Read lumasaaba Khuurakikha 27 Bible Online

Khuurakikha 27 - lumasaaba bible

Khuurakikha 27

¹Imbuka isi Isaaka aabeela nga wahaangaale mu miiko, luundi nga tsimoni tseewe sitsibona ta, waalaanga umusooleli weewe umukhulu Esawu weetsa isi ali. Kila amulaanga ari, “Mwaana wase.” Esawu naye weelamwo ari, “Indi ano paapa.”

²Isaaka waamuloma ari, “Bona ise ari nahaangaale, naluundi simanya shifukhu shiina khweesi indifwiilakho ta.

³Ingana iwe usute buyiingo bwoowo atweela ni bufumo, utsye mwirome uyiime isaanyi, ukireere.

⁴Lwanyuma, ukiŋoonaŋoone buulayi musaambo isi ingana, undeerere ano indye. Nga naamalile, kane ikhuloombele tsikhabi tsoowo nga ishiili khufwa ta.”

⁵Ne Rebeka aaba nga waarekeeresile byeesi Isaaka aaba nga ali khuuboolela umusooleli weewe Esawu. Aryo Esawu n'arura waatsya mwirome, khuutsya khuyiima isaanyi,

⁶Rebeka waalomela umusooleli weewe Yakobo ari, “Ise imbeele nga naarekeeresile, naawulila paapawo nga alomela waandaayo Esawu ari,

⁷‘Tsya khaangu uŋoonaŋooneleyo inyama musaambo isi ingana, undeerere indye, nio lwanyuma ikhuloombele tsikhabi mu moni ts'Omukasya nga ishiili khufwa ta.’

⁸Ni nashiryo ari mwaana wase, ingana undeekerese buulayi, utsye ukhole sheesi ikhulakila khuukhola.

⁹Tsya khaangu mwitaala, undeerereyo tsimbusi tsindayi, tsisooleli tsibili. Ingana khuuteekhela paapawo inyama musaambo isi afuura khuukana.

¹⁰Lwanyuma usute umuyilile akilye, akhuloombele iwe tsikhabi nga ashiili khufwa ta, mu shifwo sha waandaayo Esawu.”

¹¹Yakobo naye weelamwo maayi weewe Rebeka ari, “Maayi, shebulila uri waandaayase Esawu niye alikho ni bubwooya bukali, ne bona shihaafu shase nisho shaamiliya busa mbaakho bubwooya ta.

¹²Ne kane shibe shiryeena siinga nga paapa wase akana khukhuumaambakho? Kane ise inyoolekhane nga umuwoombesi isi ali, ni naye kane antsube ise mu shifwo she khukhuumba tsikhabi.”

¹³Maayi weewe waamulomela ari, “Mwaana wase, khayo shitsubo isho shikwe khuusiise! Iwe n'utsye ukhole sheesi ikhulomeele khuukhola. Tsya undeerere tsimbusi.”

¹⁴Aryo Yakobo waatsya waareera tsimbusi tsana tsibili, waatsiwa maayi weewe, naye aryo maayi weewe waatsya waaŋoonaŋoona tsinyama buulayi musaambo isi paapa weewe abe aakikanamwo.

¹⁵Lwanyuma Rebeka waabukula bikwaaro bya Esawu bibifuura buulayi, byeesi aaba nabyo mu ntsu, waabikwaarisa Yakobo.

¹⁶Naluundi waabowa lihaafu lye mbusi khu makhono keewe, ni mu milo mweewe mumwaba nga mwaamiliya busa.

¹⁷Lwanyuma waabukula inyama yatsana, iyaba ili khuuwunya isilikakha buulayi, atweela ni kumukaati, waabyakaanisa Yakobo.

¹⁸Yakobo waabisuta, waabiyila isi paapawe, waamulaanga ari, “Paapa?” Paapawe weelamwo ari, “Ise niyooyu, mwaana wase. Iwe niye naanu? Esawu namwe Yakobo?”

