Read lumasaaba Khuurakikha 24 Bible Online

Khuurakikha 24 - lumasaaba bible

Khuurakikha 24

¹Khu mbuka yino, Iburayimu aaba nga wahangala mu miiko, nga ali umusakhulu. Umukasya aaba nga waamuwa tsikhabi tse buyiindifu, nga ali buulayi mu biindu byoosi byeesi aakholatsaka.

²Shifukhu shitweela, Iburayimu waalaanga umwakaanisi weewe abe ufuura bubwiyikinwa mu boosi, abe ulolelela bibiindu byoosi byeesi Iburayimu aaba ni nabyo, kila amuloma ari, “Ingana ure kumukhono kwoowo mu maraango kaase untsitsubile

³mu lisiina ly'Omukasya Wele, uwula likulu ni shibala, nga uloma uri singene uyilile umusooleli wase Isaaka umukhasi khukhwaama mu bakhaana be babaandu ba Kanaani, beesi imenyamwo bano ta.

⁴Ne ulome uri kane utsye mu shibala she weefwe isi nasaalikha, ufunile umusooleli wase Isaaka umukhasi mu balebe baase babeene.”

⁵Umwakaanisi yuno naye waareeba Iburayimu ari, “Ne siinga nga umukhasi mweene alekha khufukiilila khukhwiitsa ni nase ino? Ise inyala neesayo umusooleli woowo mu shibala isho sheesi iwe wasaalikhamwo?”

⁶Iburayimu naye waamwiilamwo ari, “Waakha khuushibona uri s'uwisayo umusooleli wase ibweene iyo ta.

⁷Umukasya uwula likulu ni shibala, niye uwandeera ise ino, khukhwaama mu shibala mweesi nasaalikha, waasuubisa ari kane ambe ise liloba lino khuuba lilyase biilo ni biilo. Ise naamanyile ndi iwe n'ukane utsye ibweene iyo, Umukasya kane akhurumanile malayika weewe khuukhuyeeta iwe, unyalise khuufunila umusooleli wase umukhasi.

⁸Ne siinga umukhasi uyo alekha khufukiilila khukhwiitsa ni nawe ta, shishitsubo shino singene shikhuwaambekho ta. Ne waakha khuubona uri s'uwisayo umusooleli wase ibweene iyo ta.”

⁹Aryo umwakaanisi yuno waara kumukhono kweewe akari e kamaraango[19] ka Iburayimu, nga amwiitsubila ari kane oolelese byoosi byeesi aamuloomba khuukhola.

¹⁰Lwanyuma lweebyo, umwakaanisi waabukula tsiŋamila tsa Iburayimu likhumi, waasuta ni biwaanwa bye lisuno bibiindi swa busa. Aryo wenyukha waarakikha lukyeendo lweewe khuutsya mu shiriimba sha Nahori, shishaba mu shisiintsa Mesopotamiya she ngaaki.

¹¹Nga n'amala khukhwoolayo, waakhola tsiŋamila khuukonakho aasi tsiwolekho aambi ni luluutsi lwe kameetsi lwe shiriimba. Tsinyaanga tsaba tse angoloobe tseesi bakhasi be mu shiriimba beetsilamwo khuutaha kameetsi.

¹²Abweene awo, umwakaanisi yuno waaloomba ari, “O Umukasya Wele isi umukoosi wase Iburayimu esaaya. Ikhuloomba umbe sheesi nitsililiile, woolelese shisuubiso shoowo isi umukoosi wase shaleelo.

¹³Bona ise neemikhile aambi ni isebele iye kameetsi yino, mweesi bakhaana be mu shiriimba bakana khukhwiitsa batahe.

¹⁴Ne umukhaana isi kane inoombe kameetsi indi, ‘Numbekho kameetsi inywekho khukhwaama mu soongwe yoowo.’ Ne naye waaloma ari, ‘N'unywe ni tsiŋamila tsoowo natso tsinywe,’ ise kane imanyile ilala ndi, umweene uyo niye isi uroboore, naluundi kane ishimanye ndi, woolelesile shisuubiso shoowo isi umukoosi wase.”

¹⁵Aryo n'aba nga ashiili khumaliilisa ni khuuloomba ta, Rebeka weetsa ni soongwe yeewe nga waakisutiile khu mabeka keewe. Niye aaba umukhaana wa Besweli, umusooleli wa Milika, uwaba umukhasi wa Nahori, waandaaye wa Iburayimu.

