Read lumasaaba Khuurakikha 36 Bible Online

Khuurakikha 36 - lumasaaba bible

Khuurakikha 36

¹Lino nilyo lisaaye lya Esawu (alala isi balaanga bari Edomu).

²Esawu aayila baakyelama khukhwaama mu bakhasi be linaambo lya Kanaani, nga nibo Ada, umukhaana wa Eloni umu Hiti, ni Oholibama, umukhaana wa Ana, naluundi umwitsukhulu wa Zibeyoni, umu Hivi,

³waayila ni Basemasi, umukhaana wa Ishimaeli, umukooko wa Nebayosi.

⁴Ada waasaala Elifazi; Basemasi waasaala Rewuweli;

⁵Oholibama waasaala Yewushi, Yalamu, ni Kora. Bano nibo basooleli ba Esawu babaasaalikhila mu shibala sha Kanaani.

⁶Lwanyuma Esawu waayila baakyelama beewe, ni basooleli beewe, ni bakhaana beewe, atweela ni babaandu boosi babaaba be muungo mweewe, ni khuutubakho ni bibyaayo byeewe, ni bisolo byeewe bibiindi, ni bye buyiindifu byeewe byoosi, byeesi aafuna nga ali mu Kanaani, wahaamba lukyeendo waatsya mu shibala she aleeyi, awukhane ni waandaaye Yakobo.

⁷Byaba biryo lwekhuuba bye buyiindifu byeesi baaba ni nabyo byaba biikali naabi, byaalekha khubanyalisisa khuumenya atweela ta. Liloba khweesi baaba bamenya lyaba likyeekhe naabi nga sibanyala khukhwaayisilakho bibyaayo byaabwe boombi ta.

⁸Aryo kila Esawu (nga niye Edomu) enyukhawo waatsya khuumenya mu shibala sha Seyiri.

⁹Luno nilwo luruungo lwe lisaaye lya Esawu, nga niye uwaba umukuuka umukhulu uwe ba Edomu, babaamenyatsaka mu shibala she tsingoongo sha Seyiri.

¹⁰Kamasiina ke basooleli ba Esawu niko kano: Elifazi nga niye umusooleli isi Esawu aasaala n'umukyelama weewe Ada, Rewuweli nga niye isi Esawu aasaala n'umukyelama weewe Basemasi

¹¹Basooleli ba Elifazi baaba nibo bano: Temani, Omari, Zefo, Gatamu, ni Kenazi.

¹²Elifazi umusooleli wa Esawu aafunayo umukhasi ukuundi uwe bulafu, abe isi balaanga bari Timuna, waasaala ni naye umusooleli ukuundi Amaleki. Bano boosi baaba babetsukhulu ba Ada, umukyelama wa Esawu.

¹³Basooleli ba Rewuweli baaba nibo bano: Nahasi, Zera, Shama, ni Miza. Bano boosi baaba babetsukhulu ba Basemasi, umukyelama wa Esawu.

¹⁴Basooleli beesi Esawu aasaala ni Oholibama, umukhaana wa Ana, naluundi umwitsukhulu wa Zibewoni, baaba nibo: Yewushi, Yalamu ni Kora.

¹⁵Be mu lisaaye lya Esawu babaaba baawuli nibo bano: Basooleli ba Elifazi, uwaba umusooleli wa Esawu umukhulu baaba: Temani, Omari, Zefo, Kenazi,

¹⁶Kora, Gatamu, ni Amaleki. Bano nibo babaaba baawuli babaarura muunda mwa Elifazi, mu shibala sha Edomu, nga boosi baaba babetsukhulu ba Ada.

¹⁷Basooleli ba Rewuweli, uwaba umusooleli wa Esawu, baaba Nahasi, Zera, Shama, ni Miza. Bano nibo babaaba baawuli babaarura mu Rewuweli, mu shibala sha Edomu, nga boosi baaba babetsukhulu ba Basemasi, umukyelama wa Esawu.

¹⁸Basooleli ba Oholibama, umukyelama wa Esawu, baaba nibo bano: Yewushi, Yalamu, ni Kora. Bano baaba baawuli babaarura mu Oholibama, umukyelama wa Esawu, umukhaana wa Ana.

¹⁹Bano boosi baaba basooleli ba Esawu (nga niye Edomu), ni naabo nibo babaaba baawuli baabwe.

