Read lumasaaba Khuurakikha 40 Bible Online

Khuurakikha 40 - lumasaaba bible

Khuurakikha 40

¹Lwanyuma lwe khuubirawo imbuka ifwiiti iri, umusaani ukabulila umuyiinga wa Misiri bye khuunywa byeewe, n'umuteekhi weewe umukhulu, baakhalasa umuyiinga.

²Faraawo wakhalalila naabi baakhulu bano boombi,

³kila babawaamba baabara mu mapuusu, kakaaba mu lwaanyi lw'omukhulu we baaliindi, nga nimwo mweesi baabowela Yusufu naye.

⁴Umukhulu we baaliindi yuno waarawo Yusufu khuuba nga niye ubaloolelela. Baryo baaba nga bamenya imbuka indeeyikho mu mapuusu umwo.

⁵Yabawo shiilo shitweela basaani bano boombi, uwakabulatsaka umuyiinga bye khuunywa n'umuteekhi, buli mutweela waaroora kamarooro, ne nga buli kamarooro kali ni sheesi kamanyisa.

⁶Antsye nga bwaasheele, Yusufu weetsa khuubabona nga ni bali, ne waabanyoola nga kumutaambo kwaabawaambile naabi.

⁷Shikila areeba baakhulu ba Faraawo bano ari, “Mwaabeele shiina shaleelo kila kumutaambo kwabetsuulekho kuri?”

⁸Nabo baamwiilamwo bari, “Ifwe feembi buli mutweela afunile kamarooro mu shilo, ne sikhulikho n'umuundu unyala waakakhuruumbulila ta.” Kila Yusufu abeelamwo ari, “Wele niye unyalisa babaandu khusontsoola kamarooro. Ari inywe ni mumboolele kamarooro keenywe khubone.”

⁹Uyo uwakabulatsakila umuyiinga bye khuunywa byeewe niye uwanyoowa, waaboolela Yusufu ari, “Ise mu marooro kaase, naboone kuusaala kumusabibu iburaangisi wase.

¹⁰Ne khu kuusaala khweene khwabeelekho tsisakya tsitaru, tsaamelakho kamasaafu, tsaamulisa, lwanyuma khweetsakho kimisabibu kimirobe.

¹¹Ise nabeele nga nawaambile shikopo sha Faraawo mu mukhono kwase, kila imbuta kimisabibu kimirobe ikyo, naakikhamulila mu shikopo isho. Lwanyuma naashimuyilila, naashimuwaambisa.”

¹²Lwanyuma kila Yusufu aloma ari, “Sheesi kamarooro koowo kamanyisa, nisho shino: Tsisakya tsitaru nibyo biifukhu bitaru.

¹³Nashiryo mu bifukhu bitaru, Faraawo atsya khukhurusakho iwe shitaambiso shoowo, akhulekhuule khukhwaama mu mapuusu muno. Kane akhwiiseyo mu shifwo shoowo nga umukabulila bye khuunywa byeewe.

¹⁴Ne nga woolileyo, nase ushebulilatsaka nga byaakhutsiliile buulayi. Ikhuloomba ndi uboolele umuyiinga bibimaambakho, manya naye waanjeeta khuurura mu mapuusu muno.

¹⁵Lwekhuuba ise baantsiba busa, baantsamisa mu shibala she ba Heburaniya, ni naari bona indi ano mu mapuusu, nga mbaawo shishiindu shiibi shoosi sheesi nakhola shishikila naaba muno ta.”

¹⁶Aryo umuteekhi umukhulu naye n'abona ari kamakhulu ke kamarooro kooyo kali kamalayi, kila naye alomela Yusufu ari, “Nase nafunile kamarooro. Ne mu kaase, ise nabeele nga netyuukhile bibiipo bibiilimo kimikaati bitaru khu murwe kwase.

¹⁷Ne mu shiipo shishabeele khu ngaaki khwe byasheewe, mwabeelemwo kimikaati kya Faraawo kya buli saambo. Ne shonyene ndi binywiinywi byeetsa byaarakikha khuukiliila khu murwe kwase.”

¹⁸Yusufu waamuloma ari, “Sheesi kamarooro koowo kamanyisa nisho shino: Bibiipo bitaru nibyo biifukhu bitaru.

¹⁹Nashiryo mu bifukhu bitaru, Faraawo atsya khukhuremakho kumurwe kwoowo, asuunge kumulaambo kwoowo khu kuusaala. Lwanyuma binywiinywi bye mu ngaaki kane biitse bilye kumubili kwoowo.”

²⁰Nga ni byaba, khu shifukhu shishikhola khataru, shishaba nisho she khuushebulililakho kamasaalikha ka Faraawo, aryo waakabulila baakhulu beewe boosi kamayiiya. Lwanyuma waarumanisa baareera mu moni tsaabwe basaani tsana baabili, uwamukabulilatsaka bye khuunywa n'umuteekhi weewe umukhulu.

²¹Uyo uwamukabulilatsaka bye khuunywa, Faraawo waamukobosa khu buraambi bweewe ubwo, weloosela khukhwakaanisatsaka Faraawo.

²²Ne uyo uwabatsaka umuteekhi weewe umukhulu, waamukhalila kwe khuufwa, baamusuunga khu kuusaala, ni bibyeene byaaba nga Yusufu n'ababoolela.

²³Ne shonyene ndi, umusaani uwakabulilatsaka Faraawo bye khuunywa nga n'olayo, weebilila Yusufu, waalekha khushebulila byeesi aamulomba ta.