¹⁶Umukhaana yuno aaba abonekha buulayi naabi, nga ali indungubaasi busa, ukhaabatsakakho n'umuseetsa yeesi ta. Aryo waabirawo, weekha mu sebele, waataha kameetsi, weetsusa isoongwe yeewe, waarura ibulafu.

¹⁷Umwakaanisi tsana waayubakilisa, waatsya khaangu isi umukhaana tsana waamulomela ari, “Ikhuloomba ndi umbekho kameetsi, inywekho khukhwaama mu soongwe yoowo.”

¹⁸Umukhaana naye weelamwo ari, “N'unywekho musakhulu.” Aryo weenamisa khaangu isoongwe khukhwaama khu mabeka keewe, waamuwa waanywa.

¹⁹Aryo n'amala khuumuwa waanywa, waakyelawo waamulomela ari, “Ari ingana khuutayila ni tsiŋamila tsoowo kameetsi natso tsinywe kakaatsimala.”

²⁰Kila atsya khaangu, waatsukha kameetsi mu shitowo, waatimaka weelayo waataha kameetsi kakaandi, waareera kakaamala tsiŋamila tsoosi khuunywa.

²¹Biba biryo, umusaani aaba nga waasilile busa, nga alolelela khuubona oba nga Umukasya waamwiililemo sheesi aaloomba.

²²Nga tsiŋamila tsaamalile khuunywa kameetsi, umusaani yuno waabukula intsiyi iye zaabu iye lisuno naabi, waakimukwaarisa, waamusabikha ni birere bye zaabu khu makhono keewe.

²³Lwanyuma kila amureeba ari, “Imboolelekho, paapa woowo niye naanu? Ne manya muntsu mweenywe mulimo shiifwo mweesi khunyala khwaakona shiilo shino?”

²⁴Kila Rebeka naye weelamwo ari, “Paapa wase niye Besweli, umusooleli wa Nahori ni Milika.

²⁵Khuliyo ni bukono mweesi iwe ni basaani boowo munyala mwaakona, naluundi khuliyo ni bunyaasi bubunyala bwaamala tsiŋamila tsoowo buulayi naabi.”

²⁶Umusaani uyo weenamisa kumurwe kweewe aasi wesaaya Umukasya,

²⁷nga aloma ari, “Ikhusiima naabi iwe Umukasya Wele uw'omukoosi wase Iburayimu, uwolelesile shiisa shoowo shiikali ni bubweela bwoowo isi umukoosi wase. Naluundi bona waanaangirire buulayi waantsolesa mu balebe beewe babeene!”

²⁸Aryo Rebeka waatimaka waatsya muungo mwaabwe, waatsya waaboolela beengo bibiindu bino byoosi.

²⁹Rebeka aabakho n'umusaani weewe abe baamulaanga bari Labani, naye uwanyalisa khuurura waatimaka khaangu khu sebele, isi umusaani tsana aaba.

³⁰Biba biryo, abe Labani waaboone khaale intsiyi iye zaabu, ni biirere khu makhono keewe, naluundi aaba nga waawuliile byoosi byeesi Rebeka aaloma. Kila enyukha waatsya isi umusaani tsana uyo, uwaba nga weemikhile aambi ni tsiŋamila tseewe, aambi ni sebele.

³¹Kila Labani amulomela ari, “N'uwiitse khutsye ingo weefwe. Iweewe uli umuundu isi Wele amalile khaale khuuwa tsikhabi. Simbona ilomo lwashiina iwe urama nga weemikhile ibulafu busa uryo ta. Ise naamalile khaale khuuŋoonaŋoona shiifwo mweesi inywe munakona, ni mweesi tsiŋamila tsoowo natso tsinakona.”

³²Aryo umwakaanisi wa Iburayimu waatsya ingo ni Labani, baaruurisaka tsiŋamila bisutwa byeesi tsaba nga tsaasutile, lwanyuma baatsiwa bunyaasi khuulya. Lwanyuma ndi baareera kameetsi, baakawa umwakaanisi wa Iburayimu ni basaani beewe khuusiinga bikyele.

³³Ibyo nga byaweele, baabareerera biilyo. Ne umwakaanisi wa Iburayimu waaloma ari, “Nga ishiili khulya ta, ingana khuubaboolela ilomo inyene iyindeerire ano.” Kila Labani amulomela ari, “Kale khuboolele khubone.”

³⁴Umwakaanisi uyo waaloma ari, “Iseese ndi umwakaanisi wa Iburayimu.