²⁰Kano niko kamasiina ke basooleli ba Seyiri, uwe mu shikuuka sha Hori, babaaba nga bamenya mu shibala isho: Lotani, Shobali, Zibewoni, Ana,

²¹Dishoni, Ezeri, ni Dishani. Bano nibo basooleli ba Seyiri babaaba be mu shikuuka sha Hori nga baawuli, nga abe bamenya mu shibala sha Edomu.

²²Basooleli ba Lotani baaba nibo Hori ni Hemani. Lotani aaba n'umukooko weewe abe bari Timuna.

²³Basooleli ba Shobali baaba nibo bano: Aluvani, Manahasi, Ebali Shefo, ni Onamu.

²⁴Zibewoni aaba ni basooleli babili nga nibo bano: Ayiya, ni Ana. Ana yuno niye uwafuumbula tsisebele tse kameetsi kamakhafu mu mubiimbi, nga n'aba aayisa kamasheese ka paapawe Zibewoni.

²⁵Naye Ana aaba ni babaana babili nga nibo umusooleli weewe Dishoni, n'umukhaana weewe Oholibama.

²⁶Basooleli ba Dishoni baaba nibo Hemudani, Eshibani, Isurani, ni Kerani.

²⁷Basooleli ba Ezeri baaba nibo, Biluhani, Zavaani, ni Akani.

²⁸Dishani aaba ni basooleli babili, nga nibo Uzi ni Arani.

²⁹Bano nibo baaba baawuli khukhwaama mu shikuuka Hori: Lotani, Shobali, Zibewoni, Ana,

³⁰Dishoni, Ezeri, ni Dishani. Bano boosi nibo baawuli be mu shikuuka sha Hori, khuutsiila khu bukuuka bwaabwe bukyeekhe mu shibala sha Seyiri.

³¹Babeelakho bano nibo bayiinga babaawula mu Edomu, nga ishiili khuubawo umuyiinga yeesi uwula mu Isiraeli ta.

³²Bela umusooleli wa Beyori ekyela umuyiinga wa Edomu. Lisiina lye shiriimba sheewe abe bari Dinihaba.

³³Bela n'amala khuufwa, Yobabu umusooleli wa Zera, khukhwaama i Bozira, waamwiilila mu bikyele byeewe nga umuyiinga.

³⁴Yobabu naye n'amala khuufwa, Hushamu khukhwaama mu shibala she ba Temani, waamwiilila mu bikyele byeewe nga umuyiinga.

³⁵Hushamu n'amala khuufwa, Hadadi umusooleli wa Bedadi, uwawula ba Midiyani mu busoolo mu shibala sha Mowabu, waamwiilila mu bikyele nga umuyiinga. Lisiina lye shiriimba sheewe abe bari Avisi.

³⁶Naye Hadadi n'amala khuufwa, Samula khukhwaama i Masireka, waamwiilila mu bikyele nga umuyiinga.

³⁷Samula naye nga waafwiile, Shawulu khukhwaama i Rehobosi, shishaba khu ndulo khwe luluutsi Efurati, waamwiilila mu bikyele byeewe nga umuyiinga.

³⁸Shawulu naye n'amala khuufwa, Baali-Hanani, umusooleli wa Akubori, waamwiilila mu bikyele nga umuyiinga.

³⁹Naye Baali-Hanani umusooleli wa Akubori nga waamalile khuufwa, Hadari waamwiilila mu bikyele byeewe nga umuyiinga. Lisiina lye shiriimba sheewe abe bari Pawu, n'umukhasi weewe abe baamulaanga bari Mehetabeli, umukhaana wa Maturedi, umwitsukhulu wa Mezahabu.

⁴⁰Ari kakeelakho kano niko kamasiina ke baawuli be mu bikuuka bya Esawu, khuusiintsiila khu tsiingo tsaabwe, ni bukuuka bwaabwe bukyeekhe, ni biifwo byeesi baamenyatsakamwo nibyo bino: Timuna, Aluva, Yesesi,

⁴¹Oholibama, Ela, Pinoni,

⁴²Kenazi, Temani, Mibuzari,

⁴³Magudiyeli, ni Iramu. Bano nibo baawuli ba Edomu (nga niye Esawu, uwasaala ba Edomu), khusiintsiila khu bifwo byaabwe mweesi baamenyatsakamwo mu shibala isho.