¹⁹Yakobo weelamwo ari, “Iseese niye Esawu, umusooleli woowo umukhulu. Bona naareerire isaanyi isi ukanile, naakiŋoonaŋoonile buulayi musaambo isi ukana. Ari yinyukha aasi, wikhale ulyekho, nio manya waamba tsikhabi tsoowo.”

²⁰Kila Isaaka areeba umusooleli weewe ari, “Mwaana wase, iwe unyalisile uryeena khuufuna isaanyi khaangukho?” Naye Yakobo waamwiilamwo ari, “Umukasya Wele woowo niye uwunyalisisile khuukifuna khaangukho.”

²¹Lwanyuma Isaaka waalomela Yakobo ari, “Yisyeenda aambi ano khubone. Ise ngana khuunyoowa khuukhuwaambakho nio inyale khuuŋaŋasila ilala oba nga iwe niye Esawu namwe ta.”

²²Kila Yakobo esyeenda aambi isi paapa weewe Isaaka. Naye aryo n'amala khuumuwaambakho, waaloma ari, “Likono lili lya Yakobo, ne kamakhono niko kali ka Esawu.”

²³Musaambo iyo s'anyalisa khuumanya ari niye Yakobo ta, lwekhuuba kamakhono ka Yakobo kaaba nga kalikho bubwooya khuufwaana nga ka Esawu. Aryo Isaaka waaloombela Yakobo tsikhabi.

²⁴Indi luundi Isaaka waareeba ari, “Ne ilala iwe niye umwaana wase Esawu?” Yakobo weelamwo ari, “E e, ise niye.”

²⁵Lwanyuma Isaaka waaloma ari, “Ari indeerere ano inyama yase indye. Indyo nga naamalile khuukilya, kane ikhuloombele tsikhabi, mwaana wase.” Aryo Yakobo waasuta biilyo ibyo waabireera isi paapa weewe. Isaaka waabilya, luundi waanywa ni viini isi Yakobo aamureerera.

²⁶Lwanyuma paapawe Isaaka waamulomela ari, “Mwaana wase yisyeenda aambi ano, ungwekho mu shifuba.”

²⁷Aryo Yakobo wesyeenda aambi, waamukwa mu shifuba. Aryo Isaaka n'awunyila luusu khukhwaama mu bikwaaro byeewe, aryo waamuwa tsikhabi nga aloma ari, “Luusu lw'omusooleli wase luli luusu luluwunya buulayi nga lwe mwirome lweesi Umukasya aawa tsikhabi.

²⁸Khali Umukasya akhuweele iwe liime khukhwaama mwikulu, khuutsowesa biilime biilayi, uryo ufuna likyesa liilayi lye biilime ni viini.

²⁹Khali kamanaambo kamakali keetsile kakhwakaanisatsaka iwe, kamanaambo keenamisa kimirwe kyaabwe khwiloba khulwoowo. Kane ube umukhulu we babandaayo boosi. Babandaayo beene boosi babaama muunda ya maayi woowo, kane beenamise kimirwe aasi nga baakhuboonekho. Buli muundu yeesi ukhutsuba iwe kane atsubibwe, ni nooyo yeesi ukhuwa iwe tsikhabi, kane aweebwe tsikhabi.”

³⁰Aryo Isaaka nga nio aliimalile khuuwa Yakobo tsikhabi, nga naye Yakobo aliimalile khuururawo busa ari, Esawu naye waakobola nga aama khuyiima isaanyi.

³¹Esawu n'ola ingo, waaŋoonaŋoona inyama buulayi, musaambo isi paapawe afuura khuukikanamwo, lwanyuma waakimureerera. Aryo nga woolile isi paapawe, waamulomela ari, “Naakoboole paapa, ari yinyukha ulye isaanyi isi naama khuyiima. Yikhala buulayi ulye, lwanyuma unoombele tsikhabi tsoowo.”

³²Paapawe Isaaka waamwiilamwo ari, “Iwe naanu?” Esawu naye welamwo ari, “Ise niye Esawu, umusooleli woowo umukhulu.”

