Read lumasaaba Khuurakikha 29 Bible Online

Khuurakikha 29 - lumasaaba bible

Khuurakikha 29

¹Lwanyuma lwa bino, Yakobo weelooselayo ni lukyeendo lweewe, waatsya woola mu shibala she babaandu be bwaamanyaanga.

²Nga ashiilikho aleeyikho, waabona kamataala kataru ke kamasheese nga kali mu maayilo, kaakonele aambi ni isebele iye kameetsi. Ne shonyene ndi, baaba nga baakifuunikhilekho khu ngaaki ni libaale.

³Yabatsaka isaambo yaabwe ndi, abe banyoowa baaliinda kamasheese kaanyoowa khuubuusana, nio baarusawo liibaale khu sebele. Nga abe baamalile khuunyweesa kamasheese koosi, beesayo liibaale, baalifuunikha khu ngaaki khwe sebele.

⁴Yakobo waatsya aambi ni babaayi be kamasheese waabareeba ari, “Inywe mwaama waheena?” Nabo baamwiilamwo bari, “Ifwe khwaama i Harani.”

⁵Kila ndi abareeba ari, “Mwaamanya umusaani isi baalaanga bari Labani, umwitsukhulu wa Nahori?” Nabo baamwiilamwo bari, “Khwaamumanya.”

⁶Yakobo waabareeba ari, “Ali aryeena?” Nabo baamwiilamwo bari, “Ali umulayi, ni bibiindu bimutsiila buulayi. Bona n'umukhaana weewe Rakeli uyo, ali khukhwiitsa ni kamasheese.”

⁷Kila ndi Yakobo waabalomela ari, “Bona antsye tsinyaanga, ashiili khukhwiilabula ta, lwashiina mukhanyweesa kamasheese kameetsi, lwanyuma mwaakeesayo khukhwaaya? Eyi siili inyaanga iye khuubuusanisa busa kamasheese ta.”

⁸Nabo baamwiilamwo bari, “Sikhunyala khwaapilingisa libaale khwaalirusayo, khwaarakikha khuunyweesa kamasheese ta, khuurusakho nga kamasheese koosi kaamalile khuubuusana atweela.”

⁹Ni baaba nga bashiikanikha baryo, Rakeli woola ni kamasheese ka paapawe, lwekhuuba niye uwabatsaka umwaayi wako.

¹⁰Aryo Yakobo n'abona khu Rakeli, shaananyina sheewe, umukhaana wa khootsa weewe Labani, ni kamasheese ka Labani, wenyukha waatsya khu sebele, waapiringisa libaale, waalirusayo, waanyweesa kamasheese.

¹¹Lwanyuma lwayo, Yakobo waatsya waakwa Rakeli mu shifuba, waarakikha khuulilaka kamasika.

¹²Aryo Yakobo waarakikha khuusontsoola Rakeli nga niye naali umulebe wa paapa weewe Labani, umwaana wa Rebeka. Isho shaakila Rakeli waatimaka ingo waatsya waaboolela paapa weewe Labani.

¹³Labani n'amala khuuwuliilisa kamakhuuwa kakawaamba khu Yakobo, waatimaka khaangu khuutsya khuumwakaanana, waamukwa mu shifuba, waamusheesa. Lwanyuma Labani waamureera ingo weewe, Yakobo weeloosela khuumunoonosela byoosi bibyamureera.

¹⁴Kila Labani waamulomela ari, “Ilala iwe uli uwase umweene, kumubili kwase ni kamafuki kameene.” Yakobo waamenya ibweene iyo khuumala kumweesi kumubuufu.

¹⁵Lwanyuma Labani waalomela Yakobo ari, “Iwe s'unyala waanaambila ise busa uryo, lwekhuuba bari khuli baalebe ta. Ari ingana iwe umboolele, ukana ikhusasule kumukheemba kukwoola kuryeena?”

¹⁶Labani aaba nga ali ni bakhaana beewe babili: Lisiina ly'omukhulu abe bari Leya, n'umuro weewe abe bari Rakeli.

¹⁷Leya aaba ni tsimoni nga tsilola mbola busa[26], ne nga Rakeli aaba nga abonekha buulayi luundi nga umumiliwu naabi.

