Read lumasaaba Khuurakikha 26 Bible Online

Khuurakikha 26 - lumasaaba bible

Khuurakikha 26

¹Indi luundi aabawo intsala ikiindi mu shibala isho, ifwaananakho ni neeyo iyabawo khu muboolo kwa Iburayimu. Isaaka waatsya isi Abimeleki, umuyiinga we ba Firisitiya, uwaba nga amenya i Gerari.

²Umukasya waabonekhela Isaaka, waamulomela ari, “Ukhatsya i Misiri ta, ne uli ni khuumenya mu shibala sheesi kane ikhwookese khuumenyamwo.

³Uli ni khuumenya mu shibala isho nga umuwuyi busa, ni nase samweene kane imbaatsake ni nawe, ikhuwe tsikhabi. Lwekhuuba indyolelesa indakaano yase isi nakhola ni paapa woowo Iburayimu, nga ikhuwa iwe liiswa lino, atweela ni be lisaaye lyoowo boosi.

⁴Kane imbalaayise lisaaye lyoowo, lifwaane busa nga tsinieniesi tsitsibonekhela khwikulu. Naluundi kane ikhuwe liiswa lino lyoosi, ni isi babetsukhulu boowo. Ni babaandu boosi be mu shibala bakhaaweebwe tsikhabi khulweenywe.

⁵Bino byoosi bilikholekha biryo, lwekhuuba paapawo Iburayimu aawulila likono lyase, waakhola byoosi khuusiintsiila khu makaambila kaase, ni biilakilo byase.”

⁶Aryo Isaaka waamenyatsaka i Gerari.

⁷Babaandu babaamenya ibweene iyo ni baamureebakho bibiwaamba khu mukhasi weewe, naye waabeelamwo ari ali umukooko weewe, lwekhuuba aarya khuubaboolela ari ali umukyelama weewe. Shaba shiryo lwekhuuba eyambaasa mu mwoyo kweewe ari, nga waababooleele ari ali umukyelama weewe, abe banyala baamwiira, lwekhuuba abe Rebeka abonekha buulayi naabi.

⁸Nga Isaaka waamalile khuumenyakho ibweene iyo imbuka indeeyikho, umuyiinga Abimeleki, uwe ba Firisitiya, waalola aasi khuubirira mwitilisa, waabona Isaaka nga ali khuutikita Rebeka.

⁹Kila Abimeleki alaanga Isaaka, waamulomela ari, “Shili sha lubuula shiri umukhasi uyu ali umukyelama woowo! Lwashiina iwe walomele uri ali umukooko woowo?” Isaaka naye waamwiilamwo ari, “Lwekhuuba narya ndi banyala baantsira khu lweewe.”

¹⁰Kila Abimeleki naye elamwo ari, “Lwashiina wakhubirisile ifwe musaambo ifwaana iryo? Winyoola abe inyala yaabayo umusaani mutweela abe unyala waatsya waakona n'umukyelama woowo, abe shishinyala shaakhureerera ifwe shitsubo.”

¹¹Abweene awo Abimeleki waalaangilila ari, “Umuundu yeesi ukhakakho khuubirisa umusaani yuno buubi musaambo yoosi, aakha khukhwiiribwa.”

¹²Isaaka waamiitsa bimiitswa biikali, ni mu mwiiko ukwo, waakyesa likyesa liikali naabi, nga bifuurisamwo ibyo byeesi aamiitsa shitoondo shibuufu, lwekhuuba Umukasya aamuwa tsikhabi tsingali naabi.

¹³Aryo Isaaka waaba umusaani umuyiindifu naabi, ni buyiindifu bweewe bweloosela busa khuubalaaha.

¹⁴Waabaya kamasheese kamakali naabi, atweela ni tsimbusi, ni kamataala ke tsikhaafu, naluundi waaba ni babaakaanisi baakali naabi, shaakila ba Firisitiya baamuwaambila liibuba.

¹⁵Kila batsya beeliilisaka tsisebele tse kameetsi ni liloba, tseesi babaakaanisi ba paapawe Iburayimu baayaba nga ashiili mulamu.

¹⁶Lwanyuma Abimeleki waalomela Isaaka ari, “Yinyukha urure mu linaambo lyeefwe utsye. Lwekhuuba bona ari wekyelile umuundu uwe kamaani naabi khuukhufuurakho ifwe.”

¹⁷Aryo Isaaka wenyukha waatsya mu Litila lya Gerari, waamenyatsaka ibweene iyo.

