomela ari,

⁴“Iseese ndi umuwuuyi busa mu shibala sheenywe, naluundi siindikho ni kumukuunda kwoosi mweesi inyala khuusiikha umukyelama wase ta. Ni mungulisekho kumukuunda inyalise khuusiikhamwo umufu wase.”

⁵Kila ba Hiiti beelamwo Iburayimu bari,

⁶“Musakhulu n'ukhurekeerese. Ifwe khukhubona iwe nga uli umuundu umukhulu naabi. N'utsye usiikhe umufu woowo mu ŋani ifuura buulayi naabi. Mbaawo umuundu na mutweela akari musiifwe, unyala waakhukhaangabisa iwe khuusiikha umufu woowo ta.”

⁷Kila Iburayimu enyukha aasi, enamisa kumurwe kweewe isi babaandu ba Hiiti bano,

⁸lwanyuma waabalomela ari, “Inywe siinga muba nga muufukiilisa ise khuusiikha umukyelama wase ano, imbaloomba munoombele Efuroni, umusooleli wa Zohari,

⁹muri angulisekho liifuluma Makipela, liliili ibwaakamilo we kumukuunda kweewe. Mumunoombela akuungulise khu nusu tsoosi tsitsoolana ni nakwo, ni nase kane imusasule nga mweesi mubona, nio kube kukwase nga kwe khuusiikhatsakamwo baafu baase.”

¹⁰Khu mbuka iyo, Efuroni umu Hiiti, aaba nga wekhaale aambi ni shilibwa she shiriimba atweela ni babaandu beewe. Kila alomela Iburayimu nga babaandu ba Hiiti boosi bawulila ari,

¹¹“Musakhulu, ikhuloomba undekeerese buulayi. Ise indi khuukhuwa iwe kumukuunda ukwo, ni liifuluma lyamwo lyeene, ni babaandu baase bano bali baaboni. Indikhuukhuwa kumukuunda kuno kube kukwoowo usiikhatsakemo baafu boowo.”

¹²Kila luundi ndi Iburayimu wenamisa kumurwe kweewe aasi isi babaandu ba Hiiti abo,

¹³waalomela Efuroni nga babaandu boosi baawulila ari, “Ise ndi khuukhuloomba iwe aluna ari, ikhuloomba undekeeresekho. Iseese ndi khuukana khuukhusasula tsinusu tsitsoolana ni kumukuunda kuno, nase inyalise khuusiikhamwo kumulaambo kw'omukyelama wase.”

¹⁴Efuroni weelamwo Iburayimu ari,

¹⁵“Musakhulu, kumukuunda kuno kwoolesamwo busa bisiintsa bye feetsa bitoondo bine (400) byonyene. Ne bibyeene ibyo binyala byakhola shiina akari owo ni nase. N'uyile liiswa ilyo usiikhemwo umufu woowo.”

¹⁶Aryo Iburayimu waafukiilisana ni Efuroni, waapimisa bisiintsa bye feetsa bitoondo bine (400), byeesi aaloma nga babaandu boosi bawulila, lwanyuma waabimuwa, khusiintsila khu bipimo bibyaraambisibwa ni baasubusi khu mbuka iyo.

¹⁷Musaambo iyo, kumukuunda ukwo kukwaba kwa Efuroni i Makipela, aambi ni kimisaala kya Mamure, kweekyela kwa Iburayimu. Kumukuunda kuno kwayililamwo ni liifuluma lyamwo lyeene, ni kimisaala kyoosi kikyabamwo, khuutsya khukhwoolela ilala khu lwaakha khwakwo.

¹⁸Kumukuunda kuno kwamanyikha mu lubuula nga kwa Iburayimu, mu moni tse ba Hiiti boosi babaabawo khu shilibwa.

¹⁹Lwanyuma lwayo Iburayimu waasiikha umukyelama weewe Sara mwifuluma lye mu mukuunda kwe Makipela, aambi ni kimisaala kye Mamure, shishaba i Heburoni, mu shibala sha Kanaani.

²⁰Kuryo kumukuunda kukwaba kwe ba Hiiti kweekyela kwa Iburayimu, nga bakhola tsindakaano, khuuba kwe khuusiikhatsakamwo baafu.