¹⁸Aryo Yakobo waakana naabi Rakeli, kila aloma ari, “Kane ise ikhuraambile khuumala kimiiko musaafu, siinga nga ufukiilila ise khuuyila umukhaana woowo umukyeekhe Rakeli khuuba umukyelama wase.”

¹⁹Labani weelamwo ari, “Shiilayi iwe waamuyila, khuufuurisa naakhwaalikha w'omusaani ukuundi busa. Nashiryo, n'umenye ano ni nase.”

²⁰Aryo Yakobo waaraambila kimiiko musaafu, nga akana khuuyila Rakeli. Lwekhuuba khuukana khweesi aaba ni nakhwo isi Rakeli, khwaba khuukali naabi, kimiiko musaafu kino kyamufwaanila busa nga biifukhu bikyeekhe biri.

²¹Lwanyuma lwa byoosi, Yakobo waalomela Labani ari, “Imbuka yase iye buuraambi naakimalile. Ari n'umbe umukhasi wase imuyile.”

²²Aryo Labani waabuusanisa babesanwa beewe boosi, lwanyuma waakabula kamayiiya ke bukhwaale.

²³Mu shilo isho, nga antsye amaliyile, Labani waayila Leya isi Yakobo, mu shifwo sha Rakeli, Yakobo waatsya waakona ni naye.

²⁴(Labani waawa Leya umwakaanisi weewe Zilupa, khuuba umukyeesa weewe.)

²⁵Ne antsye ni bwasha kumutikhinyi, Yakobo wenyoola nga umukhasi aaba Leya. Kila areeba Labani ari, “Lwashiina iwe waakhaliile ise kamakyesi kakafwaana kari? Ise naakhuraambiile khuumala kimiiko musaafu kino kyoosi khulwa Rakeli. Lwashiina ilala umoombesile musaambo yino?”

²⁶Kila Labani naye amwiilamwo ari, “Mu shibala she weefwe ino, sikhunyoowa khukhwaalikhisa umukhaana umukyeekhe, nga umukhulu ashiili ango ta.

²⁷Nashiryo, nyoowa umaliilise bifukhu musaafu, nga uli ni nayuno, ne lwanyuma kane ikhuwe Rakeli naye, siinga nga ufukiilila khukhuunaambila kimiiko kikiindi musaafu.”

²⁸Aryo Yakobo waafukiilila, waamaliilisa biifukhu musaafu ibyo ni naye, lwanyuma Labani ndi waamuwa Rakeli khuuba nga umukyelama weewe naye.

²⁹(Labani waawa Rakeli umwakaanisi weewe Bila, khuuba umukyeesa weewe.)

³⁰Aryo Yakobo waatsya waakona ni Rakeli naye, waamukana naabi khufuurisakho Leya. Lwanyuma weeloosela khuumenyawo nga araambila Labani khuumala kimiiko kikiindi musaafu.

³¹Ne Umukasya n'abona ari Yakobo s'akana naabi Leya ta, waamwikulila lisaaye khuusaala babaana, ne Rakeli niye waaraama nga umukuumba busa.

³²Aryo Leya waaba shisoombo, wasaala umwaana umusiinde. Kila amutwiikha lisiina ari Rewubeni, nga aloma ari, “Lwekhuuba Umukasya waaboone kumutaambo kwase, ni aluno umuseetsa wase kane angane.”

³³Lwanyuma ndi waaba shisoombo luundi, waasaala umwaana umusiinde ukuundi. Oyuno waamutwiikha lisiina ari Simeyoni, nga aloma ari, “Lwekhuuba Umukasya waawuliile ari ise sibangana ta, waambeele umwaana umusiinde ukuundi.”

³⁴Indi luundi Leya waaba shisoombo, wasaala umwaana ukuundi umusiinde. Oyuno waamutwiikha lisiina ari Levi, nga aloma ari, “Khulw'omwaana yuno, ari umuseetsa wase kane antsihaambilekho ilala, lwekhuuba ise naamusaaliile babaana besiinde bataru.”

³⁵Lwanyuma ndi waaba shisoombo, wasaala umwaana ukuundi umusiinde. Oyuno waamutwiikha lisiina ari Yuda, nga aloma ari, “Khu muluundi kuno, kane imbuyilise Umukasya!” Lwanyuma lwooyo, waakama khuusaala babaana.