Read lumasaaba Khuurakikha 43 Bible Online

Khuurakikha 43 - lumasaaba bible

Khuurakikha 43

¹Intsala yeloosela khuuba imbi naabi mu shibala sha Kanaani.

²Baryo be muungo mwa Yakobo ni baamala khuulya biilyo bibuluungule tsana byaawawo, Yakobo waalomela basooleli beewe ari, “Ni mwiileyo mu Misiri, mukhukulileyo biilyo biibuluungule bikyeekhe biri.”

³Kila Yuda amulomela ari, “Umusaani uyo aakhureewula ifwe ni buurafu bukali, nga akhulomela ari siingene akhufukiilile ifwe khuumubonakho ta, siinga khulekha khutsya ni waandaayeefwe umukyeekhe.

⁴Nashiryo iwe siinga ufukiilila khuutsya ni Benyamini, kane khwiileyo i Misiri khubakulile biilyo.

⁵Ne siinga nga ulekha khukhufukiilila khuutsya ni naye ta, nafwe sikhunatsya ta, lwekhuuba umusaani uyo nga akhureewula ni buurafu buukali, ari singene afukiilile khuukhubonakho ta, nga khwaakhutsya ni waandaayeefwe umukyeekhe uyo ta.”

⁶Isiraeli naye waabeelamwo ari, “Ne ilala lwashiina mwaandeerera ise bukosi bwoositsana, nga ni mwaboolela umusaani uyo muri muliyo ni waandayeenywe ukuundi?”

⁷Nabo baamwiilamwo bari, “Umusaani uyo aakhureeba ifwe bireebo biikali naabi bibikhuwaamba khwiifwe, ni khu be muungo mweefwe. Sheesi aakana naabi khuumanya shaba khuumanya paapa iwe oba nga ushiili umulamu, naluundi waakana khuumanya oba nga khuliyo ni waandaayeefwe ukuundi. Ari ifwe sheesi khwaba ni khuukhola, shaba khukhwiilamo busa biireebo byeesi aakhureeba. Ari ifwe khali khwamanya khuryeena khuri atsya khukhuloma ifwe khuutsya ni waandaayeefwe umukyeekhe?”

⁸Lwanyuma Yuda waalomela paapawe Isiraeli ari, “Ifukiilise ise intsye ni Benyamini, khwinyukhilemo khaangukho. Shino shinakila ifwe atweela ni babaana beefwe khulekhe khufwa intsala ta.

⁹Ise samweene niye ukane abe umuliindi weewe. Ne siinga bukosi bwoosi bumwoolakho, untsikiitsa ise senyene bifukhu byoosi, nga naakhumukobosa nga ali umulamu ta.

¹⁰Khulekha khuuba nga khwakyeleweele ano khuri, khali khwaatsiile, khukobola, luundi khwiilayo khukobola.”

¹¹Lwanyuma kila paapa waabwe Isiraeli abeelamwo ari, “Siinga shiba nga shili ni khuuba shiryo, ni muyililekho gafana uyo bibiindu bibifuura buulayi khukhwaama mu linaambo lyeefwe, nga biwaanwa isi ali. Nga mulimo bibiwunya buulayi, bubuukhi bwe ntsukhi, ni bye khukhwiyakha bibiindi, ni kamatuunda.

¹²Muyile ni tsinusu tsitsibirisamwo khabili mwitso tseesi mwatsya natso makiboole, lwekhuuba muli ni khukhwiisayo tsinusu tseesi mwakobola ni natso lunakhulwo, nga tsili mu wootswa tseenywe. Inyala yaaba nga baatsiramwo nga baakhutsililila ta.

¹³Lwanyuma mwinyukhilemwo khaangu mutsye ni Benyamini.

¹⁴Khali Umukasya Wele umunyali wa byoosi abaraangiliile, gafana abawaambila shiisa, nio manya abalekhuulila waandaayeenywe, mukobola ni naye atweela ni Benyamini. Siinga shiba bari ise ifwiilwe basooleli baase bawewo, khayo imbafwiilwe.”

¹⁵Baryo basaani bano baasuta biwaanwa bino, ni tsinusu tsitsifuurakho tsitsanyoowa, atweela ni Benyamini baatsya. Bakyeenda boola i Misiri, baatsya beemikha i buraangisi wa Yusufu.

¹⁶Ne Yusufu n'abona khu Benyamini, waalakila khaangu umwakaanisi we muungo mweewe, nga amulomela ari, “Yila babaandu bano mu ntsu iwase. Lwanyuma utsye ukhoonye shishaayo, uŋoonaŋooneyo bye khuulya, lwekhuuba banaliila mu ntsu iwase nga naakoboole ingo.”

