Read lumasaaba Khuurakikha 45 Bible Online

Khuurakikha 45 - lumasaaba bible

Khuurakikha 45

¹Lwanyuma lwa bino byoosi, Yusufu waalekha khunyalisa khukhwiikumisa luundi ta, kila alakila babaakaanisi beewe boosi khuurura ibulafu. Baryo boosi nga baarurire ibulafu, Yusufu weruumbula isi babaandaaye.

²Lwanyuma waalila kamasika luukali lulweene, shaakila ba Misiri baawulila, baatsya baashimanyisakho ni mu lubili lwa Faraawo.

³Yusufu waaboolela babaandaaye ari, “Ise Yusufu! Manya paapa wase ashiiliyo mulamu?” Ne baalebe bano ni baashiwulila baryo, buuri bwaabawaamba naabi, baalekha khunyalisa ni khuukanikha khuumwiilamo ta.

⁴Kila Yusufu alaanga babaandaaye ari besyeende aambi ni naye. Baryo nga baamalile khukhwisyeenda aambi, waabalomela ari, “Iseese niye waandaayeenywe Yusufu isi mwakulisa mu Misiri.

⁵Ari kumutaambo kukhabawaamba ta, namwe mwaarakikha khukhwiyikiitsa lwe khukhuungulisa ise ino ta. Iyo yaba ikhola ya Wele umweene, uwandumana ise khukhwiitsa ino, nio inyale khuuwonesa buulamu bwe babaandu.

⁶Ari kuno nikwo kumwiiko kwe khaabili, nga intsala ilya mu shibala, ne ishiramayo kimiiko kikiindi kiraano, nga mbaawo khuulima namwe khuukyesa ta.

⁷Ilala Wele aandumana ise iburaangisi weenywe, nio inyalise khuubayeeta muramewo nga baalamu mu shibala, ni khuubawonesa musaambo iya buraawa iyiyaangisa iri.

⁸Nashiryo sishili bari inywe mumwandumana ino ta, ne Wele umweene. Waayintsikyelisa ise khuuba umuundu wa Faraawo ufuura buukhulu mu shibala shino. Ise ari niye umukhulu mu shibala shino shoosi, ise ndi umuwuli mu Misiri muno!”

⁹Yusufu waalooselakho ari, “Nashiryo ari yuubakho mwiileyo, mutsye muboolele paapa wase muri, ‘Umwaana woowo Yusufu ashiiliwo mulamu. Wele waamukhola niye khuuba umuwuli wa Misiri, nashiryo yiitsa khaangu mu Misiri, ukhakyelewa ta.

¹⁰Ukhaamenyatsake mu shisiintsa she Gosheni, ubatsake aambi ni nase, iwe atweela ni babaana boowo, ni babetsukhulu boowo, ni kamasheese koowo, ni tsimbusi tsoowo, ni tsikhaafu tsoowo, na buli shiindu shoosi sheesi uli nasho.

¹¹Nga uli mu Gosheni iyo, ise samweene intsya khukhulolelela, lwekhuuba ishiiliyo kimiiko kikiindi kiraano kye ntsala. Ise singana iwe, ni be muungo mwoowo, na buli shiindu shoowo shoosi khuufwa intsala ta.’ ”

¹²Yusufu weloosela ari, “Inywe mweesi, atweela ni waandaayase Benyamini, mwaamboone nga ise Yusufu samweene, niye uuli khuukanikha isi muli.

¹³Mwaakha khuutsya muboolele paapa bye shiriifwa shase sheesi indimo, ni bibiindu byoosi byeesi muboone. Lwanyuma muyuubekho khaangu mumureere ino.”

¹⁴Yusufu waakwa waandaaye Benyamini mu shifuba, waarakikha khuulila kamasika, ni Benyamini naye waalila.

¹⁵Yusufu n'aba nga ashiilila kamasika aryo, waakwa babaandaaye babaaramile buli mutweela mu shifuba. Lwanyuma lwa shino baarakikha khuukanikha isi ali.

¹⁶Kamakhuuwa ke bibiindu bino ni byawulilikha mu lubili lwa Faraawo, biri babaandaaye ba Yusufu beetsile, Faraawo ni baakhulu beewe boosi basangaala naabi.

¹⁷Kila Faraawo alomela Yusufu ari, “Lomela babaandaayo bapakhile bibiindu byaabwe khu sikilya tsaabwe, beeleyo mu shibala sha Kanaani.

¹⁸Khayo batsye bareere paapa woowo, atweela ni be tsiingo tsaabwe, beetse ino. Nase kane imbawe shiifwo shishifuura buulayi mu Misiri mwoosi, nabo kane balye biilayi byamwo byoosi.

¹⁹Naluundi ikhulakila ndi, babaandaayo batsye ni bikaari khukhwaama mu Misiri, bye khuutsya khusutilamwo babaana baabwe atweela ni baakyelama baabwe, batsye beetse ni paapa waabwe naye.

²⁰Baboolele bakhatsya nga beyembeleele lwe bibiindu byaabwe byeesi kane balekhe ano mu Misiri ta, lwekhuuba shiifwo shishifuura buukhulu mu Misiri shili shishaabwe.”

²¹Baryo basooleli ba Isiraeli baakhola nga ni baabalomela khuukhola. Yusufu waabawa bikaari, musaambo isi Faraawo umweene aamulakila khuukhola, waabawa ni biilyo bibibamala bye lukyeendo.

²²Yusufu waawa buli mutweela khu nibo ingubo ishaakha ndweela, ne Benyamini niye waamuwa bisiintsa bye feetsa bitoondo bitaru (300), ni tsingubo tsiraano.

²³Ne isi paapa weewe, aamwakaanisa tsisikilya likhumi nga tsaasutile bibiindu bye mu Misiri bibifuura buulayi, tsisikilya tsitsiindi likhumi nga tsaasutile biilyo bibulungule, ni kimikaati, atweela ni biilyo bibiindi bye lukyeendo nga bakobola.

²⁴Kila Yusufu asiibula babaandaaye khuutsya, ne ni baaba nga benyukha baatsya, waabalooselakho ari, “Mukhalomanila khu ntsila ta.”

²⁵Baryo baalebe bano benyukha baarura i Misiri, baatsya isi paapa waabwe Yakobo mu Kanaani.

²⁶Nga boolile baamuboolela bari, “Yusufu aliyo mulamu! Ari isi khulomela ano, niye umuwuli we shibala she Misiri shoosi.” Yakobo weesindukha naabi lwe kamakhuuwa kano, waalekha khushifukiilisa sheesi baamuboolela ta.

²⁷Ne ni beloosela khuumuboolela biilomo byoosi byeesi Yusufu aababoolela nibo, indi lwanyuma waabona ni kamakaali khukhwaama mu Misiri keesi Yusufu aamwakaanisa khuumusuta, kamaani kaamukobolamwo, wewulila buulayi.

²⁸Kila Isiraeli aloma ari, “Isho shaamalile, ise ari naamanyile ndi umusooleli wase Yusufu aliyo mulamu! Naakha khuutsya imubone, nga ishiili khufwa ta.”