Read lumasaaba Khuurakikha 30 Bible Online

Khuurakikha 30 - lumasaaba bible

Khuurakikha 30

¹Ne Rakeli n'abona nga siwakhusaalilakho Yakobo babaana ta, libuba lyaamuwaambila yaayawe Leya. Kila alomela Yakobo ari, “N'umbe babaana nase isaale, nga akhuba isho ta, inafwa bufwi.”

²Kila Yakobo lirima limuwaambila Rakeli, waamwiilamwo ari, “Iwe waambaasa uri ise ndi Wele, uwakhwiimisa iwe khuusaala babaana?”

³Lwanyuma kila Rakeli alomela Yakobo ari, “Bona umwakaanisi wase Bila uyushiina, tsya ukone ni naye, nio manya waasaalilayo umwaana. Musaambo iyo, nase kane imbe nga naafunile babaana khuubirira mu niye.”

⁴Aryo Rakeli waawa Bila isi Yakobo khuuba umukyelama weewe; Yakobo waatsya waakona ni naye.

⁵Lwanyuma Bila waaba shisoombo, waasaalila Yakobo umwaana umusiinde.

⁶Kila Rakeli amutwiikha lisiina ari Dani, lwekhuuba aaloma ari, “Wele waambotseele kumusaango kwase! Naluundi waawuliile khuuloomba khwase, waambeele umwaana umusiinde.”

⁷Indi luundi Bila waaba shisoombo, waasaalila Yakobo umwaana ukuundi umusiinde.

⁸Lwanyuma ndi kila Rakeli amutwiikha lisiina ari Nafutali, lwekhuuba aaloma ari, “Naarekanile khuurekana khuukali naabi ni yaaya wase, ne ari imbonekha nga uuli khuufuura!”

⁹Naye Leya n'abona ari waakamile khuusaala babaana, waawa Yakobo umwakaanisi weewe Zilupa, khuuba umukyelama weewe.

¹⁰Lwanyuma Zilupa waasaalila Yakobo umwaana umusiinde

¹¹Leya waamutwiikha lisiina ari Gadi, lwekhuuba aaloma ari, “Naabeele ni khabi ingali naabi.”

¹²Indi luundi Zilupa waasaalila Yakobo umwaana ukuundi umusiinde.

¹³Naye Leya waamutwiikha lisiina ari Asheri, lwekhuuba aaloma ari, “Indi umusangaafu naabi! Ari bakhasi babaandi kane balome bari indi umusangaafu.”

¹⁴Shifukhu shitweela khu mbuka iye likyesa lye ŋaano, Rewubeni waatsya waanyoola shisaala shishiindi Mandurekisi[27] mu mukuunda, waashikhuula waareerera maayi weewe Leya kimili. Kila Rakeli aloma Leya ari, “Naakhwikoontseleele, n'umbekho shisaala isho sheesi umwaana woowo aama khuureera.”

¹⁵Kila Leya naye amwiilamwo ari, “Iwe wambaasa uri shili shiindu shikyeekhe naabi iwe khuuba nga waayimbukula umuseetsa wase? Ni na ari ukana khuuyila shisaala sh'omwaana wase nasho?” Rakeli naye waamwilamwo ari, “Siinga ufukiilila khukhuumba shisaala sh'omwaana woowo isho, kane ikhufukiilile ukone ni Yakobo shiilo she shaleelo shino.”

¹⁶Angoloobe awo, Yakobo n'aba nga akobola khukhwaama mu mikuunda, Leya waatsya waamwakaanila, waamulomela ari, “Shiilo shino waakha khuukona ni nase. Lwekhuuba ise naakhusasuliile iwe, nga inaambisa shisaala sheesi umwaana wase areerire.” Aryo Yakobo waatsya waakona ni naye shiilo isho.

¹⁷Wele waawulila khuuloomba khwa Leya. Leya waaba shisoombo, waasaalila Yakobo umwaana umusiinde uwe kharaano.

¹⁸Leya waamutwiikha lisiina ari Isakaari, lwekhuuba aaloma ari, “Wele waasasuule ise, lwekhuuba nawa umuseetsa wase isi umwakaanisi wase khuuba umukyelama weewe.”

¹⁹Indi luundi Leya waaba shisoombo, waasaalila Yakobo umwaana umusiinde uwe khasesaba.

²⁰Leya waamutwiikha lisiina ari Zebuluni, lwekhuuba aaloma ari, “Wele waambeele shiwaanwa shiilayi naabi. Aluno kane umuseetsa wase aambe lukoosi, lwekhuuba naamusaaliile babaana besiinde basesaba.”

²¹Lwanyuma ndi Leya waasaalayo umwaana umukhaana, isi aatwiikha lisiina ari Dina.

²²Wele waashebulila Rakeli, waamuwaambila shiisa mu mutaambo kweewe, weelamwo khuuloomba khweewe, waamunyaalisisa khuusaala babaana.

²³Aryo waaba shisoombo, waasaala umwaana umusiinde. Kila aloma ari, “Wele waandusilekho she kamaŋaanyu.”

²⁴Kila amutwiikha lisiina ari Yusufu, lwekhuuba aaloma ari, “Khali Umukasya ambeeleyo umwaana umusiinde ukuundi.”

