Read lumasaaba Khuurakikha 44 Bible Online

Khuurakikha 44 - lumasaaba bible

Khuurakikha 44

¹Lwanyumakho Yusufu waalakila umwakaanisi weewe ari, “Yitsusaka tsiwootswa tse babaandu bano ni biilyo, basute nga ni banyala, naluundi wisakemo ni tsinusu tsaabwe mu wootswa tseene.

²Lwanyuma ure shikopo shase mu wootswa iy'omukyeekhe mweene, wisemo tsinusu tseene abe tse khuukula biilyo.” Umwakaanisi waakhola isho sheesi aamulomela khuukhola.

³Antsye ni bwabuluukha kumutikhinyi, baasibula baalebe bano khuutsya atweela ni tsisikilya tsaabwe.

⁴Baryo ni baaba nga baakyeendilekho lukyeendo luumbi luri khukhwaama mu shiriimba, Yusufu waarumana umwakaanisi we muungo mweewe, nga amulomela ari, “Yuubakho uloonde khu baandu abo khaangu. Nga waabanyoolile, ubareebe uri, ‘Lwashiina mukholile shishiindu shiibi nga isho, ate nga ifwe khwabakholeele biilayi byonyene? Lwashiina mwiibile shikopo sheewe sheesi anyweelamwo?

⁵Shikopo shino nimwo mweesi niye anyweelatsakila, naluundi nisho sheesi araambisatsaka khuukanikha bibiitsya khuubawo iburaangisi. Ilala mwaakholile shishiindu shiibi naabi.’ ”

⁶Aryo umwakaanisi uyo n'abaloondakho waabanyoola, waababoolela biilomo bino byeesi Yusufu aabalomela bibyeene.

⁷Kila nabo bamwiilamwo bari, “Musakhulu, lwashiina uli khuuloma biilomo bibifwaana biri? Ifwe babaakaanisi boowo, abe sikhunyala khwaakhola shishiindu shishifwaana shiri ta!

⁸N'ushebulile uri, ifwe khwakobosa khukhwaama i Kanaani tsinusu tseesi khwanyoola mu wootswa tseefwe makiboole. Ari abe khunyalisa khuryeena khukhwiiba i feetsa namwe i zaabu khukhwaama mu ntsu y'omukoosi woowo?

⁹Nashiryo musakhulu, siinga ibawo mutweela khusiifwe unyoolikhana nga ali ni shikopo isho, umukhoonyelawo, ni nafwe babaaramile khwikyela baakulwa boowo.”

¹⁰Kila naye abeelamwo ari, “Isho shiilayi, ne uyo isi inyoola ni nasho kane abe umukulwa wase, ni nanywe babaaramile kane mube balekhuule khuutsya.”

¹¹Baryo boosi baayubakilisa khuuruuraka tsiwootswa tsaabwe aasi, buli mutweela waakaangulula iyeewe.

¹²Lwanyuma umwakaanisi uyo waatsya nga emenieelesa mbola mbola buli iwootswa, khukhwaamila khu y'omukhulu umweene, khuutsya khukhwoolela ilala khu y'omukyeekhe. Ni oola khu wootswa iya Benyamini, waanyoolamwo shikopo.

¹³Shino shaakila baalebe bano boonuulaka bikwaaro byaabwe lwe kumutaambo kumukali. Baakhalawo baabowaka tsiwootswa tsaabwe khu sikilya, baashuukha beelayo mu shiriimba.

¹⁴Yuda ni babaandaaye ni boolayo mu shiriimba, baanyoola nga Yusufu ashiili ingo. Kila batsya baakwa aasi khwiloba iburaangisi weewe.

¹⁵Yusufu waabareeba ari, “Shikholwa shiina shino sheesi mukholile? Abe mwaakhumanya muri ise mu bunyala bwase inyala naashifumbula ta?”

¹⁶Kila Yuda elamwo ari, “Musakhulu, ari ifwe khukhwiilemo khuryeena? Kane khwookesanise khuryeena khuri sikhulikho ni kumusaango ta? Wele umweene waakhwookesanisile ari ifwe khulikho shiibi! Ari ifwe feesi khuli baakulwa boowo, ifwe babaaramile ni nooyo unyoolikhaane nga ali ni shikopo mu wootswa yeewe.”

