Read lumasaaba Khuurakikha 39 Bible Online

Khuurakikha 39 - lumasaaba bible

Khuurakikha 39

¹Ari ba Ishimaeli nga baamalile khukhwoolesa Yusufu mu Misiri, baamukulisa wa Potifari, umusaani umu Misiri, uwaba mutweela khu bakhulu ba Faraawo, nga niye uraangilila baaliindi be mu lubili.

²Umukasya waayeeta naabi Yusufu, musaambo iyo, waaba nga akhola buulayi mu buli shiindu shoosi sheesi aakholatsaka. Aryo waamenyatsaka muungo mw'omukoosi weewe umu Misiri uyo.

³Potifari wemenielesa, waashifumbula nga ilala Umukasya aaba ali ni Yusufu, naluundi waashibona nga Umukasya aamuyeetatsaka naabi mu buli shiindu shoosi sheesi aakholatsaka.

⁴Musaambo iyo Yusufu wekhoyesa naabi Potifari, waamwikyelisa umuloleleli weewe uwa buraawa. Isho shaakila waamwikyelisa umukhulu we muungo mweewe mwoosi, waamuwaambisa buli shiindu shoosi sheesi aaba nasho.

⁵Khukhwaamila abweene awo, nga baaweele Yusufu buukhulu ubwo, Umukasya waarakikha khuuwa muungo mwa Potifari tsikhabi tsingali khulwa Yusufu. Tsikhabi ts'Omukasya itso tsaaba khu biindu bya Potifari byoosi, bibyaba mu ntsu mukari ni mu mikuunda kyeewe.

⁶Musaambo iyo, Potifari waalekhuulila Yusufu buunyala bwoosi bwe khuulolelela buli shiindu. Aryo waalekha khubakho ni sheesi eyembelela shoosi ta, khuurusakho khuukhalawo bilyo shiina byeesi aba alya. Yusufu aaba umusaani umushishifu buulayi, luundi aaba abonekha buulayi naabi.

⁷Lwanyuma nga imbuka yaabirirewo, umukyelama wa Potifari waarakikha khukhwikoomba naabi Yusufu, nga akana ari atsye akone ni naye.

⁸Ne Yusufu niye wekaana nga amulomela ari, “Umukoosi wase waayikhola ise khuuba umuloleleli we bibiindu byeewe byoosi mu ntsu yeewe. Buli shiindu shoosi sheesi ali nasho shili mu makhono kaase.

⁹Ise ndi ni buunyala mu ntsu muno bubulekhaana ni bubweewe. Naluundi niye mbaawo shishiindu shoosi sheesi akhamaambisa ise ta, khuurusakho iwe wenyene, lwekhuuba iwe uli umukyelama weewe. Nashiryo, ise inyala ndyeena khuukhola shiibi shishifwaana shiryo mu moni tsa Wele?”

¹⁰Ne abe yakhaba nga umukhasi uyo aamuŋuunyilisa aryo buli shifukhu, nga akana ari atsye akone ni naye, Yusufu ekaanila ilala.

¹¹Ne yabawo shifukhu shitweela, Yusufu wenjila mu ntsu khuukhola kimilimo kyeewe, nga mbaamwo na mutweela khu baraambi babaandi ta.

¹²Kila umukhasi amuloondakho, waamukumila ingubo yeewe, nga amulomela ari, “Yiitsa khukone.” Ne Yusufu weyabulamwo ingubo, waatitukha waarura ibulafu, waamulekha ni nayo mukhono.

¹³Ne umukhasi n'ashibona ari Yusufu waatitukhile waarurire ibulafu, waamulekhile ni ngubo yeewe,

¹⁴waarakikha khuukhupa liyoombo, nga alaanga baraambi basheewe, waabalomela ari, “Bonakho! Umusaani umu Heburaniya isi umuseetsa wase aareera ali khuukhureerera bye kamaŋaanyu! Abe etsile mu shiseenge shase bari akana khuukona ni nase, ne ise naakhupa liyoombo liikali lilyeene.

¹⁵Naye nga n'abone aryo, waatitukha waarura ibulafu, waandekha ni ngubo yeewe.”

¹⁶Aryo waabiikha ingubo iyo khukhwoolesa umukoosi wa Yusufu n'akobola ingo.

¹⁷Lwanyuma umukhasi waamuboolela byoosi nga ni byaba, nga aloma ari, “Umusaani umu Heburaniya isi waareera uyo abe etsile mu shiseenge shase khukhufwakhila ise.

¹⁸Ne ni khupile liyoombo luukali lulweene, atitukhile waarura ibulafu, waandekha ni ngubo yeewe yino.”

¹⁹Aryo Potifari n'awulila biilomo by'omukyelama weewe bino, lirima lyaamuniina!

²⁰Kila atsya wawaamba Yusufu, baamubowa mu mapuusu, mweesi baabowatsakila baabowe b'omuyiinga babaandi, naye waamenya mu bweene umwo.

²¹Ne Umukasya waabatsaka ni Yusufu ibweene iyo nayo, waamwokyesanisa bye shiisa sheewe shiikali, shaakila wekhoyesatsaka naabi umuliindi we kamapuusu.

²²Shikila umuliindi uwe kamapuusu yuno awa Yusufu buunyala bwe khuulolelela baabowe babaaramile boosi, ni khuulolelela buli shiindu shoosi shishakholekhatsaka mwipuusu ilyo.

²³Umuliindi yuno s'elolelesatsaka khu shiindu shoosi sheesi Yusufu aaba nga akhola mwipuusu ta, lwekhuuba Umukasya aaba ali ni Yusufu, na buli shiindu shoosi abe sheesi akhola, shamutsiilatsakila buulayi.