Read lumasaaba Khuurakikha 32 Bible Online

Khuurakikha 32 - lumasaaba bible

Khuurakikha 32

¹Nga ibyo byaweele biryo, Yakobo wenyukha wahaamba intsila yeewe waatsya, lwanyuma bamalayika ba Wele beetsa baamwakaanana.

²Ne Yakobo n'abona bamalayika abo, waaloma ari, “Lino nilyo liiye ly'Omukasya!” Shikila alaanga shiifwo isho lisiina ari Mahanayimu.

³Lwanyuma Yakobo waarumana baarume beewe khuuraangila benyoowe iburaangisi weewe, khukhwakaananamwo ni waandaaye Esawu, mu shisiintsa sha Seyiri, mu shibala sha Edomu.

⁴Aryo waababoolelela ari, “Nga mwooleleyo, kane muwe Esawu buurume buno muri, ‘Umwakaanisi woowo Yakobo akhuboolela iwe ari, niye waamenyakilekho wa Labani, niyo isi abeele khukhwoolesa ni shaleelo shino.

⁵Ari bona naayiindila ni tsiyeeyi, tsisikilya, kamasheese, ni tsimbusi, ni khuutubaasakho babaakaanisi besaani ni bekhasi. Musakhulu, ari ikhwakaanisa buurume buno isi uli, nga ikhuloomba ndi untsakaanile buulayi.’ ”

⁶Baryo baarume bano baatsya isi Esawu, lwanyuma baakobola isi Yakobo, baamureerera buurume nga baloma bari, “Khwoolile isi waandaayo Esawu, ni naye aryo ali khukhwiitsa khuukhwakaanana iwe nga ali ni basaani babaandi bitoondo bine (400).”

⁷Ilomo iyo yaakila Yakobo waarya luukali naabi, weetsula kumutaambo. Kila awukhanisamwo babaandu be muungo mweewe mu matuuli kabili, atweela ni kamasheese keene, ni tsimbusi, ni tsikhaafu, atweela ni tsiŋamila tseene.

⁸Lwekhuuba mu mwoyo kweewe eyambaasa ari, “Siinga Esawu ebwaakala lituuli litweela, kane manya liliramile lititukhe.”

⁹Lwanyuma kila Yakobo aloomba ari, “O Wele wa kuuka wase Iburayimu, luundi Wele wa paapa wase Isaaka! Iwe Umukasya niye uwaanomela ise uri niileyo mu shibala she weefwe, ni isi baalebe baase. Iwe waasuubisa ise uri, kane unjeetatsake bibiindu bintsiile buulayi!

¹⁰Iseese sinakhila khuufuna shiisa shoowo ni bubwiyikinwa bwoowo ta, byeesi ubeele untsokesanisa ise umwakaanisi woowo ta. Ise nga ni naama ingo weefwe, naaba nga siindikho na shiindu shoosi ta, khuurusakho imiimbo isi naaba nitiila, nga ni naambukha luluutsi luno Yorudaani. Ne ari bona nakobola nga ndi ni bibiindu bino byoosi byeesi naawukhanisilemo kimiluundi kibili.

¹¹Ari ikhuloomba ndi umbonese ise khukhwaama isi waandaayase Esawu. Lwekhuuba ise naariire ndi nga khwakaanaane ni naye khu ntsila, anyala waantsira ise, atweela ni baakyelama baase ni babaana beene.

¹²Ne iwe waasuubisa ise uri kane uniindatsake buulayi, luundi ubalaayise liisaaye lyase, liyiimbe lifwaane busa nga kumuyeekhe kukuuli khu ndulo khwe nyaantsa, nga sibabalikha na khubalikha ta.”

¹³Aryo Yakobo waarama mu shifwo mweesi aaba mweene umwo, waakonelawo shiilo isho, waarobora mu biindu byeesi aaba nabyo shiiwaanwa isi Esawu;

¹⁴Tsimbusi tsiikhasi bitoondo bibili (200), ni tsindurume natso kamakhumi kabili (20), kamakheese bitoondo bibili (200) ni kamamiiku nako kamakhumi kabili (20),

¹⁵tsiŋamila tsiikhasi kamakhumi kataru (30) atweela ni tsinyana tsatso, tsikhaafu kamakhumi kane (40) ni tsiwuunwa likhumi (10), tsisikilya tsiikhasi kamakhumi kabili (20), ni tsiseetsa likhumi (10).