¹⁸Isaaka waakobola, weekulaka tsisebele tse kameetsi tsitsayabibwa nga paapawe Iburayimu ashiili mulamu, nga nitso tseesi ba Firisitiya beeliilisaka ni liloba nga Iburayimu waamalile khuufwa. Aryo waatsitwiikhaka kamasiina keene niko matweela keesi paapawe aatsitwiikhaka.

¹⁹Ne babaakaanisi ba Isaaka ni baalima aasi mwitila, baanyoolamwo kameetsi kakaarubukha khukhwaama mwiloba.

²⁰Babaayi be Gerari iyo beetsa bakhaandisa babaayi ba Isaaka, nga baloma bari, “Isebele yino ili iyeefwe!” Isho shaakila Isaaka waatwiikha isebele iyo lisiina ari Eseki.[23]

²¹Lwanyuma babaayi ba Isaaka baayaba isebele ikiindi, ne ndi ni nayino nayo baakikhaabisanilakho, shaakila Isaaka waakitwiikha lisiina ari Sitina, (shishimanyisa shiri Buusiku).

²²Nga waamile abweene awo, waatsya mu shifwo shishiindi, waayaba isebele ikiindi. Ni nayino nayo baakikhaabisanilakho. Yino nayo kila Isaaka akitwiikha lisiina ari Rehobosi (shishimanyisa shiri Shiifwo Shiibalaayi), nga aloma ari, “Aluno Umukasya waakhukholeele ifwe shiifwo shiibalaayi buulayi, nashiryo kane khuyiindile naabi mu shibala shino.”

²³Khukhwaama ibweene iyo, Isaaka waatsya i Berisheba.

²⁴Nga ali iyo, Umukasya weetsa waamubonekhela mu shilo sheene isho, waamulomela ari, “Ise niye Wele wa paapawo Iburayimu. Nashiryo ukharya ta, lwekhuuba ise ndi atweela ni nawe, kane ikhuwe tsikhabi, naluundi imbalaayise lisaaye lye babetsukhulu boowo, khulw'omwakaanisi wase Iburayimu.”

²⁵Lwanyuma Isaaka woombekha shisheeso abweene awo, weesaaya Umukasya. Aryo woombekha abweene awo lisari lyeewe, babaakaanisi beewe baayaba isebele iye kameetsi.

²⁶Nga abirirewo imbuka, Abimeleki waama i Gerari, nga ali ni Ahuzasi, umuwi weewe uwe kamakyesi, ni Fikoli, umukhulu we liiye lyeewe, beetsa khuubona Isaaka.

²⁷Isaaka naye waabareeba ari, “Shiina shisheene shishibareerire isi indi, ate nga inywe mwaambirisa buubi naabi, mwaamboona nakhumboona?”

²⁸Nabo baamwiilamwo bari, “Shili khuubonekhela ilala lubuula shiri Umukasya ali ni nawe. Ni shisheene isho nisho shishaama khukila khweetsa khuri khukhole indakaano akari eefwe ni nawe.

²⁹N'ukhwitsubile nga uloma uri iwe singene ukhukholekho buubi bwoosi ta, nga nafwe ni khukhaakhukholakho buubi ta. Buli mbuka khwakhubirisa buulayi naabi, lwanyuma khwakhusiibula waatsya mu lukoosi. Ari bona isaambo isi Umukasya akhuweelemwo iwe tsikhabi!”

³⁰Aryo Isaaka waabakholela kamayiiya kamaboofu, baalya naluundi baanywa.

³¹Uri kumutikhinyi mu mamilimili, beenyukha, beetsubanila bibitsubo bye buusaale. Lwanyuma Isaaka waabasiibula, beelayo ingo waabwe mu lukoosi.

³²Khu shifukhu khweene ukhwo, babaakaanisi ba Isaaka beetsa baamulomela bibiwaamba khu sebele iye kameetsi ikiindi isi baayaba, nga baloma bari, “Khwaanyoolile kameetsi.”

³³Isaaka waatwiikha isebele iyo lisiina ari Shiba, ni khukhwaamila abweene awo, lisiina lye shiriimba isho lyekyela Berisheba[24], khukhwoolisa ni shaleelo shino.

³⁴Nga Esawu woolesile kimiiko kamakhumi kane kye buukhulu, waayila umukyelama isi baalaanga bari Judisi, umukhaana wa Beeri, umu Hiti. Waakyelawo ndi waayila Basemasi, umukhaana wa Eloni, naye umu Hiti.

³⁵Ne shonyene ndi bakhasi ba Esawu bano baareerera Isaaka ni Rebeka kumutaambo kumukali naabi.