Read lumasaaba Khuurakikha 4 Bible Online

Khuurakikha 4 - lumasaaba bible

Khuurakikha 4

¹Adamu waakona n'umukhasi weewe Eva, waaba shisoombo, lwanyuma waasaala umwaana umusiinde. Kila Eva amutwiikha lisiina ari Kayini, lwekhuuba elomela ari, “Naafunile umwaana umusiinde lwe buyeeti bw'Omukasya.”

²Lwanyuma waasaalayo umwaana ukuundi umusiinde, waamutwiikha lisiina ari Abeli. Abeli weekyela umwaayi we kamasheese, ne Kayini weekyela umulimi.

³Nga imbuka yaabirakilewo, Kayini waareera bitweela khu bilime byeewe, waabiwaanayo nga shiwaanwa isi Umukasya.

⁴Abeli naye wawaanayo shiwaanwa sheewe isi Umukasya. Niye aakhoonya lisheese lilyaana liikiboole litweela, khukhwaama mu masheese keewe, waabukula bisiintsa bibifuurayo buulayi, waabiwaanayo nga shiwaanwa. Aryo Umukasya waasangaalila Abeli atweela ni shiwaanwa sheewe,

⁵ne wekaana Kayini atweela ni shiwaanwa sheewe. Shino shaakhalasa naabi Kayini, waatuunduuma ni lirima liikali naabi.

⁶Lwanyuma kila Umukasya alomela Kayini ari, “Lwashiina iwe ukhalaale naabi musaambo iyo? Shiina kila utuunduuma ni lirima liikali liryo?

⁷Iwe uba nga ukholile shishiindu shiilayi, khali ikhufukiiliile ni shiwaanwa shoowo. Ne lwekhuuba ndi ukholile shishiindu shiibi, shishoonako ari shaaliindiliile busa amulyaango kwoowo. Shikana khukhuwula iwe, ne siwaakha waashifukiilila shaakhuwula ta.”

⁸Lwanyumakho Kayini waalomela waandaaye Abeli ari, “Khakhutsye khukyeendakekho iyo mwirome.” Ne ni baaba nga bali ibweene iyo mwirome, Kayini wenyukhila waandaaye Abeli tsana, waamukhoonya.

⁹Nga byabeele biryo, Umukasya waareeba Kayini ari, “Waandaayo Abeli ali waheena?” Kayini weelamwo ari, “Ise sinaamanyile ta. Ise niye uuli ni khuuba umuliindi wa waandaayase?”

¹⁰Lwanyuma lwayo ndi kila Umukasya alomela Kayini ari, “Lwashiina iwe ukholile shishiindu shiibi nga shino? Iwe waakhoonyile waandaayo, ni kamafuki keewe kalikho kaantsilootsela ise khukhwaama aasi mwiloba.

¹¹Ni nashiryo, ari indi khuukhutsuba iwe, ni khuubona ndi s'ulima luundi ta khu liloba lilyaasamile lyaamila kamafuki ka waandaayo, isi iwe wirire.

¹²Isi kane iwe ukhakilekho bari ulima khu liloba, nalyo singene likhusaalile biilyo ta. Khukhwaama shaleelo shino, kane ube umuundu ukhalikho ni ango ta, kane ube umukyeendaani busa khu shibala.”

¹³Kayini naye weelamwo Umukasya ari, “Shitaambiso sheesi umbeele shili shirafu naabi siinashinyalisa ta.

¹⁴Ari bona ulikho umboona ise khuurura khu liswa, ni khuutsya khuumenya aleeyi naabi ni nawe. Ise kane imbe umuundu ukhalikho ni aango ta, naluundi umukyeendaani busa khu shibala, n'umuundu yeesi ukane anyoole, kane antsire.”

¹⁵Ne Umukasya naye weelamwo Kayini ari, “Singene shibe shiryo ta. Umuundu yeesi ukane akhoonye Kayini, kane aweebwe shiitaambiso shishiili shirafu kimiluundi musaafu khuuminyisakho shitaambiso sheesi ise indi khuukhuwa iwe.” Aryo kila Umukasya ara khu Kayini khaabonelo, khuurewula ari ikhabawo umuundu yeesi unyala waakhoonya Kayini ta.

¹⁶Lwanyuma Kayini waakyeenda waarura isi Umukasya, waatsya waamenya iyo mu shibala she “Khuukyeendaana,” shishiili ibwaamanyaanga wa Edeni.

¹⁷Kayini waakona n'umukhasi weewe, waaba shisoombo, wasaala umwaana umusiinde, baamutwiikha lisiina bari Enoka. Khu mbuka iyo Kayini woombekha shiriimba waashitwiikha lisiina ly'omusooleli weewe, waashilaanga ari Enoka.

¹⁸Enoka naye waafuna umwaana umusiinde, waamulaanga ari Aradi, Aradi naye waafuna umwaana umusiinde waamulaanga ari Mehuyayeli, naye uwafuna umwaana umusiinde waamulaanga ari Mesushayeli, naye uwafuna umusiinde waamulaanga ari Lameka.

¹⁹Lameka waayila bakhasi babili, abe mutweela bari Ada, n'ukuundi abe bari Zila.

²⁰Lameka ni Ada basaala Yabali. Yabali yuno niye uwaba paapa we babaandu babaamenya mu masari, naluundi nga baayisa bibyaayo.

²¹Baasaalayo umwaana ukuundi bari Yubali. Yubali yuno niye uwaba paapa we babaandu babaakhupa kamatuungu, ni khuufuura kimilele.

²²Ndi Lameka ni Zila baasaalayo umwaana musiinde baamutwiikha bari Tubali-Kayini, uwaba ni kamakyesi khukhwikholakholanisa ni buroonzi ni ayoni, waamisamwo bibiindu bibiindi. Lwanyuma lweewe, baasaalayo umwaana umukhaana, baamulaanga bari Naama.

²³Shifukhu shitweela Lameka waalomela bakhasi beewe boombi ari, “Inywe Ada ni Zila, ni mundekeerese buulayi. Inywe bakhasi baase mumanye buulayi sheesi inoma: Iliyo umusaani isi ise neerire, neerire umusaani umusooleli, lwekhuuba aakhupile ise likuma.

²⁴Oba nga umuundu yeesi ukhakakho khukhwiira Kayini, afuna shitaambiso kimiluundi musaafu khuuminyisakho, ne uyo ukhakakho khukhwiira Lameka, afuna shitaambiso kimiluundi kamakhumi musaafu na musaafu khuuminyisawo.”

²⁵Adamu waakona n'umukhasi weewe Eva luundi, baasaalayo umwaana umusiinde ukuundi. Oyu baamutwiikha lisiina bari Seezi. Lwekhuuba Eva aaloma ari, “Wele waambeele umwaana umusiinde ukuundi, mu shifwo sha Abeli isi Kayini aakhoonya.”

²⁶Lwanyuma Seezi naye aafunayo umwaana umusiinde isi baalaanga bari Enoshi. Khu mbuka nyene yino niyo isi babaandu baarakikhila khuuraambisa lisiina ly'Omukasya mu khwiisaaya.