¹⁶Aryo waabiwaambisa babaakaanisi beewe, buli bisolo mu lituuli lyabyo. Kila alomela babaakaanisi abo ari, “Ni muraangile mutsye iburaangisi wase, nga akari a buli bisolo, nga ni bitsya biloondekhana, mulekhawo libaanga.”

¹⁷Lwanyuma waawa babaakaanisi babaaraangila iburaangisi ibweene biilakilo bino ari, “Nga waandaayase Esawu waabakaanaane, ne waabareeba ari, ‘Umukhulu weenywe niye naanu? Mulikho mutsya waaheena? Ni bibyaayo bibiili iburaangisi weenywe bili bya naanu?’

¹⁸Nanywe mumwiilamo muri, ‘Bino bili by'omukulwa woowo Yakobo. Niye waabyakaanisile nga shiwaanwa isi umukhulu weewe Esawu. Ni naye umweene alikho eetsa inyuma iyo.’ ”

¹⁹Musaambo iyo niyo ndweela, waalakila babaakaanisi babaaba mu lituuli lye khaabili, ni lye khataru, ni kamatuuli kakaandi kakeelakho, nga abalomela ari, “Mweesi muli ni khuuloma shishiindu nisho shitweela sheene nga mwaakanaane ni Esawu.

²⁰Mweesi muli ni khuumulomela muri, ‘Umwakaanisi woowo Yakobo ali khukhwiitsa inyuma iyo.’ ” Byaba biryo, lwekhuuba Yakobo aambaasa mu mwoyo kweewe ari, “Kane imuwose kumwoyo nga naamuweele biwaanwa bino byoosi bibiraangiile iburaangisi wase, nio manya lwanyuma nga samweene namwaakanaane, antsakaanile buulayi.”

²¹Musaambo iyo, bibiindu byeesi aaba nga atsya khumuwa nga shiwaanwa, byaamwinyoowayo iburaangisi, ne niye umweene, waarama mu kaambi yeewe isi aakonela.

²²Mu shilo sheene isho, Yakobo wenyukha waayila baakyelama beewe boombi, atweela ni babaakaanisi beewe baabili, khuutubakho ni babaana beewe likhumi na mutweela, baatsya baakhalisa Luluutsi Yaboko.

²³Baryo boosi baatsya baakhalisa baambukha luluutsi, na buli shiindu shoosi sheesi aaba ni shasho.

²⁴Aryo nga Yakobo waaramile shaanjelekha yenyene, yabawo umusaani uweetsa, waarekana ni naye khuumala shiilo shoosi, khukhwoolesa antsye ni bwabuluukha.

²⁵Umusaani uyo n'abona ari s'ali khuunyala khuuwula Yakobo ta, waamukhoonola likuumba lyasiiso, khukhwiikha khu liraango, lyaarura mu shifwo shalyo.

²⁶Lwanyuma kila umusaani alomela Yakobo ari, “Indekhuule intsye, bona antsye bulikho bubuluukha.” Yakobo naye waamwiilamwo ari, “Sinakhulekhuula utsye ta, khuurusakho nga waamalile khukhuunoombela ise tsikhabi.”

²⁷Kila umusaani tsana uyo amureeba ari, “Ne iwe lisiina lyoowo bari naanu?” Naye weelamwo ari, “Ise bari Yakobo.”

²⁸Lwanyuma umusaani waamulomela ari, “Lisiina lyoowo singene libe luundi bari Yakobo ta. Khukhwaama shaleelo, lisiina lyoowo kane bakhulaangatsake bari Isiraeli[29], lwekhuuba iwe waarekanile ni Wele atweela ni babaandu, ate waafuurire.”

²⁹Kila Yakobo naye areeba umusaani uyo ari, “Nawe imboolele, naakhwikoontseleele, lisiina lyoowo bari naanu?” Umusaani naye waamukobolamo ari, “Lwashiina undeeba ise lisiina lyase?” Abweenewo awo, umusaani waasibula Yakobo, wenyukhawo waatsya.

³⁰Lweesho Yakobo waatwiikha shiifwo lisiina ari Peniyeli[30], nga aloma ari, “Ise naabonaane ni Wele mu moni khu moni, ate naarama nga ishiili mulamu.”

³¹Inyaanga yaarura nga Yakobo alikho aama i Peniyeli, waakyeenda nga alikho ayikila lwe lyasiiso.

³²Shisheene isho shishikila babaandu ba Isiraeli, sibalya kimikotyo kye khu likuumba lyasiiso ta, lwekhuuba bashebulila bari lyasiiso lya Yakobo lyakhoonokha.