Read lumasaaba Khuurakikha 35 Bible Online

Khuurakikha 35 - lumasaaba bible

Khuurakikha 35

¹Wele waalomela Yakobo ari, “Yinyukha khaangu utsye i Beseli, umenyatsake ibweene iyo. Uli ni khukhwoombekha shisheeso ibweene iyo she khukhuuntsisaayilakho, ise. Ise indi Wele woowo, uwakhubonekhela nga uli khuutitukha khukhwaama isi waandaayo Esawu.”

²Aryo kila Yakobo alomela babaandu be muungo mweewe boosi, ni babaandi babaaba ni naye ari, “Ni mwinyusewo bi wele bye kamanaambo byeesi muli nabyo, mwiipyeeluuse mwabeene, lwanyuma mukwaare bikwaaro bibiindi biimiliwu.

³Khuryo khwinyukhe khutsye ano i Beseli, isi ise intsya khukhwoombekhela shisheeso isi Wele, uwaantsilamwo khuuloomba khwase waanjeeta, mu mbuka isi nabeela mu mutaambo. Niye abeelatsakile ni nase buli aandu oosi isi imbeele nga intsya.”

⁴Baryo baasuta bi wele bye kamanaambo ibyo baabiwa Yakobo, baarusakakho ni bubuuma bwe khu maru kaabwe nabwo baabumuwaambisa. Kila Yakobo atsya waabusiikha aasi e kuusaala kumuruumba, kukwaba aambi ni Shekemu.

⁵Yakobo ni babaandu beewe ni baaba nga batsya, shiriiso she kamaani khukhwaama isi Wele shawaamba babaandu be mu biriimba ibyo byoosi bibyaba byaabebotokheleele, yaalekha khuubawo n'umuundu na mutweela uwabaloondakho ari abebwaakale ta.

⁶Lwanyuma Yakobo atweela ni babaandu boosi beesi aaba nabo, boola i Luzi (nga niyo i Beseli), shishaba shili mu shibala sha Kanaani.

⁷Ibweene iyo, woombakhayo shisheeso, waatwiikha shiifwo isho lisiina ari Eli Beseli[32], lwekhuuba Wele aamubonekhela abweene awo, nga n'aba ali khuutitukha khukhwaama isi waandaaye Esawu.

⁸Khu mbuka iyo, Debora, uwaba umukaangi wa Rebeka waafwa, lwanyuma baamusiikha mwisina mwe kuusaala kumuruumba, kukwaba lwamwaalo wa Beseli. Khukhwaamila abweene awo balaanga shiifwo isho bari Aloni Bakusi[33].

⁹Indi luundi Wele waabonekhela Yakobo, nga n'akobola khukhwaama i Padani Aramu, waamuwa tsikhabi.

¹⁰Wele waamulomela ari, “Lisiina lyoowo abe lili Yakobo, ne khukhwaama shaleelo singene bakhulaange luundi bari Yakobo ta, ne ari lili Isiraeli.” Ni abweene awo, Wele waamutwiikha lisiina ari Isiraeli.

¹¹Lwanyuma kila Wele amulomela ari, “Ise ndi Wele Umunyali wa byoosi. Ingana usaale babaana baakali, lisaaye lyoowo libalaahe. Linaambo likhulu, ni bikuuka bye kamanaambo bikhaame mwiiwe. Bayiinga bakhaabe batweela khu be mu lisaaye lyoowo.

¹²Ikhaakhuwe iwe liiswa lyeesi nakabila Iburayimu, ni Isaaka. Ilala ikhaalikhuwe iwe, atweela ni lisaaye lyoowo lilikhaakhwiililewo.”

¹³Lwanyuma lweebyo, Wele waamururayo weelayo mu ngaaki.

¹⁴Abweene awo isi Wele aakanikhila ni naye, Yakobo waarawo Libaale lye khuuba nga she khuushebulililakho. Lwanyuma waalikhosesa nga alitsukhakho shiwaanwa she viini, naluundi waalitsukhakho kamafura ke kuusaala ku olivu.

¹⁵Yakobo waatwiikha shiifwo mweesi Wele aamukanikhilayo isho lisiina ari Beseli.

¹⁶Khukhwaama i Beseli iyo, belooselayo ni lukyeendo. Ne ni baaba nga bali aambi khukhwoola i Efurasi, imbuka iya Rakeli iye khuusaala umwaana yoola, ne shonyene ndi waafuna buwaangafu bwe khuusaala bukali naabi.

¹⁷Aryo nga biisa bye khuusaala bimuli buubi naabi, umukaangi weewe uwamuyeeta khuusaala, waamulomela ari, “Ukharya ta, uli ni khuusaala umwaana ukuundi umusiinde.”

¹⁸Ne shonyene ndi biba biryo, Rakeli aaba nga ali khuufwa, ne nga ashikubakuba aryo waatwiikha umwaana lisiina ari Benoni[34]. Ne lwanyuma paapawe waamutwiikha ari Benyamini[35].

¹⁹Musaambo iyo Rakeli waafwa, lwanyuma baamusiikha aambi ni kumukhoosi kukwaba kutsya i Efurasi (nga nisho Beselehemu).

²⁰Abweene awo, Yakobo waasimikhawo libaale khu ŋani yeewe khuuba nga shikhebuliso she ŋani ya Rakeli, shishiiliwo khukhwoolesa ni shaleelo shino.

²¹Isiraeli waakyeenda khukhwaama ibweene iyo, waatsya woombekha lisari lyeewe khu lubeka lwe shanjelekha lwe kumunaala kwa Ederi.

²²Nga Isiraeli ashimenya mu shibala isho, Rewubeni waatsya waakona ni Bila, mutweela khu bakhaana babaakaanisi ba paapa weewe, lwanyuma Isiraeli waashiwulilakho shamutsiina. Yakobo aaba ni basooleli likhumi na babili.

²³Basooleli ba Leya baaba nibo, Rewubeni (nga niye umusooleli wa Yakobo umukhulu), Simeyoni, Levi, Yuda, Isakaari, ni Zebuluni.

²⁴Basooleli ba Rakeli baaba nibo, Yusufu ni Benyamini.

²⁵Basooleli ba Bila, uwaba umukhaana umwakaanisi wa Rakeli baaba nibo, Dani ni Nafutali.

²⁶Basooleli ba Zilupa, uwaba umukhaana umwakaanisi wa Leya baaba nibo, Gadi ni Asheri. Bano nibo basooleli beesi Yakobo aasaala nga ali i Padani Aramu.

²⁷Yakobo weetsa ingo isi paapawe Isaaka i Mamure, aambi ni Kiriyasi Aruba (nga nisho Heburon). Abweene awo niwo isi Iburayimu ni Isaaka baamenyatsaka.

²⁸Isaaka aawaangala woolesa kimiiko shitoondo shitweela ni kamakhumi shinaane (180).

²⁹Lwanyuma waafwa mu miiko kyeewe kye busakhulu. Basooleli beewe Esawu ni Yakobo baamusiikha.