¹⁷Ne Yusufu waabeelamwo ari, “Taawe! Ise sinyala naabawa inywe mweesi shitaambiso ta! Uyo unyoolikhaane ni shikopo yenyene, niye uutsya khuba umukulwa wase. Inywe babaaramile mweesi ni mwiileyo isi paapa weenywe ni lukoosi.”

¹⁸Kila Yuda esyeenda aambi waatsya isi Yusufu, waamulomela ari, “Musakhulu naakhwiikoontseleele, n'ufukiilise ise inganikhekho ni nawe ilomo ifwiiti iri. Ise naamanyile indi uli ni buunyala bubwoolana ni bw'omuyiinga umweene.

¹⁹Musakhulu, iwe wamweene wakhureeba ifwe uri, ‘Paapa weenywe ashiiliyo mulamu, namwe muliyo ni waandaayeenywe ukuundi?’

²⁰Nafwe khwakhwiilamwo khuri, ‘Khuliyo ni paapa weefwe, ne ali umusakhulu naabi, ni waandaayeefwe umukyeekhe uwasaalikha mu miiko kyeewe kye buusakhulu ikyo. Waandaaye w'omwaana yuno waafwa khaale, nashiryo niye yenyene uwaramawo muunda ya maayi weewe, shaakila paapa amukana naabi.’

²¹Iwe wakhulakila ifwe khutsye khumureere ino, nio unyale khuumubonakho wamweene ni tsimoni tsoowo.

²²Nafwe khwakhuboolela khuri umusooleli uyo s'anyala weetsa ni nafwe ta, lwekhuuba siinga alekha paapa, paapa anyala waafwa na khufwa.

²³Lwanyuma wamweene waakhureewula uri, nga khwaakhumureera ta, sikhunyala khwaakhubonakho iwe luundi ta.

²⁴“Nashiryo ifwe ni khweelayo isi paapa weefwe, khwamuboolela byoosi nga ni byaba, byeesi iwe waloma.

²⁵Lwanyuma waakhulakila ari khukobole ino khukule biilyo.

²⁶Ne nafwe khwaamwiilamo khuri, ‘Sikhunyala khweelayo i Misiri ta, khuurusakho nga khuli ni waandaayeefwe umukyeekhe. Lwekhuuba gafana s'anyala waakhufukiilisa ifwe khuumubonakho ta, khuurusakho nga umwaana uyo ali ni nafwe.’

²⁷Isho shaakila paapa weefwe waakhushebusa ifwe ari, ‘Mwaamanya muri umukyelama wase Rakeli, aasaalila ise babaana basooleli babili bonyene.

²⁸Mutweela waayindekha waatsya khaale. Ifwaana tsisolo tse mwirome, tsamulya, siindilayo luundi khuumubonakho ta. Lwekhuuba imbuka yaabirawo indeeyi naabi.

²⁹Ne ari siinga ndi muyila yuno naye, ne bukosi bwaamukwakho, kumutaambo kweesi munandeerera mu busakhulu bwase buno, kunaba mukali naabi kuntsire na khuntsira, niikhe i makoombe.’ ”

³⁰Yuda weloosela nga aloma ari, “Ni nashiryo musakhulu, ifwe siinga khwiilayo isi paapa wase, nga khwaalekhile umusooleli yuno ino, ne paapa waabona nga sikhuli n'umusooleli ta, atsya khufwa. Buulamu bweewe bukana naabi umusooleli uyu. Naluundi mu miiko kyeewe kye busakhulu kino, ifwe kane khube khwamureerere kumutaambo kukumwiira bwiiri.

³²Ise neemikhawo nga umuloleleli we buulamu bw'omwaana yuno. Ise netsubila paapa wase ndi, nga umwaana waakhukobola ni nafwe ta, kumusaango kuba khusiise buulamu bwase bwoosi!

³³Ni nashiryo musakhulu, ari ise niye unarama ano, ikhwakaanise iwe nga umukulwa woowo, ne lekha umusooleli yuno eleyo ingo ni babaandaaye.

³⁴Lwekhuuba ari ise inanyalisa ndyeena khukhwiilayo isi paapa wase nga umusooleli s'ali ni nase ta? Ise singana naabona buwaangafu bubwoola khu paapa wase ta.”