Read lumasaaba Khuurakikha 28 Bible Online

Khuurakikha 28 - lumasaaba bible

Khuurakikha 28

¹Lwanyuma Isaaka waalaanga Yakobo, waamuloombela tsikhabi, waamulomela ari, “Ukhakhakakho waayila umukhasi khukhwaama mu bakhasi ba Kanaani bano khuuba umukyelama woowo ta.

²Yinyukha utsye i Padani Aramu, muungo mwa kuuka woowo Besweli, uyile mutweela khu bakhaana ba khootsa woowo Labani, khuuba umukyelama woowo.

³Wele Umunyali wa byoosi kane akhuwe tsikhabi, luundi akhuwe lisaaye liikali naabi, akhubalaayise. Babetsukhulu boowo bakhaabe baakali naabi, beekyelemwo kamanaambo kamaboofu.

⁴Khali Umukasya akhuweele iwe ni lisaaye lyoowo tsikhabi tseesi aawa Iburayimu, nio unyalise khukhwiyilila liiswa lyeesi ari umenyamwo nga umuwuuyi, lyeesi aasuubisa khuuwa Iburayimu.”

⁵Aryo Yakobo waasibula Isaaka khuutsya. Yakobo waatsya i Padani Aramu, waamenyatsaka ni khootsa weewe Labani, umusaani wa maayi waabwe Rebeka, umusooleli wa Besweli umu Arameya.

⁶Khu mbuka iyo, Esawu waawulila bari paapa waabwe waaloombeele Yakobo tsikhabi, naluundi bari waamurumanile i Padani Aramu, khuukhwa umukhasi. Naluundi waawulila bari paapa waabwe waamureewuule khuulekha khuyila umukhasi umu Kanaani ta.

⁷Waawulila shishiindi bari Yakobo waawuliilisile sheesi paapa ni maayi waabwe baamulomela, nga waamalile khaale ni khuutsya i Padani Aramu.

⁸Isho shookesanisa isi Esawu shiri, paapawe Isaaka aaba nga waabiyilila ilala bakhasi ba Kanaani.

⁹Shaakila waamawo, waatsya wa Ishimaeli, waayila mutweela khu bakhaana beewe, khuumutubaasa khu bakhasi beewe babaandi. Lisiina ly'omukhaana yuno abe bari Mahalasi, uwaba umukooko wa Nebayosi, umukhaana wa Ishimaeli, umusooleli wa Iburayimu.

¹⁰Yakobo waarura i Berisheba, waatsya kukulola i Harani.

¹¹Antsye ni bwaba nga bubukabukana, woola mu shifwo shitweela, mweesi aakonela shiilo isho. Yakobo waabukula litweela khu mabaale ke mu shifwo isho, waalikhola khuuba nga lisisinwe, weeyalisa aasi waakona.

¹²Ne naaba nga waakonile liilo, waaroora kamarooro, mweesi aabonela biniinilo bibyaama khu shibala, byaatsya byoola mwikulu. Khu biniinilo bino waabonakho bamalayika ba Wele, nga baaniinilakho luundi nga beekhilakho.

¹³Umukasya weemikha imurwe we biniinilo, waaloma ari, “Ise ndi Umukasya Wele wa kuuka woowo Iburayimu, naluundi indi Wele wa paapawo Isaaka. Liloba khweesi ukonilekho lino, lili lilyoowo. Kane indikhuwe iwe atweela ni lisaaye lyoowo.

¹⁴Babetsukhulu boowo bakhaayiimbe naabi babe baakali bafwaane nga liifukhuulu lye khu shibala! Bakhaamalatane khu shibala khwoosi, khukhwaama i bwaamanyaanga khuutsya khwoola i bukwaanyaanga, khukhwaama kwe ngaaki ni khukhwoola imwaalo. Biikuuka byoosi bye khu shibala bikhaafune tsikhabi khuubirira mwiiwe ni lisaaye lyoowo.

¹⁵Ne shimanye uri, ise ndi atweela ni nawe, naluundi kane ikhukhiinge buli aandu oosi isi kane utsyatsake. Luliba lutweela, ikhukobose iwe buulayi busa khu liswa lino. Ise singene ikhulekhe na khafwiiti khoosi ta, khukhwoolesa nga naamalile khuukhuwa iwe byoosi byeesi ikhulomeele.”

¹⁶Lwanyuma lwayo Yakobo waasisimukha mwiilo lyeewe, weelomela ari, “Ilala Umukasya ali mu shifwo shino, ni nase abe ishiili khushimanyakho ta.”

¹⁷Buuri bwaamuwaamba luukali, indi waaloma ari, “Shiifwo shino nga shili she lisuno naabi! Shaakha khuuba nga shili Intsu ya Wele, shili bubwinjililo bwe mwikulu!”

¹⁸Kumutikhinyi mu mamilimili naabi, Yakobo wenyukha waabukula libaale lyeesi aaraambisa nga lisisinwe imurwe weewe, waalyombekhawo khuuba nga shishebuliso. Lwanyuma waabukula kamafura waalitsukhakho.

¹⁹Waatwiikha shiifwo isho lisiina ari Beseli, shishimanyisa shiri intsu ya Wele. Ne maakiboole, lisiina lye shiifwo isho abe baashilaanga bari Luzi.

²⁰Lwanyuma Yakobo waakhola shishitsubo shino nga aloma ari, “Siinga Wele aba ni nase, waaniinda buulayi mu lukyeendo lwase luno lweesi indi khuutsyakho, waamba biilyo ni bikwaaro,

²¹naluundi siinga angobosa buulayi ni lukoosi isi paapa wase, Umukasya kane abe Wele wase.

²²Libaale lino lyeesi indeerewo khuuba nga shishebuliso, kane libe nga intsu iye khukhwiisaayilamo Wele, na buli shiindu shoosi sheesi Wele kane aambe, kane imbaanatsakeyo shitweela she likhumi.”