¹⁷Umwakaanisi uyo waakhola aryo, nga Yusufu n'amulakila, waayila baalebe abo mu ntsu iweewe.

¹⁸Ne ni baaba nga balikho benjila mu ntsu, baarya luukali naabi, belomela bonyene na bonyene bari, “Balikho batsya khukhwinjisa mu ntsu lwe tsinusu tseesi khwanyoola mu wootswa, tse khu muluundi kukwanyoowa nga ni khweetsa ano! Babonekhana nga banakhwibwakala, bakhuwaambe, bakhukhole ifwe khuuba baakulwa, bayile ni tsisikilya tseefwe.”

¹⁹Baryo ni baaba nga bali aambi khukhwinjila mu ntsu, baatsya baakanikha isi umwakaanisi we muungo umwo, baamulomela bari,

²⁰“Ifwe khweetsa ano mu Misiri kumuluundi kukwabira khuukula biilyo.

²¹Ne ni khwaba nga khwiilayo iweefwe, khwaaba khwaaluwile lwe khuukyeenda, khwaatsya khukona khuwolekho, uri khukaangulula tsiwootswa tseefwe, buli mutweela khusiifwe waanyoolamwo tsinusu tseene tsinyene tseesi khwaba khwaasasuliile biilyo. Aluno khwaatsikobosile.

²²Naluundi khweetsile ni tsinusu tsitsiindi tse khuukula biilyo. Ifwe sikhwamanya naanu uwesamwo tsinusu itso ta.”

²³Kila umwakaanisi abeelamwo nga abalomela ari, “Mbaawo buubi ta, mukharya ta. Wele weenywe, naluundi Wele isi paapa weenywe esaaya, manya niye uwareeremwo tsinusu itsyo. Lwekhuuba ise nafuna tsinusu tseenywe tseesi mwasasula lwe biilyo tsoosi.” Lwanyuma waatsya waareera Simeoni isi bali.

²⁴Umwakaanisi yuno waayila baalebe bano mu ntsu ya Yusufu, waabawa kameetsi khusiinga bikyele byaabwe. Waamawo waatsya waawa tsisikilya tsaabwe bye khuulya.

²⁵Balebe bano nabo baŋoonaŋoona biwaanwa byaabwe khuubikabila Yusufu, lwekhuuba baaba nga baashiwuliile bari batsya khuliila ibweene iyo ni naye.

²⁶Nga Yusufu woolile ingo, baamureerera biwaanwa byatsana byeesi baaba baasutile, lwanyuma beenamisa kimirwe kyaabwe aasi khwiiloba, nga bamuwa shiriifwa.

²⁷Lwanyuma kila naye abareeba khuumanya oba bali baalayi. Ndi luundi waabareeba ari, “Ne paapa weenywe umusakhulu uyo aryeena? Ashiiliyo mulamu?”

²⁸Nabo baamwiilamwo bari, “Paapa weefwe umukulwa woowo, ashiili mulamu, naluundi aliyo umulayi.” Lwanyuma baafukhamila aasi, beenamisa kimirwe kyaabwe aasi khwiloba, nga bamuwa lukoosi.

²⁹Ne Yusufu ni enyusa tsimoni tseewe luundi waakyesaasa, waabona Benyamini, waandaaye umweene, kila abareeba ari, “Oyu niye waandaayeenywe umukyeekhe isi mwamboolelakho? Wele akhuwe tsikhabi mwaana wase.”

³⁰Lwanyuma kila Yusufu ayubakho khaangu khuururawo, waatsya iyo mu shiseenge sheewe yenyene, waalila kamasika khulwe khuukana khuukali khweesi aaba ni nakhwo isi waandaaye Benyamini.

³¹Nga waamalile, waasaaba mu moni, waarura, waakobola, nga weekumisile busa. Kila alakila ari baruse biilyo.

³²Baryo baakabila Yusufu, waaba nga alya yenyene, ni babaandaaye nabo baaliila iyo bonyene. Ni ba Misiri nabo babaabawo baaba nga baliila iyo bonyene, lwekhuuba baashibona nga she mbikho naabi khukhwikhala khuulya ni ba Heburaniya.

³³Balebe ba Heburaniya baaba nga bekhaale a shikabilo khuusiintsiila khu miiko kyaabwe kye buukhulu, khukhwaamila khu mukhulu khukhwoolela ilala khu mukyeekhe. Ni baabona isaambo isi beekhaalemwo, shaabeyaangisa naabi babeene.

³⁴Yusufu waabakaanisakho biilyo khukhwaama khu shikabilo sheewe, ne byeesi baayilila Benyamini byaaba biikalikho naabi khuufuurakho bye babaaramile. Baryo baalya kamayiiya kano, naluundi baanywa nga basangaalile luukali naabi.