²⁵Lwanyumakho nga Rakeli waamalile khuusaala Yusufu, Yakobo waatsya waalomela Labani ari, “Ari ingana undekhuule ingoboleyo ingo weefwe, mu shibala shase.

²⁶Ingana uumbe bakhasi baase, atweela ni babaana baase, beesi nafuniile ano, nga ikhuraambila iwe. Nashiryo ikhuloomba undekhuule intsye, lwekhuuba waamanyile buulayi bubweene bubwakaanisi bwase nga ni bubeele isi iwe.”

²⁷Labani naye waamwiilamwo ari, “Iwe siinga uba ufukiilila, ukhatsya, waandekha ise ta. Lwekhuuba naashifumbuule ndi, Umukasya waambeele tsikhabi tsino tsoosi khulwoowo.

²⁸N'ubalilile byoosi byeesi umaantsa ise, ni nase kane ikhuliyile.”

²⁹Yakobo naye waamwiilamwo ari, “Iwe waamanya buulayi bubweene, isaambo isi ise imbeele nga ikhwakaanisamwo iwe mu bwiyikinwa mu miiko kino kyoosi. Naluundi waamanya isaambo isi bibyaayo byoowo biyimbilemo nga nimbeele imbilolelela.

³⁰Iwe waba nga uli ni tsikhaafu imbale tsiri, ari tsasaalana tsaakhila ta. Umukasya waakhuwa iwe tsikhabi, mu buli shiindu shoosi sheesi imbeele nga ikhola. Ne ari nase kane ifune liina imbuka iye khuulolelela be muungo mwase?”

³¹Labani naye waamureeba ari, “Ari ukana ikhuwe shiina?” Yakobo waamwiilamwo ari, “Siingana waabakho ni sheesi usasula ise ta. Ne ngana ukholeleyo shishiindu shitweela, ni nase kane intsye niloosele khuukhuraambila samweene.

³²Ifukiilile intsye mu byaayo byoosi shaleelo shino, imbe nga imbukulakamwo kamasheese ni tsimbusi bibiilikho kamakoondokoondo, ni kamasheese kamaana kakaali kamamali busa. Bibyeene ibyo byeesi inarusamwo, nibyo bibikane bibe kumukheemba kwase.

³³Shino kane shikhuyeete iwe lwanyumakho, khuumanya oba nga ise imbeele umwiyikinwa isi uli namwe ta, isi iwe kane wiitsile khuulola khu mukheemba kwase ukwo. Iwe siinga nga unyoolamwo tsimbusi namwe kamasheese bibikhalikho kamakoondokoondo ta, namwe kamasheese kamaana kakaakhali kamamali ta, umanya busa uri ako naakebile.”

³⁴Labani weelamwo ari, “Mbaawo buubi ta. Khayo shibe nga iwe niwaama khuloma.”

³⁵Ne khu shifukhu sheene isho, Labani waatsya, waarusakamwo tsindurume tsitsabakho kamakoondokoondo, ni tsimbusi tsikhasi tsoosi tsitsabakho buwaangawaanga, ni kamasheese kamaana koosi kakaabamwo buumali, waabiwa baasooleli beewe khuutsya khwaayisa.

³⁶Waabalomela batsye baayisile aleeyi, mu shifwo abe shishiyila lukyeendo lwe bifukhu nga bitaru, akari aabwe ni shiifwo mweesi Yakobo aaba. Ne Yakobo niye waarama ni bibyaayo bya Labani bibiramile.

³⁷Lwanyuma Yakobo waatsya waafunayo biisaala bye bikuuka bitaru, waabyobuulakakho kamakhobolyo mu nyilili, byaabonekha nga bibiilikho buwaangabuwaanga.

³⁸Kila emisaka biisaala ibyo iburaangisi we bitowo bye kameetsi mweesi bibyaayo binyweela. Bisaala ibyo aabiimisaka abweene awo, lwekhuuba abe bibyaayo biilukhisana nga biitsya khuunywa kameetsi.

³⁹Biryo bibyaayo bino nga abe byelukhisaniile iburaangisi we bisaala bibyoobule bino, nga bilikho tsinyilili tse buwaangawaanga, tsinyana tseesi byasaalatsaka natso tsabakho tsinyilili tse buwaangabuwaanga, namwe kamakoondokoondo.

⁴⁰Yakobo waawulakamwo kamasheese nga akarusa mu mbusi, kila atsikhola tsaaba nga tsilolelela lubeka lwe kamakoondokoondo, ni kamasheese kamamali khuulolela lubeka lwe bibyaayo bya Labani. Musaambo yino Yakobo waaba nga awukhanisa bibyaayo byeewe khuurura mu bya Labani.

⁴¹Abe buli lweesi bibyaayo bye kamaani biba nga bilikho biilukhisana, Yakobo emisatsaka biisaala bibyobule tsana iburaangisi we bitowo bye kameetsi, isho shaakila byaahesela abweene awo.

⁴²Ne abe buli lweesi bibyaayo biitoro biitsila khukhwiilukhisana, abe s'arawo biisaala ibyo ta, shaakila bibyaayo biitoro byaba bya Labani, ne bye kamaani byaba bya Yakobo.

⁴³Musaambo iyo, Yakobo wetsusa bibyaayo, waaba umuyiindifu luukali. Aryo waaba nga ali ni bibyaayo biikali, ni baakulwa, tsiŋamila atweela ni tsisikilya.