³⁵Umukasya waawa umukoosi wase tsikhabi tsingali naabi, naluundi waamuwa buyiindifu bwe kamaani naabi. Waamuwa bibyaayo nga kamasheese, tsimbusi, tsikhaafu, tsiŋamila, ni tsisikilya, atweela ni feetsa ni zaabu, ni baakulwa baakali naabi.

³⁶Umukyelama w'omukoosi wase nga niye Sara, abe waakhusaalakho babaana ta, khukhwoolesa mu buloosi bweewe. Lwanyuma waamusaalila umwaana umusiinde mutweela isi aakabila bibiindu byoosi byeesi ali ni nabyo.

³⁷Umukoosi wase uyo, aakholesa ise shishitsubo, nga imulomela ndi kane noolelese byoosi byeesi aandakila khuukhola. Kila anomela ari, ‘Ukhafunila umusooleli wase umukhasi khukhwaama mu baandu ba Kanaani beesi ise imenyamwo ta.

³⁸Ne waakha khuutsya mu shibala she weefwe mweesi nasaalikha, uweentsele umusooleli wase umukhasi khukhwaama mu balebe baase babeene.’

³⁹Ne nase neelayo naareeba umukoosi wase nga inoma ndi, ‘Ne siinga umukhasi uyo alekha khuufukiilila khukhwiitsa ni nase?’

⁴⁰“Kila umukoosi wase antsilamwo ari, ‘Umukasya isi ise niyikinatsaka akhaakhurumanile malayika weewe khukhwiitsa akhuyeete, khukhwoolesa n'ulinyoolela umusooleli wase umukhasi khukhwaama mu balebe baase babeene.

⁴¹Ne siinga baalebe baase bamwiikaanisa khukhwiitsa ni nawe, kane ube umulekhuule, ni shitsubo isho singene shikhuwaambekho ta.’

⁴²“Ne ni noolile khu sebele shaleelo shino, inoombile Umukasya mu mwoyo kwase ndi, ‘O Umukasya Wele, isi umukoosi wase Iburayimu esaaya, ikhuloomba untsolelesile sheesi niitsile ano khuukhola.

⁴³Bona ise neemikhile ano khu sebele yino. Ne siinga ibawo umukhaana yeesi unanyoowa khukhwiitsa ano khuutaha kameetsi, inamuloomba ambekho inywe khukhwaama mu soongwe yeewe.

⁴⁴Ne siinga afukiilila waamba kameetsi naanywa, naluundi waawakho ni tsiŋamila tsase, inamanya ndi umweene uyo niye isi iwe uroboorere umusooleli w'omukoosi wase.’

⁴⁵“Imbeele nga ishiili khuumaliilisa ni khuuloomba ta, Rebeka weetsa khuutaha kameetsi ni soongwe yeewe khu mabeka khweewe. Ne n'amalile khuutaha kameetsi, imuloombile ndi ambekho inywe.

⁴⁶Naye aryo aruurire khaangu isoongwe yeewe waanomela ari, ‘N'unywe, lwanyuma intsye indayile tsiŋamila tsoowo natso tsinywe.’ Abweene awo ise inyweele, lwanyuma lwayo waatsya waatayila ni tsiŋamila tsase natso.

⁴⁷“Lwanyuma imureebile ndi, ‘Ne iwe uli umukhaana wa naanu?’ “Naye waantsilamwo ari, ‘Ise ndi umukhaana wa Besweli, umusooleli wa Nahori ni Milika.’ Iseese abweene ni abweene, imbukuule intsiyi naamusabikha, ni birere naabisabikha khu makhono keewe.

⁴⁸Lwanyuma neenama aasi kumurwe kwase, naasiima Umukasya Wele isi umukoosi wase Iburayimu esaaya, uwunaangiliile buulayi aryo, khukhuuntsolesa mu balebe b'omukoosi wase, naanyalisa khuufunila umusooleli weewe umukhasi.

⁴⁹Nashiryo imbaloomba mumboolele siinga nga shinaba nga shinyalikha, khuukholela umukoosi wase bye shiisa. Ne siinga nga ta, muumboolele, imbone kumukhoosi kukuundi kweesi inyala naawaamba.”

⁵⁰Kila Labani ni Besweli nabo bamwiilamwo bari, “Shino shibonekhana nga Umukasya umweene niye ushikholile. Ifwe sikhulikho ni shishiindu shoosi shishiindi sheesi khunyala khwaakanikha ta.