³³Lwanyuma Isaaka nga alikho anikina busa, kila amulomela ari, “Ne naanu uwaama khwaama ano, uwungabuliile ise inyama iye saanyi, naakilya naakimalawo? Ise naama khulya inyama iyo, naawa n'umuundu mweene uyo tsikhabi, tsibeele tsikhabi tsitsikhanyala tsaashuukhamwo ta.”

³⁴Aryo Esawu nga waamalile khuuwuliilisa biilomo byeesi paapawe aamuboolela, waarundukha waalila kamasika, ni luwuungu luukali lweene nga ekoontselela ari, “E paapa wase, nase n'umbe tsikhabi! Nase inoombele!”

³⁵Naye Isaaka waamwiilamwo ari, “Waandaayo aama khuba ano, waakhalila ise kamakyesi ke angaaki naabi. Nashiryo waayilile tsikhabi tsoowo tsoosi.”

³⁶Esawu naye weelamwo ari, “Isho nisho shishikila baamulaanga bari Yakobo[25]? Lwekhuuba bona ari waanuulilekho ise kimiluundi kino kibili. Khuunyoowa aanuulakho kumukabo kwase kwe khuuba umwaana umukiboole, ni kumuluundi kuno bona waanuulakho tsikhabi tsase. Ne ari paapa, mbaawo ikhabi na ndweela isi undekheelekho ise ta?”

³⁷Isaaka waamwiilamwo ari, “Ise naakholile Yakobo khuuba nga niye umukhulu woowo, naluundi naalakiile ndi, babaandaaye boosi babe babaakaanisi beewe. Ate naamuloombeele ndi, abe ni biilime biikali naabi atweela ni viini yeene. Ari iwe mwaana wase, inakhuwa shiina?”

³⁸Esawu wekoontselela paapawe ari, “E paapa, mbaawo khaakhabi na khafwiiti khari kheesi unyala waanoombela nase ta? Paapa nase n'unoombelekho!” Aryo Esawu kumutaambo kwaamuwaamba luukali, waalila kamasika.

³⁹Lwanyuma kila paapawe Isaaka amwiilamwo ari, “Buumenyo bwoowo kane bube mu shibala shishoomu busa, shishikhalimwo biilyo ta, naluundi mweesi liime lye mwikulu likharoonyamwo ta.

⁴⁰Kane umenyatsake nga wisoolanakho ni lurima wamweene. Kane ubatsake umwakaanisi wa waandaayo, khuumalakho imbuka, ne imbuka ilyoola, ulisoolanakho urure mu bubowe bweewe ube umukaangulule.”

⁴¹Esawu waabiiyila naabi Yakobo lwe tsikhabi tseesi aamwibakho khukhwaama isi paapawe. Isho shaakila Esawu weelomela mu mwoyo mweewe ari, “Bifukhu bye khuufwa khwa paapa wase bili aambi naabi khukhwoola. Lwanyuma ikhaakhoonye waandaayase Yakobo.”

⁴²Ne yabawo umuundu uwawulila biilomo ibyo, waatsya waaboolelakho Rebeka. Kila Rebeka arumanisa isi Yakobo, waamulomela ari, “Waandaayo Esawu alikho eŋoonaŋoona luundi ariisariisa khuukhukhoonya iwe.

⁴³Ni nashiryo mwaana wase, khola sheesi ikhuboolela khuukhola. Yinyukhilamwo khaangu, utitukhe utsye wa khootsa woowo Labani, i Harani.

⁴⁴Tsya umenye ibweene iyo khuumalakho imbuka, khukhwoolesa nga lirima lya waandaayo lyaaweetsekheleele.

⁴⁵Imbuka isi alibeela nga weebiliile ibyo byeesi iwe umukholile, ise ndirumanisa khuukhulaanga ukobole. Shiina shisheene shishikila ise naabafwiila inywe mweembi mu shifukhu shitweela?”

⁴⁶Lwanyuma kila Rebeka alomela Isaaka ari, “Ise kumutaambo kwaamaambile naabi, luundi naaluwile naabi khulwe bakhasi ba Hiti bano. Siinga nga Yakobo naye akhwa umukhasi khukhwaama mu shibala she Hiti shino, kane shibe shiilayi ise khuufwa bufwi.”