Read lumasaaba Khuurakikha 33 Bible Online

Khuurakikha 33 - lumasaaba bible

Khuurakikha 33

¹Nga Yakobo ashiilikho aleeyikho, wenyusa tsimoni tseewe, waabona Esawu nga ali khukhwiitsa ni basaani baboola bitoondo bine (400). Aryo waawuukhanisamwo babaana beewe, waabakabakila Leya, Rakeli, ni bakhaana babaakaanisi tsana baabili.

²Aryo waaraangisa bakhaana babaakaanisi ni babaana baabwe iburaangisi, weesakho Leya ni babaana beewe, waaloosakho Rakeli, Yusufu waakamisayo inyuma ibweene.

³Lwanyuma Yakobo waakyeendaka waaraangila ibweeni. Kila atsya nga enamisa kumurwe kweewe aasi khwiloba, khukhwoolesa kimiluundi musaafu, nga eloosela iburaangisi khuutsya khwakaanana ni waandaaye.

⁴Esawu waakhuula tsiindimo weetsa khukhwakaanila Yakobo, waamukwa mu shifuba, waamwoomiisilamwo nga amukheesa. Boombi baaruundukha kamasika baalila.

⁵Lwanyuma nga Esawu waaboone bakhasi ni babaana kila areeba Yakobo ari, “Ne ba naanu babaali ni nawe bano?” Yakobo waamwiilamwo ari, “Musakhulu, bano nibo babaana beesi Wele aamba ise umwakaanisi woowo.”

⁶Lwanyuma bakhaana babaakaanisi beetsa iburaangisi atweela ni babaana baabwe, beenamisa kimirwe kyaabwe aasi.

⁷Lwanyuma lwaabwe, Leya naye weetsa atweela ni babaana beewe, nabo beenamisa kimirwe kyaabwe aasi. Ibumaliiliso, Yusufu ni Rakeli nabo beetsa beenamisa kimirwe kyaabwe aasi.

⁸Esawu waareeba ari, “Ne kamatuuli keesi inyoowile khukhwakaanana ni bibyaayo byeesi babeele nabyo, bimanyisa shiina?” Yakobo waamwiilamwo ari, “Imbyakaanisile nga biwaanwa isi uli, musakhulu, indi manya nio waantsakaanila ise buulayi uri.”

⁹Ne Esawu waamwiilamwo ari, “Waandaayase, ise bibiindu byeesi indi nabyo biimala. Iwe rama ni bibiindu byoowo.”

¹⁰Yakobo waamulomela ari, “Naakhwiikoontseleele, iwe khukhwaama nga n'uwuntsakaaniile buulayi uryo, n'ufukiilise shiwaanwa shino khukhwaama mu makhono kaase. Lwekhuuba ilala iseese khuukhubonakho iwe imoni khu moni, nafwaanile nga uboone mu moni mwa Wele, lwe saambo isi untsakaaniilemwo uryo.

¹¹Ikhuloomba ndi ufukiilise biiwaanwa byase bino byeesi ikhureerere, lwekhuuba Wele waayimaambila shiisa shikali, nga aamba bibiindu byoosi byeesi ingana.” Musaambo iyo, Yakobo weeloosela khumwiikoontselela, khukhwoolisa Esawu n'afukiilisa, wakaanila biiwaanwa ibyo.

¹²Lwanyuma kila Esawu aloma ari, “Ari khakhwiilooseleyo ni lukyeendo. Ne lekha ise intsye ninyoowe ibweeni.”

¹³Ne Yakobo waamwiilamwo ari, “Musakhulu, iwe waamanyile buulayi uri babaana bano bashiili naabi luundi baaluwile, naluundi ushimanye uri, ise indi ni khuuloolelela kamasheese ni tsikhaafu tsitsinuunisa. Nashiryo siinga khubikyeesaka khaangu mu shifukhu shiindi shitweela shonyene, binyala byaafwa.

¹⁴Nashiryo, musakhulu iwe niiwinyoowe iburaangisi weefwe. Ni nase kane ikhuloondekho mbola mbola, nga intsiila khu bunyali bwe bibyaayo bibiili iburaangisi wase, ni bunyali bwe babaana, khukhwoolesa ni khukane khwoole isi uli i Seyiri.”

¹⁵Kila Esawu naye elamwo ari, “Kale, ise khayo ikhulekho ni batweela khu basaani baase bano bakhuyeete.” Ne Yakobo waamwiilamwo ari, “Ne lwashiina wiinaana naabi uryo? Musakhulu, she khukhuuntsakaanila buulayi isho shaamalile.”

¹⁶Aryo Esawu wahaamba lukyeendo lweewe khu shifukhu khweene ikhwo weelayo i Seyiri.

¹⁷Ne Yakobo niye waakyeenda, waalola kwe Sukosi, isi eyombekhela intsu, ni kamasari ke bibyaayo byeewe. Nashiryo shiifwo isho baashilaanga bari Sukosi.

¹⁸Aryo Yakobo waama i Padani Aramu, woola buulayi mu shiriimba she Shekemu, shishaba mu shibala sha Kanaani, weyombekhela awo aambi ni shiriimba.

¹⁹Waakula liiswa lilyoolesa tsinusu bisiintsa bye feetsa shitoondo shitweela (100), khukhwaama khu betsukhulu ba Hamori, paapa wa Shekemu, liiswa lyeene mweesi ombekha lisari lyeewe.

²⁰Mu bweene imwo woombekhamwo shisheeso, waashilaanga lisiina ari Eli Elokhe[31] Isiraeli.