⁵¹Bona Rebeka uyu shiina, tsya ni naye, atsye abe umukhasi uw'omusooleli w'omukoosi woowo, nga Umukasya umweene n'ashikhalilewo.”

⁵²Aryo umwakaanisi wa Iburayimu n'awulila biilomo bino, weenamisa kumurwe kweewe aasi khwiloba, wesaaya Umukasya.

⁵³Lwanyuma waarusayo biiwaanwa bye bikwaaro, ni khuutubaasakho izaabu ni feetsa, waabiwa Rebeka. Waabukula biwaanwa bibiindi khu nibyo waabiwa waandaaye Labani, ni bibiindi isi maayi weewe.

⁵⁴Umwakaanisi wa Iburayimu atweela ni basaani beesi aaba ni nabo, baalya luundi baanywa, khukhwoolesa ni baakonela ibweene iyo. Ne ni bwasha kumutikhinyi, benyukha, kila aloma ari, “Ari imbaloomba muusiibule, niileyo isi umukoosi wase.”

⁵⁵Ne Labani atweela ni maayi weewe baalomela umwakaanisi yuno bari, “Khayo Rebeka amenyekho ni nafwe ano, khuumalakho imbuka iyoolakho, biifukhu nga likhumi biri, nio lwanyuma atsye.”

⁵⁶Ne naye umwakaanisi weelamwo ari, “Mukhaamenyesakho ano luundi ta. Bona Umukasya waanjeetile ise khuufunila umusooleli w'omukoosi wase umukhasi. Niimufukiilise ise niileyo isi umukoosi wase.”

⁵⁷Nabo beelamwo bari, “Khakhulaange Rebeka umweene khumureebe khubone.”

⁵⁸Kila nga baamulaangile baamureeba bari, “Iwe ufukiilila khuutsya n'umusaani uyu?” Naye waabeelamwo ari, “E e, ifukiilila.”

⁵⁹Baryo nabo baasibula umukooko waabwe Rebeka khuutsya, nga atsya n'umukyeesa weewe umukhaana, atweela n'umwakaanisi wa Iburayimu, ni basaani beesi aaba ni nabo.

⁶⁰Lwanyuma baawa Rebeka tsikhabi nga bamulomela bari, “Mukooko weefwe, khuuloomba khuri Wele akhuwe biikana ni kimikaanda kye lisaaye, naluundi babetsukhulu boowo abayeete khuuwula baasiku baabwe, bamenye mu biriimba byaabwe.”

⁶¹Lwanyuma lwayo, Rebeka ni baakyeesa beewe bekhaana, beŋoonaŋoona khuuwaamba lukyeendo. Baryo baaniina bekhala khu ŋamila tsaabwe, bawaamba lukyeendo atweela n'umwakaanisi wa Iburayimu ni basaani beesi aaba ni nabo.

⁶²Khu mbuka iyo, Isaaka aaba nga weetsile khukhwaama i Beya Lahayi Royi[20], lwekhuuba aaba nga amenya mu shisiintsa she mwaalo wa Kanaani.

⁶³Aryo Isaaka waatsya khukyeendakakho mu mukuunda khu nyaanga tse angoloobe, nga alikho ni byeesi eyambaasila. Uri enyusa tsimoni tseewe ari, waabonela aleeyikho tsiŋamila nga tsilikho tsiitsa luubeka lweewe.

⁶⁴Kila Rebeka naye nga weenyusile tsimoni tseewe, waabona Isaaka, weenyukha khu ŋamila yeewe, weekha aasi.

⁶⁵Kila areeba umwakaanisi wa Iburayimu ari, “Musaani shiina isi imbona uyo, nga akyeenda khukhwiitsa khukhwakaanana ni nafwe?” Umwakaanisi naye weelamwo ari, “Uyo niye umukoosi wase.” Rebeka waabukula shitambaala she ngubo webiimbilila.

⁶⁶Abweene awo, umwakaanisi waarakikha khuuboolela Isaaka bibiindu byoosi nga ni byakholekhana.

⁶⁷Aryo Isaaka waareera Rebeka mu lisari mweesi maayi weewe Sara aamenyatsaka nga ashiili khufwa ta, waamuyila khuuba umukhasi weewe. Isaaka waakana naabi Rebeka, ni kumutaambo kweesi aaba ni nakwo kwe khuufwa khwa maayi weewe kwaamuwakho.