Read lumasaaba Khuurakikha 25 Bible Online

Khuurakikha 25 - lumasaaba bible

Khuurakikha 25

¹Iburayimu aayila umukhasi ukuundi lisiina lyeewe bari Ketura,

²wasaala ni naye basooleli basesaba nga nibo: Zimurani, Yokushani, Medani, Midiyani, Ishibaka, ni Shuwa.

³Nga waatsowele, Yokushani ekyela paapa wa Sheba ni Dedani. Dedani naye nga waatsowele, aasaala basooleli bataru nga nibo Ashurimu, Letushimu, ni Lewumimu.

⁴Midiyani naye aasaala basooleli baraano nga nibo Efa, Eferi, Hanoki, Abida, ni Elida. Bano boosi baaba lisaaye lilyaama mu Ketura.

⁵Bye buyiindifu byoosi byeesi Iburayimu aaba ni nabyo, aabilekhela umusooleli weewe Isaaka.

⁶Ne naaba nga ashiili mulamu, basooleli beewe babaandi beesi aasaala ni Hagari ni Ketura, aabawa busa biiwaanwa, lwanyuma waabasiibula khuurura isi Isaaka, khuutsya khuumenya mu shibala shishaba i bwaamanyaanga.

⁷Kimiiko kyeesi Iburayimu aamala khu shibala kyoosi kyaba kyoola kimiiko shitoondo shitweela ni kamakhumi musaafu na kiraano (175).

⁸Lwanyuma lwayo Iburayimu waafwa, nga waakhulile mu miiko, baryo baamusiikha.

⁹Baasooleli beewe, Isaaka ni Ishimaeli nibo babaamusiikha mu Lifuluma lya Makipela, lilyaba aambi ni Mamure, mu mukuunda kukwaba kwa Efuroni umusooleli wa Zohari umu Hiiti.

¹⁰Kumukuunda kuno nikwo kweesi Iburayimu aakula khukhwaama khu ba Hiiti, nimwo mubweene umwo mweesi niye atweela n'umukyelama weewe Sara baasiikhibwa.

¹¹Lwanyuma lwe khuufwa khwa Iburayimu, Wele aawa naabi Isaaka tsikhabi, khu mbuka iyo aaba nga amenya i Beya Lahayi Royi.

¹²Lino nilyo lisaaye lya Ishimaeli, umusooleli wa Iburayimu, isi Hagari, umukhasi umu Misiri, uwaba umwakaanisi wa Sara, aasaalila Iburayimu.

¹³Ishimaeli aasaala basooleli likhumi na babili, ni kamasiina kaabwe khuusiintsiila mu khusaalikha niko kano; Nebayosi, Kedari, Adibeeli, Mibusamu,

¹⁴Mishima, Duma, Masa,

¹⁵Hadadi, Tema, Yeturi, Nafishi, ni Kedema.

¹⁶Buli mutweela khu basooleli ba Ishimaeli bano, aaba nga niye umukhulu we shikuuka sheewe, ni kamasiina kaabwe kaatyukhibwa bisiintsa byeene.

¹⁷Ishimaeli awangaala woolesa kimiiko shitoondo shitweela ni kamakhumi kataru na musaafu (137) kye buukhulu. Lwanyuma lwayo waafwa, baamusiikha.

¹⁸Lisaaye lya Ishimaeli lyamenya mu shisiintsa shishaba akari a Havila ni Shuri, aambi ni lulwaakha lwa Misiri, khuulola kwe Asiriya. Bano baamenya bonyene, nga sibawaambakana ni babetsukhulu ba Iburayimu babaaramile ta.

¹⁹Luno nilwo luukano lwa Isaaka, uwaba umusooleli wa Iburayimu.

²⁰Isaaka aaba oolesa kimiiko kamakhumi kane khu mbuka isi aayililakho Rebeka, umukhaana wa Besweli umu Arameya, khukhwaama i Padani Aramu[21]. Rebeka yuno aaba umukooko wa Labani.

²¹Lwekhuuba Rebeka aamalakho imbuka ndeeyi nga waakhusaala umwaana ta, shaakila Isaaka waaloomba isi Umukasya khulw'omukyelama weewe. Aryo Umukasya weelamwo khuuloomba khweewe, umukyelama weewe waaba shisoombo.

²²Ne mu shisoombo sheewe mwaaba nga mulimo babaana babili, baaba nga basoolanila mukari, shikila Rebeka ereeba umweene ari, “Lwashiina shishiindu nga shino shilikho shiikholikha khusiise?” Ilomo iyo yaakila waatsya khukhwiireebakho isi Umukasya.

²³Umukasya waamwiilamwo ari, “Mu shisoombo shoowo mulimo kamanaambo kabili. Ukhasaale babaana babili, babaakhaamemwo kamanaambo kabili, kakaakhaalobe khuwaambakana ta. Mutweela khu nibo akhaabe uwe kamaani khuufuura uwashe, n'umukhulu akhaabe umwakaanisi w'omukyeekhe.”

²⁴Imbuka yeewe iye khuusaala ni yoola, wasaala babaana bakhwaana.

²⁵Uwanyoowa khuurura aaba umurandaafu, naluundi aabakho bubwooya burandaafu, niye baamutwiikha bari Esawu.

²⁶Umwaana uwe khaabili khuurura, aarura nga waakuumiile luundi woomiisile isukunyi iya waandaaye Esawu. Niye baamutwiikha lisiina bari Yakobo[22]. Isaaka aaba nga oolesa kimiiko kamakhumi kasesaba kye buukhulu isi babaana bano baasaalikhila.

²⁷Nga Esawu ni Yakobo baatsoyilekho, Esawu wekyela umuyiifwi we tsisolo uwe kamakhula ke angaaki naabi, nga niye akana naabi khuuba ibulafu mu kyeewa, ne Yakobo niye aaba umusaani uwasila busa, nga akana naabi khukhwiikhala ingo mu masari.

²⁸Isaaka waaba nga akana naabi Esawu, lwekhuuba aalyatsaka tsinyama tse tsisolo tse mwirome tseesi aamureeratsakila, ne Rebeka niye waakana naabi Yakobo.

²⁹Shifukhu shitweela, Yakobo aaba nga alikho ateekha supu, Esawu waakobola ingo nga intsala imuli buubi naabi.

³⁰Kila alomela Yakobo ari, “Intsala yaantsira! N'umbekho supu woowo umurandaafu uyo khaangu!” (Isho shaakila lisiina lyeewe baamulaanga bari Edomu.)

³¹Yakobo naye weelamwo ari, “Ingana iwe ungulise ise kumukabo kwoowo kwe khuuba umwaana umukiboole.”

³²Esawu waamwiilamo ari, “Bona ise ari intsya khufwa, kumukabo kwe khuuba umwaana umukiboole kunanjeetakho shiina?”

³³Ne Yakobo waamwiilamwo ari, “Nyoowa untsitsubile nio.” Aryo Esawu wetsuba shishitsubo she khuukulisa isi Yakobo kumukabo kweewe.

³⁴Lwanyuma Yakobo waawakho Esawu kumukaati atweela ni supu. Esawu n'amala khuulya ni khuunywa, weenyukhawo busa, waakyeenda waatsya. Isho shokyesanisa isaambo isi Esawu aakhambaasakho naabi khu mukaso kwe kumukabo kwe khuuba umwaana umukiboole ta.